1 RAMPAUBE sam a da gwang dai eh, ranggai, 2 "Nang Israel deu ziemne aipau samregwa kerang de pekie dai no rang, nah

‘Mipeimedung kubetsi kehiabedung tyei, nah pe namedung gei tei hia di’ de eh rang kecude? 3 Ih ring kela nzwa, aide RAMPAUBE Tinggwang ndugai, Israel ga madaude aipau samregwa de n ziemne teu lu kera bam si lakta. 4 Ainie! Teilungh leune agu, pe pei teilungh liede nah pe napei teilungh liede, penui au agu! Kemau tei kecube cipau de tsai zie!

5 Ma kesangme gede daipai rang gai zie no nah kemzuibe tei kela nah kesamsangme ge de, 6 magade pa lamlwatudung gade matyei lama mede Israelme kiga mamiedung de ngang pie lama, nah pe kidame nau de ngngwa henauhepei ta tei lama, mede mipui ge mipui zai tei kela dau nau hepei zai teila kemak, mina aide kesamsangme ge ni? 7 Mige mikeheibe de de tei keherei la kemakbe de dai rang lai no, nah pa pe dade ma releu kecume de pecu kepeu dau bamdo kebeu de peu dai dila, nah pa au rega lama dede pa mzeu kelame de pe taktyei peu la nah pa paaula kebamme de paihenidung ha beula, pa kesamsangme ge ni? 8 Mige pa rangkang hepok kebeu de gade pekai makiee gede lula kemakbe de dai rang lai no, nah pa ma zwa kecu gade pe mmi makiee gede tyei la kemakbe de? Pecu au makesangme ge lie rangla nah minadung kakga kesamsang zai teugwang gai beula. 9 Magade cipau pei de a samdung mzai la cai nah a zaidung samsang eh tei mzai la cai, kesamsang pei de ziemne sampet au aide: Pa au ring luzie!, aide RAMPAUBE ne ndugai.

10 Dede magade pa pe napei pezai sia eh mide tei ketsetme ge eh bam cai nah anui ma aidungde rang kegai gade keheibe ket de tei bam cai, 11 (ma aidungde gade pepei magede tei nzeu gai ma meliede). Pa lamlwatudung gade matyei nah pa pe kidame nau de ngngwa henauhepei ta tei. Pe ha daipai ge ranglu lai no? 12 Aipau pei de kegame nah teu mai kesiame de tei keherei, nah pa migu tui tyei nah süt tyei, nah pa bamdo kebeu de peu caili dai lama, nah pa mamiedung de ngang cuh piela nah kemneutadung teila, 13 nah pa mide pekai kekiee ge le rangkang hepok beu la nah pa ma zwa kecu dau de pe mmi kekiee ge tyeila, cipaume ringlu zie ni? Pa au ring lak zing! Pa au tsai bi zie nah pe cit de au pekatei pepeu kedanemene pa kengkau ta aidung pelane tei kedine. 14 Dede ainie! Mipei ge pe napei ge bam cai, nah pe napei pepei kemaudung tei kedi pelane ngau bam, nah pa cidungde ngau bam de, pa au ma cidungde tei ma. 15 Cipau napei de au lamlwatudung gade ma tyei ma, nah pa au Israelme gu mamiedung dage ngang cuh pie lama, nah pa au pe kidame nau de henauhepei zai teila ma, pe ha daipai ge ranglu laino? 16 Cipau napei de migede de mneu lama, mede bamdo kebeu de keli beu tadi lama, mede kerega niadung keu lama, dede ci nzwa meliene pe taktyei kop kemzeume de peu la nah paaula kebamme de paihenidung ha beula. 17 Cipau napei de migede de mneu lama mede pekai kekiee ge de keu lama mede pa hepok kebeu ga de pe mmi kekiee ge de tyei lama, dede pa a zaidung mzai la nah a samriadung gade tetla; cipau napei de pepei mau de ziemne tsai di lak. Pa au ring bi luzie! 18 Pe pei, pa mikedame de mneu eh keheu tyei nah pe sinabe gu süt tyei, nah pe minadung kak gade daipai siabi kecu tei, ainie, pa au pemau gade tsai zie.

19 Dede nang rang, ‘Daitei eh pe napei pepei maudung ziemne keherei meno?’ Kedanemene pe napei au kemzuibe tei la nah samsang la nah a samdung pelane mzai la; pa cidungde teila. Pa au ring bi luzie! 20 Kemau keteibe, cipau de au tsai zie. Pe pei mau ziemne pe napei keherei lak nah pe napei mau ziemne pepei keherei lak. Kesamsangme ge petaube tei cai pekatei pe ziemne, nah kesiame ge kesiabe tei cai pekatei pe peu ga zie.✝

21 Dede magade kesiame ge pa tei kedi maudung pelane gade nreu lucai, nah a samdung pelane mzai lu cai, nah kemzuibe nah kesamsangbe tei cai, pa au ring bi luzie nah tsai dilak. 22 Pa tei kedi maudung pelane ziemne pecu renia kera nsung dai lakta. Pa au kesamsang tadung ketei dene ring luzie. 23 Mina kesiame tsai kecudau a suiyi süt di lani, aide RAMPAUBE Tinggwang ne ndugai, nah pa ringlu kerabe pe lampui gade nreu kecu de ga a suiyi bam lak ni?✝ 24 Dede magade kesamsangme ge pe kesamsang gade nreu tetti nah kemau tei nah kesiame ge kemneudung ketei nzwa kemneudung tei cai, pa ring lu bui ni? Pa masang mene acu cwa kecudau pa kesamsangdung pelane tei kegaidung de nsung ta dizie. Cine pa au pa tei kegai kemaudung de ziemne tsai zie.

25 Dede nang rang, ‘Rampaube ketei de au petau ma!’ Kingneilu, Israelme! Ih tei keladung petau meni? Nnui tei kela lampui be petau melie ni? 26 Kesamsangme ge pe kesamsang gade nreu tet kedi dau, nah kemau tei kedi dau nah cidungde ziemne tsai kedi dau, iciucai pa tei kedi kemau ziemne tsai zie. 27 Dede kesiame ge pa kesiabe tei kela gade nreu lu cai nah kemzuibe tei nah samsang lu cai, pa pe teilung kwak luzie. 28 Kedanemene pa kemaudung tei kedi pelane ngau lü cidungde gade nreu lu. Pa au ring bi luzie, nah pa au tsai dilak. 29 Dede Israelme rang eh, ‘RAMPAUBE tei kela de au petau ma!’ Dai nzwa Ih tei kelade petau meno, Israelme? Nnui tei kela lampui be petau ma. 30 Ciziemne Ih nnui hangge ge kecude pa tei kegai ria gade petu tiak zie, Israelme dage!, aide RAMPAUBE Tinggwang ne ndugai. Helung nreu lu nah nang tei kela kemaudung pelane gade nreu lu, cinzwa lu de cidungde ne n puikam tei di melu kerane. 31 Nnui tei kedi maudung pelane nnui da kebam de keu kelien gi dilu; nnui mlung nah n rabe tei heci lu nnuikatei. Israelmedung, dai tei nnui tsai lai no? 32 Kedanemene mige tsai kecu ga a suikeyi bam ma, aide RAMPAUBE Tinggwang ne ndugai, cine helung nreu lu nah ringlu!"