1 RAMPAUBE Tinggwang aide rangla: Kilungle kenlüt herieki, naimiak kepetle nreu gai kebam, cide lang herokne mata tei kebam tingdau ngkui dizie, dede Sabbath benai cide ngkei zie, nah keici benai cide ngkei zie. 2 Hegwangpei napei hegwale kigu de ga hegwale herieki lampui gade nlüt zie, nah cingkume pe keru ratak nah lungciep recadung tei kebam dau hegwangpei napei helungle herieki kikam tsiadung dwaga sap zie. Pecai pa helungle herieki gade pa reca zie nah mpet dai dizie, dede herieki tinghegi di kemaktane ngkuidi lak. 3 Mina pelane Sabbath ramsangne nah keici ngyi ramsangne herieki dwaga keumie RAMPAUBE de reca zie. 4 Hegwangnapei RAMPAUBE de Sabbath benai keru ratak kepeu de au zamra mezing kecu meurünna herok nah meurünseu ge zie. 5 Mei reca tei kegai ga meurünseu de si kecu cide ephah ge zie, nah mei reca ga meurünnadung si kecu cide pesui kieege peu lubui, nah mei ephah* ge ziemne maca hin* ge reca beu zie.

6 Keici dau pa hetumdung kak gade hetumseu ge, meurünna herok, nah zamra mezing kecu meurünseu ge reca beu maisia. 7 Hetumseu de ziemne mei reca ephah ge teibeu maisia nah meurünseu de ziemne ephah ge, nah meurünnadung ziemne pa peu keneu be peu lubui, nah mei ephah ge ziemne maca hin ge reca beu zie. 8 Hegwangnapei herieki lampui gade nlüt keludau cikade pa mpet dai maisia.

9 Dede hangdeu ga mina pelane hengyi keradau RAMPAUBE dwaga kegwang dau, keheibe de tingpeule rieki gade reca kera kenlütme tingpile herieki gade mpet maisia; nah tingpile de nlüt kelume tingpeule de mpet maisia. Migede kenlüt lampui gade caili mpet dailak, kedanemene pa mzui jüja pe dwa lebie de mpet maisia lugu. 10 Hegwangnapei minadung kakga sum ga bam kerabe; penui kenlüt dau, pa nlüt maisia, nah penui tet mpet cudau, pa de mpet maisia. 11 Hengyidung ga, mei reca de hetumseu ziemne meitsi ephah ge maisia nah hemeuseu ziemne ephah ge, nah meurünna ge ncüt eh ma keheibe de peu lubui, nah ephah ge ga maca hin ge. 12 Hegwangnapei mta mapeu, keru reca ge liede mede lungciep reca ge liede RAMPAUBE de peu kegaidau, herieki naimiak kepetle kebam de pecu ngkei beu zie. Pa Sabbath benai tei kela nzwa eh pa pe keru reca nah pe lungciep reca peu gai zie. Pecai pa mpetti maisia, nah pa mpet kedicai herieki ngkui dizie.

13 Cika si eh, nang tingnai ramsangne zamra mezing kecu meurünna mmi ge nage keru reca RAMPAUBE de peu zie; nang aide tingnai ramsang tingcang tei zie. 14 Cide gage mei reca ge de si eh nang tingnai ramsang tingcang peu zie, ephah zi herok gade zi ge nah RAMPAUBE de peu kecu tokkui de tei hwa lu kerane hin de zi cum gade zi ge peu zie,* bammui kela hezai tei kelu zai gade. 15 Penui meurünna de, mei reca de, nah maca de tingnai ramsang tingcang lamlui gai zie, tei mui kela keru ratak de ziemne.

16 RAMPAUBE Tinggwang aide rangla: Magade hegwangnapei pe napeimedung keheibe de mapeu ge peu cai, cide pe mapwa zie. Cide mapwa ge, pe napeimedung gu mabam dizie. 17 Dede magade pa pe mapwa gade pe kilame mi hangge de peu cai, iciu cai peudaikedi mmi de kecang cipau kila degu dizie, nah cide hegwangnapei da gwangdai dizie. Pe mapwa au pe napeimedung gu kesang. 18 Hegwangnapei minadung gu mapwa penui mabam gade keu teu dilak; pa pe napeimedung ziemne pekatei pe mabam gade peu maisia iciu eh a minadung pekatei pe mabam riep gade, migege kecu lungh zang di kelak ne.’"

19 Pecai minabe acu herieki kimuiki gade cingkume gu kemci kibungdung gage ngngwa gai, cide tingpeule ge nreu gai bam nah ainie! Tingnaimiak kenlüt lebie heni ge bam. 20 Pa a dage ranggai, "Heni aide gade cingkume mikatei mide kemmau ratak de nah kemau ratak de lang maisia nah mei reca de aikade ru zie. Penui hegwale kigu de ga recadung de pwa gwang kerabe ma, kedanemene iciu lucai minadung de tei mci di zielu." 21 Pecai pa acu hegwale kigu dega ngngwa gai nah heni cide gu kimiak mdai de pa acu ngngwa tetkah, nah kigu kimiak leune ga kigu keda gede bam eh Ih ngau. 22 Hegwale kigu kimiak mdai dega kigu keceu mdai ge bam, petie cubit riakdai nah pedi cubit camrei. Kigu mdai cide petie pedi nzwakap. 23 Tangtsu le heni mdai cide hekwa twagwa kecu ge bam, nah cipau kangga mimang tei gai pwabam. 24 Minabe a dage ranggai, "Aipau henidung de gade kerecaki kilame minadung ratak reca kebeudung de swa zie."*