1 RAMPAUBE samkakbung de Philistinme deudi ga kei hena ge bamdi. 2 Cidau Philistin ga minadung cingkumedung nah rekamedung de qugai; penui penui dage rangdi, "RAMPAUBE samkakbung de teu anui daitei laino? Anui dainzwa cide pe deudi gage langcaili gai maisia bi ranglia lo." 3 Cingkumedung nah rekamedung keligai, "Nnui Israel Tinggwang samkakbung de langcaili dizie cai, mtamapeu gede si mene langgai so; kehei teide pecu kemau reca langgai beulu. Iciude nnui mateei yilu zie, nah daitei pa cu kecang nnuide saja peu bambi kecu nnui cilu zie." 4 Cidau penui keligai, "Kemau reca ziemne anui pecu daipai langcaili beulai?" Penui keligai, "Philistia ga hegwang mengei ria gade kecak le teikelu keteeizam mengei nah kecak le teikelu za mengei. Mateei cide nnui nah nnui reu kedimedung de teikeherei kedine. 5 Cine nnui keteeizam rehidung, nah nnui heza hangdeu tei kemsiabe rehidung teilu maisia, delwe Israel Tinggwang de kendu peulu. Iciude pa nnuide, nnui rabedung nah nnui deude saja peu tadi lubui. 6 Pharaoh nah Egyptmedung penui nlung tak kedi nzwa daitei nnui nnui lung takbam laino? Israel Tinggwang penuide tei kehereisüt kegai dau; Egyptmedung minadung de lang gidi eh penui tetdi meni? 7 Cine cu, hekwen gari keheci ge nah ketumpui nciu pwa kebam madaude ngwanggai pung kemak kena telei lu. Ketumpui kenade gari gage keu gailu, dede penai na kena de hekaune ki gage kai dilu, penai dade peu tsam dilu. 8 Pecai RAMPAUBE samkakbung de pwalwe hekwen gari gage kailu, delwe pe petai ga, tsingbung ge gage nnui mau ziemne kemau reca pecu langgai beu lai eh kebam kecak rehidung de kailu. Pecai peu pesui lege tetgai dilu. 9 Pecai pielu; hekwen gari cide pe deu Beth Shemesh* nam nreule ge tetgai dicai, kengkap kedi aide tei kegai RAMPAUBE ne da. Dede ciciu mecai, Israelme Tinggwang ne anuide teikeherei melie kecu anui cilu zie; cide anuida gwangdau kelu geda."

10 Mipeidung penuide rang kebeunzwa teilu; penui nciu pwa kebam ketumpui kenade hekwen gari gage keu gailu, nah penai na kenade hekaune ki gage bangdi. 11 Penui RAMPAUBE samkakbung de hekwen gari de gage kailu, nah kecak za nah penui keteeizam rehi teikelude kaipwa kebam tsingbung de si eh. 12 Ketumpui kena Beth Shemesh gage mzuizang eh tet gaidi. Penai puidiki gega mrung jüja tet nghang, nah penai zetle mede hile nreu pie ma. Philistinme reu kedimedung Beth Shemesh deurai kecang penai cai suimie. 13 Cu Beth Shemesh langkie ga minadung wheat luhlüt la, nah penui ngang cuh pie samkakbung de ngau luge, penui suiyi sütdi. 14 Hekwen gari de Beth Shemesh mepei Joshua luh ga gwanglu nah cika mtakdi. Cika tsurakang disüt ge bam, nah penui gari de gade tsing bi kecaidi delwe ketumpui kenade RAMPAUBE dage keru reca teigai beudi. 15 Levime RAMPAUBE samkakbung de pwa nghunglu, kecak miedung kebam tsingbung de si eh, delwe cidungde tsurakang disüt kecude reu gage kailu. Cipaunai Beth Shemesh ga mipeidung keru recadung nah ratakdung RAMPAUBE dage teigai beu. 16 Philistinme gwangpei hang mengei bau aide ngau luge, cipaunai penui tetcaili pwa Ekron ga gwangdi.

17 Philistinme kemau reca RAMPAUBE dage tei gaibeu kera ziemne kecak keteeizamdung langcaili kebeu aidungde da, Ashdod nam ziemne ket, Gaza nam ziemne ket, Ashkelon nam ziemne ket, Gath nam ziemne ket, nah Ekron nam ziemne ket. 18 Kecak za de au Philistia ga hegwangme hang mengei teu kebam namdi pelane, riekelu namdi nah renamdung de ziemne ramcau ge. Beth Shemesh mepei Joshua luh ga tsurakang kedide, penui RAMPAUBE samkakbung kai kecude, ndaa tei kedide zierang tei eh henai kecangde cika bam.

19 RAMPAUBE Beth Shemeshme peidung gede teitsetdi, kedanemene penui RAMPAUBE samkakbung lungga pie kegaine. Pa mipei hang riakhena gede teitsetdi. Minadung hei eh hap kedanemene RAMPAUBE cikenzwa ge mina dage tei kegaine. 20 Beth Shemeshme peidung rangdi, "Cau aipau kemci Tinggwang, RAMPAUBE dwaga saplu buino? Anui dade samkakbung de cau dage lang gaidi laino?" 21 Penui Kiriath Jearim* ga kelungme dage samgwame langgai eh, ranggai, "Philistinme RAMPAUBE samkakbung teu cailigwang beuda; hung eh nnui pwa cailidai lulo."