1 RAMPAUBE Samuel dage rangdi, "Dai tie ge nang Saul ziemne hei eh hap laino, Ih pecu peu Israel reu hegwang tei kera mlai dida? N kii maca le kaipui lu delwe miecu. Ih ncu Bethlehem ga Jesse dage langgai zie, Ih pe namedung kakgade hangge depeu hegwang tei kera kedetlu delu."✝ 2 Samuel rangdi, "Dainzwa Ih mie lulai? Magade Saul cide siu cai, pa acu teitset dizie," RAMPAUBE rangdi, "Nang ketumna ge keulu delwe ranglu, ‘Ih RAMPAUBE dage ratak tei gai kera gwangla.’ 3 Jesse de ratak ga qu gailu, nah nang daitei maisiabi Ih saulia zie. Ih rang kelia hangge de nang a ziemne keniaklu." 4 RAMPAUBE kerang nzwa Samuel teilu nah Bethlehem ga mielu. Namdibe ga hangkiamedung mbeu eh pecu redau kera gwang nah peda keteugai, "Kezuyi gade nang gwang lani?" 5 Pa rangdi, "Kezuyi gade; Ih RAMPAUBE dage ratak teigai beulai eh gwangla. Reca ga acu ngngwa gwang kera nnui katei nnuide mteilwe kaintsam pwabam lulo." Pecai pa Jesse nah pe napeimedung de kedet ntsamlu nah ratak gage penuide qugai.

6 Jesse nah pe napeidung gwang ge, Samuel, Jesse napei Eliab de piegai nah pekatei pe dage rangdi RAMPAUBE ne keniak kelube pe dwaga sap bam ciang da. 7 Dede RAMPAUBE Samuel dage rangdi, "Hegwa zu pie so, mede pe ra kehu de; kedanemene Ih pecu mlai dida. Mina pie kela nzwa RAMPAUBE au pie la kemakne; mina au hegwa zu pie la, dede RAMPAUBE au mi mlung piela." 8 Pecai Jesse Abinadab de qu gai eh Samuel dwaga gwang. Cidau Samuel rangdi, "Aide de liede RAMPAUBE kedet ma." 9 Jesse peu Shammah de Samuel dwa ga gwang, dede Samuel rangdi, "Aide de liede RAMPAUBE kedet ma." 10 Jesse pe name hang hena depeu Samuel dwaga gwanglu. Cidau Samuel Jesse dage rangdi, "RAMPAUBE penui hangge de de kedet ma." 11 Cidau Samuel Jesse dage keteudi, "N name aika bamciak deni?" Pa keli eh, "Henatube David cude bamreu, dede pa meurün kwala." Samuel Jesse dage rang, "Pecu qu gai eh ngngwa gwanglo; pa aika gwang kemaktane anui ntum daulak." 12 Jesse migede langgai eh David de qugai eh peu ngngwa gwanglu. Pe na aide pe luilung yi nah pe miak de hezuyi nah rehang yi. RAMPAUBE rangdi, "Cuhlu, pecu keniaklu; kedanemene pa delu." 13 Cidau Samuel maca kii de keulu nah pe siname kakgade pecu pecaibe gwangpei tei kera keniaklu. RAMPAUBE rabe cipaunai gade David da kelwa gwanglu. Pecai Samuel cuhlu nah Ramah ga caili miedi.✝

14 Cu RAMPAUBE Rabe Saul dade tetdi, nah herakesia ge RAMPAUBE dade gwang eh pecu teikeherei di. 15 Saul gu kedimedung pe dage rangdi, "Ainie, herakesia ge Tinggwang dade gwang ncu teikeherei bam. 16 Peu anui mpaube de n kilame n dwaga kebamdungde de pecu leibung kwa keci pei ge peei kera aja kai gailo. Pecai herakesia Tinggwang dade kegwang nda kegwangdau, pa leibung kwagai eh nang yilu zie." 17 Saul pe kilamedung dage rangdi, "A ziemne leibung kwa cisüt kecuge de peeilu nah pecu a da ngngwa gwanglu." 18 Cidau rehangme ge keligai, "Ih Bethlehemme Jesse napei de ngau da, pa leibung kwa cisüt, ngkieng, kekuume ge, reugwame ge, marang kecime ge, hezu keyime ge; nah RAMPAUBE peda la." 19 Cine Saul samgwamedung Jesse dage langgai, nah rangdi, "N napei David meurün de pierengei kelabe de, a dage langgai lo." 20 Jesse gada ge gage tangku le pe püt teilu, teigeu zaula ge, nah hemeuna ge, nah cidungde pa pe napei David de Saul dage langgai. 21 Pecai David Saul da gwanglu nah pe gwa teidi. Saul pecu kusüt, nah pa hereunet kepwabe teidi. 22 Saul, Jesse dage sam langgai, "Peu David de a dwaga sap lo, kedanemene Ih pecu a sui kelune." 23 Tinggwang dade kegwang herakesia Saul reuga gwang kecudau, David leibung pwalu eh kwagai. Ciu eh Saul mcing nah yi dailu eh, herakesia pe dade tet dila.