1 Benjamin leuh gade, mina kemlangme ge bamla. Pe zi cai Kish, pa Abiel napei, Zeror napei, Bekorath napei, Aphiah napei, Benjamin leuhme ge. 2 Pa pe napei pe zi Saul lie kecu ge bam, pa au hezu yisüt kecu rehang pei ge. Israelme kakga migede pa kenzwa hezu keyi gede gah. Pe Israel ga mikedame swade pera teiki. 3 Tingnaige Saul pei Kish gadadung gahdi. Cine Kish pe napei Saul dage ranggai, "Nang kilame gede ngngwalwe mie gadadung de peeilo." 4 Cine Saul Ephraim hangdeutu nam nah Shalishah cuikui kahgwang, dede penai cidungde de ngaulu ma. Cine penai Shaalim deu kahgwang dede cidungde de gah. Pecai penai Benjamin leuhme deu kahgwang dede penai cika cidungde de ngaulu ma.

5 Cidau penai Zuph cuikui ga gwang luge, Saul pecu ngngwa kela pe kilabe dage rang eh, "Ko, anai cailidai cugo, mevai a pei gadadungde nsungtadi eh anaide pelung pang bamzie delu." 6 Dede kilabe keligai, "Ainei, namdi aika Tinggwang mina ge bam. Pecu mina leune rütla, pa kerang leune gwang kesangla. Anai cika miego; pa anai dailam ge tetgai maisia bi ranglia de cilak." 7 Cidau Saul pe kilabe dage rang eh, "Dede anai miecai, anai pecu dai teu gwang beulai? Kedanemene anai lamla ga taktyei bam meda, nah anai Tinggwang minabe de mapeu teugwang kera de gah. Anai da dai bamno?" 8 Kilabe Saul sam keligai, "Aika, ada rangkanggeu shekel zi mdai zi ge* bam, Ih cide Tinggwang minabe de peu zie, iciude pa anai dailam ge tetgai maisia bi ranglia zie." 9 (Ndaa Israel ga, mige Tinggwang maci peei miecai, pa rangla, "Ko, anui kemcime da miego." Kedanemene cidau caihakecime de kemcime lie qula.) 10 Cidau Saul pe kilabe dage rangdi, "Rang dauda. Ko, anai mie cugo." Cine penai Tinggwang minabe kebam namdi de ga miedi.

11 Cidau penai namdi be ga kideutu ga nghang ge, penai releimedung dui twak lai eh gwang kela ngaulu; Saul nah pe kilabe penui dage keteudi, "Kemcibe de bam mi?" 12 Penui sam keligai, "Yeo, pa bam; pa nnai dwasiak gala. Kelwalu, pa henai namdibe ga gwangla, kedanemene henai minadung heni kecehu ga ratak teilai eh kebamne. 13 Nnai namdibe ga lüt herizi pecu ngau luzie, pa heni kecehu ga hang matyei di kemakne. Pa gwanglu kemaktane minadung matyei lak, kedanemene pa ne ratak de samlam beu zielu; pecai ne qu kegaimedung matyei zie. Cu nnai hang culo, iciude nnai pecu ngau zette luzie." 14 Cine penai namdibe ga hangdi. Penai namdibe ga nlüt keladau, Samuel heni kecehu ga hang kerane penai taile gwangkela penai ngaulu.

15 Cu Saul gwang kemakdwa benai, RAMPAUBE Samuel dage liagai: 16 "Ncünne aipau tingdau Ih Benjamin deu gade mige de nda ge langgai zie, nah nang pecu a minadung Israel reu kedi tei kera keniak luzie. Pa a minadung de Philistinmedung ba gade kelibeu zie. Kedanemene Ih a minadung ngaunggia eh penui kengha kie kegai kwa siulu delu." 17 Samuel Saul de ngau luge, RAMPAUBE pe dage rangdi, "Ih ndage rang kebeu de aipau deda! Pa a mina reu kengkieng teulai eh kebambe deda." 18 Cidau Saul herieki ga Samuel taiga gwang keteudi, "Kemcibe de ki daiga bambi acu ranglia lo?" 19 Samuel Saul sam keligai, "Ih kemcibe da. Kecehu niga a dwarai hang cu, kedanemene nnai henai acu ngngwa matyei zie. Tingcang ne Ih nnai depeu tetzie, nah Ih nnai cet kebam pelane ranglia beuzie. 20 N Gadadung lang cumne gah kedidung de ziemne nlung keherei so, kedanemene cidungde de ngaulu delu. Ciude Israelme pelane keregui cau da bam no? Nang nah n kilungme Israelme pelane kereguibe delie Ih rang gaila." 21 Saul sam keligai, "Ih au Benjamin leuhme, Israel leuh gade heleuh ceutunabe, nah a kelak au cipau pautsa gade ceutunabe! Nang daitei a dage ainzwa rangzeu no?"

22 Pecai Samuel Saul nah pe kilabe de ngngwalwe kibung gega gwanglu, nah penaide peu hegiame kakga heni raitube ga bamlu, penui mina camrei kenzwa ge. 23 Samuel malangbe dage rangdi, "Ih ncu kaintsam lulo pwapeu kedi qwade pwa gwanglu." 24 Cine malangbe pe mnie nah cika kebamde Saul dwa gage kaibeu. Cidau Samuel rangdi, "Pielo, aide n ziemne kaipwa kebam deda. Tyei lu, cide peting riet pwa kebam de ga ncu peu hegiame de ngngwa tyei kerane n ziemne kainzeu delu." Cine Saul cipaunai Samuel de ngngwa matyei.

25 Penai kereca ni gade renam ga cailigwang luge, Samuel Saul de kireu ga ngngwa hanglu nah cika pe ziemne zeu ge mtei beu. 26 Pecai benai tingcang nuge, Samuel Saul kireu gage kebambe de qugai, "Cuhlu, Ih ncu n lampui gage langgai beuzie." Cine Saul cuhlu, nah Samuel penai puidiki ga ngngwa miedi. 27 Penui renam tu ga gwang luge, Samuel Saul dage rangdi, "Kilabe de anai dwa rai gwang culo rang beulo, nah cine pa tetnswadi, dede nang aika tingkakge bam maisia, iciude Ih Tinggwang sam n dage rang beulu kerane."