1 Pecai peting tie mene, Philistinme Israelme de ngngwa keregi kera gwang penui reugwamedung ngkwalu hereu tei kera. Achish David dage rangdi, "Kedanemene nang nah n minadung acu ngngwamie a lambie de keregi kera ci mci lulo" 2 David Achish dage rangdi, "Cine nang n kilame daipai teilu buibi nang ci luzie." Achish David dage rangdi, "Cine Ih ncu a pumkwame n tingbazie pelane tei kera tei luzie."

3 Cidau Samuel tsaidi da, nah Israelme pelane pe ziemne hap nah pecu pe namdi Ramah gage kungdi. Saul ketsaime mede rabedung de mpaukelame leune de hangdeu cikade kaamdi. 4 Philistinme penui katei gwang ngkwalwe Shunem nam gage ramzeuki teilu; nah Saul Israelme pelane de qu hekwalu, nah penui Gilboa deutu gage ramzeuki teilu. 5 Saul Philistinme reugwame de ngaulu ge ngngi di, nah pe lung mbeu sütdi. 6 Saul RAMPAUBE dade kengha ziemne kekie tei, dede RAMPAUBE pe mang gade de, mede Urim, nah mede caihakecime da dede pe kekie teibeu tadi. 7 Cine Saul pe kangme dage rangdi, "Acu reka mepui gede peei beulo, ciude Ih mie pe dade ma keteu zie." Pe kedime pe dage keligai, "Ainie, Endor ga mipui ge pa ketsaime de mpau lalie rangla."

8 Saul pekatei pe rehi teitsamlu, pai ketsambedung bahlu, delwe tingmui ge pa nah pe mina hangna de ngngwalwe mipui de da miedi. Pa rangdi, a ziemne rabe de mpau gailo, n dade kiela Ih, rang kebeube zi ada keugwang beulo. 9 Mipui be peda rangdi, "Peilo, nang hegwangpei Saul tei kegaide cika bamzie. Pa dainzwa ketsaime rabedung de kempau mede pa cipau deu gade kaamdibi kecu. Cine nang daitei eh a teilung keu hetak tei lano, acu teitsetdi kera cet lani?" 10 Saul pe dage sampetgai nah rangdi, "RAMPAUBE ring kelanzwa, nang ma aide tei kegai ne saja peu lak." 11 Pecai mipuibe rangdi, "Ih caude n ziemne qugai lai"? Saul rangdi, "Samuel de qugai a ziemne." 12 Mipuibe Samuel de ngau luge, pa sahbak eh mra pwa Saul dage rangdi, "Nang daitei eh a dage heciem tei lano? Kedanemene nang au Saul." 13 Hegwangpei pe dage rangdi, "Ngngi diso, nang daipai ngau bamno?" Mipuibe Saul da rangdi, "Ih rabe ge kideu gade cuhkela ngau bamlie." 14 Pa pecu rang eh, "Pa rehi dainkenzwa geno?" Pa rang eh, "Kecing pei ge cuhla, pa pai kedige bahla." Saul cide Samuel lie kecu cilu, nah pa pecu herüt peu eh pe zu hangdeu ga keumie di.

15 Samuel Saul dage rang eh "Nang daitei acu kebwak lano nah acu peu daitie eh cailigwang lano?" Saul keligai, "Ih au keherei süt kecuga la dida, kedanemene Philistinme acu ngngwa hereu teila dida, nah Tinggwang acu püt dida nah a kekie teibeu meda, caihakecime de, mede hemang lam de. Ciziemne Ih ncu qugai delie, ncu peu Ih daipai tei maisiabi acu ranglia gai kerane." 16 Samuel rang eh, "Nang daitei eh RAMPAUBE ncu gikedidau nah n ngauraube tei kedidau acu qu lano? 17 RAMPAUBE n dage tei zielie pa rangkebeu gade nzwa eh pa tei gaida. RAMPAUBE n ba gade hegwangram de keugi dida nah pa cide mi kedage de peu dida, David de. 18 Kedanemene nang RAMPAUBE kwa de mzailu meda nah pe lungka Amelekme dage teigai kemakne, ciziemne pa henai aide n dage teigai dida. 19 RAMPAUBE ncu nah Israelme de ngngwa Philistinme ba gage kaibeu dizie, nah ncünne nang nah n napeidung acu si eh bamdi zieda. RAMPAUBE Israel reugwame de Philistinme ba gage kaibeu zie."

20 Saul zette kau miedi delwe hangdeu ga zeumie bamdi kedanemene Samuel kerang samdungde ne pecu keheudi kecune. Kedanemene pa tingmuizie pelane, nah tingbazie pelane matyei ta kedine, peda kengkieng gah di. 21 Mipui ge Saul da gwang ge pecu keheu pwa kebam ngaulu, pa pe dage rangdi, "Pielo, n kilabepui n kwa ngking luda; Ih a teilung kengngi gage kaibeu dida nah nang n samdung acu rangkelia de ngking luda. 22 Cu ciziemne, Ih n dade kiela, n kilabe pui kwa kingnei gailo, nah acu peu taktyei ndwa ga kecam nage telei gailo. Kedanemene nang ma tyeilu eh n kengkieng ngau dailwe nang n lampui ga tetmielu kerane." 23 Dede Saul laklie di nah rang eh "Ih ma tyei lak." Dede pe kilamedung, mipuibe de nzang, pecu ma tyeilo ketangbi di, nah pa penui kwa mneilu. Cine pa hangdeu gade cuhlu delwe zeu ga ntum bamlu. 24 Mipuibe de heki ga ketumna gui hemitu kebamde; zette pa daptset lu. Pecai pa tokkui, kesa keulu, teleilu, delwe cehi si mene tangku rulu. 25 Pa Saul nah pe kilame de pwagwang beu, nah penui cide tyeilu. Cidau penui cuhlu delwe cipau ziu tetdi.