1 Lang cumne cai David nah pe minadung Ziklag namdi ga gwang dailu, Amalekme Negev ngkanglebie gwa eh Ziklag gwaketang eh, renam ru ngkapdi, 2 nah cika kebam mipuidung nah keceu kedi mina pelane de tuilu. Penui migede de teitset dima, dede penui tet kecudau penuide ngngwalwe tetdi. 3 Lang cumne benai David nah pe minadung namdi ga gwang luge, cide renam de ru kedi ngaulu, nah penui naudung, penui napeidung, nah penui napuidung de ngngwa tetkedi ngaulu. 4 David nah pe minadung pecu ngngwakelame penui kwa sah eh hapdi nah penui kengkieng gahdi kemaktane hap bamdi. 5 David nau kena Ahinoam Jezreel mepui nah Abigail Nabal nau Carmel mepui de kecang de ngngwa tetdi. 6 David pe lung keherei sütdi, kedanemene minadung pecu tangtsu pwasam kera rang kebamne. Kedanemene mina pelane, keheibede pe napeime nah pe napuime ziemne penui lung siasüt kedine. Dede David RAMPAUBE pe Tinggwang ne pe katei pecu teingkuu beu.

7 David Ahimelech napei cingkupei Abiathar dage rangdi, "Ih n dage kiela, acu hekeutu pai de keugwang beulo aziemne aika." Abiathar David da hekeutupai de keugwangbeu. 8 David RAMPAUBE dade puisau cilu kerane, kiegai, "Magade Ih penuide zuimie liecai, Ih penuide ngamlu buini?" RAMPAUBE pecu keligai, "Penuide zuimie cu, kedanemene nang penuide ngambi lubui nah nang ma pelane ngaudai bi luzie." 9 Cine David mie, pa nah minadung hai herok pecu ngngwalwe tetpet; penui Besor reuki ga gwanglu, ge midungge cika bamdi. 10 Dede David zuimie la, pa nah mina hai mdai de ngngwa eh; mina haina be Besor reuki de kahpet kera penui mneizu kedine cika bamdi.

11 Penui Egyptme ge luh gala eh ngaulwe David da ngngwa gwang, penui pecu tangku peu eh pa tyeilu nah penui pecu dui sak kera peu; 12 nah penui pecu tangjüttsi le tangku ru kelube kena peu. Pa cide tyei luge, pe kengkieng gwang dailu, kedanemene pa lang cumne tingmui tingba matyei masak mene bam kedine. 13 David pe dage rangdi, "N mpaube cauno? nah nang daiga de gwang lano?" Pa rangdi, Ih au Egypt rehangme ge, Amalekme ge kila lie. Kedanemene Ih mateeidi kecune a mpaube acu gikedi lang cumne dida. 14 Anui Judah deu, Kerethme gu Negev nah Caleb gu Negev deu gwa dida nah anui Ziklag deu ru dida. 15 David pe dage rangdi, "Nang acu renam gwa kecume da ngngwamie beuzie mi?" Egyptme pei de rangdi, "Nang Tinggwang zi gade acu teitset laklie kecu mede acu a mpaube ba gade kaibeu dilak lie kecu n sam pet lucai Ih ncu ngngwa nghung beuzie."

16 Nah Egyptme pei David de ngngwamie keludau, renam gwa kelume heni pelane ga gumpung eh matyei, sak nah helim lim bam, kedanemene penui Philistinme penai Judah deu gade hemaa pelane tuikiee süt kelune. 17 Pecai benai tingcang gade David penuide gwaketang eh tinghegi kecang penuide ngngwa keregi. Rehangme hai mdai utdung reuga kelame paktet kedigwale, penui migede pak mbai luma. 18 David Amalekme teutet kedi leune keukeli dailu; nah David pe nau kenade si eh kelilu. 19 Ma gede gah dima, hename de mede kecingme liede, napeidung mede napuidung liede, mede hemaa tuiteu kedi liede, mede gwa kelamedung penui ziemne keuteu kedidung keheibe de. David cidung pelane keugwang dailu. 20 David meurün haudung nah hetum haudung pelane de ngaudailu. Pe minadung penui dwa gage penui kaunedung de gwa eh rangdi, "Aide David gu."

21 David mina haina ge mnei zudi eh pe caisui pa kedime da gwanglu, Besor reuki ga peu bam kedi medung de. Mina aipaudung de David de redau kera tetpet nswadi nah mina pecu de ngngwa kebamme. David mina aidungde da gwang ge, pa penuide kelumgai. 22 Cidau kesiame nah lui kemakme David de ngngwa kemieme kakgade rangdi, "Mina aidungde anuide ngngwamie ma, anui penuide matui kelube kette peulak anui ngaudai kelube. Mina keheibe de pe nau nah pe name de gwalie keu gailak ngngwalwe peu penuide tetdi." 23 Cidau David rangdi, "Nnui ainzwadi kerabe ma, a sinamedung, RAMPAUBE anuide kepeude teu eh. Pa anuide peu kwaklu nah anui ba gage kai beuda anuide renia kelame reu ngkiengkelu peuda. 24 Caune nnui kwa kingnei zieno aipau hade ga? Pelane hereu ga kemieme lie nsam maisia cinzwa taktyei nia kwa eh bam kedime lie de nsam zie." 25 David aide le hezai ge teidi, nah cide cipaunai gwale gade henai kecang de Israel ga hezai cide mzai ladi.

26 David Ziklag ga gwang luge, pa hemaa tui kelube kesa Judah ga hangkiame de langgai, pe zangme de, rang eh, "Ainie, aika RAMPAUBE ngauraume dade tuikelu gade nnui ziemne mta mapeu ge la." 27 Pa Bethel ga kebam hangkiame dage de ma kesa langgai, nah Ramoth tingbangle kebam minadung dage de, nah Jattir ga kebamme dage de, 28 nah Aroer ga kebamme dage de, nah Siphmoth, Eshtemoa kebamme dage de. 29 Pa Rakal ga kebamme dage nah hangkiame dage kesa langgai beu, nah Jerahmeelme namdi ga kebamme dage de, nah Kenitme namdi ga kebamme dage de, 30 nah Hormah, Bor-Ashan, Athak ga kebamme dage de, 31 nah Hebron ga kebamme dage de, nah heni pelane David nah pe minadung mie bam kela ga.