1 Pecai David Nob namceu ga cingkupei Ahimelech de pie kera gwang. Ahimelech David de mbeu eh redau nah peda rangdi, "Nang daitei nkatei rünne nah migede si mene gwang lano?" 2 David cingkupei Ahimelech dage rangdi, "Hegwangpei ne acu bata tei kerane langgai lie, nah pa a dage ranggai, ‘Ih ncu lang kegaide migede de peu ci helo, nah Ih aja kai kebeude.’ Ih penuide heni ge gade acu redau lulo beu dida. 3 Cu ciucai n ba ga dai ge bam no? Acu tangku kwak mengei peu lo, mede keheibe aika kebam be." 4 Cingkupei, David de keligai nah rangdi, "Tangku kedabe a ba ga bam meda, dede cika kemci tangku bam, magade nang nah n minadung nnui katei de mipuidung dade kai ntsam pwabam cai." 5 David, cingkupei de keligai, " Langcumne ge mipuidung de anui dade keu ntsam pwabam kesang, anui tetpet kecudau tei bammui kelade nzwa. Nlang ham kemak bata ketei dau de a mina niadung keu ntsam pwa bamla. Daikenzwa ge henai au mide tei mci pwabam maisia zie bi!" 6 Cine kai ntsam pwa kebam tangku de cingkupei pecu peudi. Kedanemene cika tangku keda gahdi, pebam cikage tangku keumpet kedi benai peu kelumbe tangku kailu kerane, RAMPAUBE dwa gade keumpet pwa kebam Kaikenzeu Tangku rünne gwale.

7 Cu Saul kilame hangge cipaunai cika bam, RAMPAUBE dwaga bam. Pe zi Doeg, pa Edomme, Saul gu tumkwa ditube. 8 David Ahimelech dage rangdi, "Nda hengei ge mede kingtie gede bam mi? Ih kingtie mede hereunia gede keu gwang meda, kedanemene hegwangpei ta de tei zette maisia kedine." 9 Cingkupei rangdi, "Nang Elah langkam gade teitset kegaibe, Philistinme Goliath kingtie, hekeutupai caiga dumgai pwabam. Nang cide luu neucai keulu, kedanemene hereunet cide rünne aika bam." David rangdi, "Cide kenzwa kingtie keda gah da; acu cide peulo."

10 David cipau nai cuhlu delwe Saul dade pakdi nah Gath namdi ga, hegwangpei Achish taiga miedi. 11 Hegwangpei Achish kilame pe dage rang eh, "Aide David meni, aipau deu ga hegwangpei? Israelme puidung pe ha ziemne hangge ge dage leitei eh helim lim meni?

‘Saul mina cang cang teitset lu,

nah David mina cang kereirei teitset lu?’"

12 David aipau samdung de pe mlung gage kailu nah pa Gath ga hegwangpei Achish de hing sütdi. 13 Pa pe zaireli penui taiga de tei ntsam di nah pa cangta kedi ciem tei bamdi; pa kirie kikamdung gage marau nah peu pe ntam pe tangkeimai ga zaumie bamdi. 14 Pecai Achish pe kilamedung dade rangdi, "Ainie, mina be au miee dida. Daitei eh nnui pecu ada ngngwa gwang lano? 15 Ada kemieeme gah ni, aipaude de kemieme ge nzwa a dwaga ngngwa gwang kera? Aikenzwa gede peu a hegwangki ga lüt zieni?"