1 Hannah kekie tei eh rangdi,

"A nlung RAMPAUBE de twabam,

A kii RAMPAUBE dage pwa cuh luda.

Ih a ngauraume dade hegiela,

nang kelikebeu de ga a suiyi kebamne.✝

2 Migede RAMPAUBE nzwa mci ma,

Nang kenzwa migede gah;

Anui Tinggwang kenzwa tsura keda gede gah.

3 Hegie eh ngang sütla tadi lu;

Nnui mui gade ngang kela samdung pet ta dilu.

Kedanemene RAMPAUBE au maci Tinggwang;

Pa ne heta leune mdetla.

4 Reugwame lakpi cum dida,

dede kemneime de tei ngkieng beula.

5 Nggei kelame taktyei ziemne penuikatei penuide li teula dida;

Mzeu kelame mzeu si meda.

Nagah pui pe na hang hena mna luda,

dede hename kekiee ge kebam pui nnei dida.✝

6 RAMPAUBE ketsai nah kering teugwang beula.

Pa ketsaime deu gage ngngwa gai nah teucuh dai beula.

7 RAMPAUBE midung gede peu magah nah midung gede tei mahei beula.

Pa midung tei hena dila, dede pa midung gede teucuh dai beula.✝

8 Pa kegahme de rebui gade teucuh lula.

Pa naang kelame de ralie tum gade teucu beula,

penuide peu hegwang namedung de ngngwa bam kerane,

nah kerüt bam de gumlu kerane.

Kedanemene kideube tsiangdidung au RAMPAUBE gu

nah pa cidung reu gage kideube teilu.

9 Pa pe mina masang kelame de gum beuzie,

dede kenlienme de kemui gage kai zing dizie,

Migede pe kengking le ngkieng gailak lu.

10 RAMPAUBE de renia kelabe de ngkap dizie;

pa penuide mmau eh tinggim gade tingceu gaizie.

RAMPAUBE kideu pelane tutiak zie;

pa pe hegwangpei de kengkieng peuzie

nah pa keniak kelube gwangpei kii pwacuh beuzie."✝

11 Cidau Elkanah pe ki Ramah ga gwangdi. Henana be cingkupei Eli kang gade RAMPAUBE gwatei bamdi.

12 Cu Eli napeidung au kemta kaudung ge. Penui RAMPAUBE de cima. 13 Cingkumedung mina dage teikela zaide cai, mi keheibe de ratak tei kegaidau, cingkupei Eli napeidung kilabe hegeutia pe peutie-kecum tei kecu ge pwalwe gwangla. Ratak tei kera teih lang nswak kebam dau, 14 kilabe hegeutia de keheta li, mede cikia li, mede lidi, mede ma li gage keci gaila. Hegeutia de keci mpet kelube cingkupei pe ziemne keu lula. Penui aide Israelme reca kera Shiloh ga gwang kecume leune dade ainzwa teila. 15 Cipau reude, penui pecaa ru kecu dwa, cingkupei kilabe gwang eh ratak tei kebambe pei dage rangla, "Cingkupei ziemne heteih rubeu kera peulo; kedanemene nang heteih lang kedibe pa luu laklu, dede kengeube rünne luu zie." 16 Magade ratak tei kebambe pe dade, "Penui pecaa ru rai maisia, nah pecai ne nang keu keneu kiee ge keulu," de eh rangcai, pa rangzie, "Lak, nang cide acu cu peuzie; mecai, Ih n kemei tei eh cide keu luzie." 17 Eli napeidung mau RAMPAUBE dwade di zudi, penui RAMPAUBE de reca teikebeu de rütta kedine . 18 Dede Samuel hename ge liede langcim le teikelu hekeutupai *teu eh RAMPAUBE gwatei bamdi. 19 Pe pui pe nahpei de ngngwalwe mmi ramsang kum ratak tei kera hang kecudau, pe ziemne cwatie keceu nage teilwe mmi ramsang kum pecu keugwang beula. 20 Eli Elkanah nah penau de samlam beu eh rangla, "RAMPAUBE de peu aipau puide dade, pa RAMPAUBE de peu kedibe ding tei eh hena kekiee peusi kelube teilo." Pecai penai penui kilung ga cailigwang dila. 21 RAMPAUBE Hannah de ngha daibeu, nah pa tetlak dailu. Pa mipeina hangcum nah mipuina hangna lungh silu. Cidau, hena nabe Samuel RAMPAUBE dwa gade ngkieng cuhdi. 22 Cu Eli cing sütdi; pa pe napeime Israelme pelane dage tei kebam leune siulu, nah penui Tinggwang kebam paiki kimui ga hegwa teibam kela puidung de ngngwa zeu kela cibam. 23 Pa penui dage rangdi, "Nnui daitei cidungde teila no?" Ih mileune dade nnui heta kesia tei kebam siubam dida. 24 Nnui tei sita dilu, a napeidung; Ih siu kebam de sam keyibe ma. Nnui RAMPAUBE minadung de peu kemau tei bam dida. 25 Mige kedage dage kemau teigai cai, Tinggwang pe tutiak zie; dede mige RAMPAUBE dage kemau teigai cai, caune pe lamsap beulai?" Dede penui penui pei kwa kingnei tadi, kedanemene RAMPAUBE penuide teitset di kera pe lungning kedine. 26 Hena nabe Samuel ngkieng cuhlu, nah RAMPAUBE nah mina suiyi teilu.✝

27 Cu Tinggwang minabe Eli da gwang eh pe dage rangdi, "RAMPAUBE rangla, ‘Ih n paume *dage, penui Egypt ga Pharaoh kangga hebaang tei keladau acu peu ngaugai meni?’ 28 Ih Aaron de Israel leuh pelane kakde peu a cingku tei kerane kedetlu, a recabam ga nghang kera, marim kehengui ru kera, nah hekeutupai a dwaga teu kerane. Ih n pau kilungme de Israelmena keru ratak tei kegai leune peu da. 29 Ciciucai, nang daitei Ih lungh kebam ga Ih teu mai kesia a ratakdung nah recadung hengim lano? Nang daitei n namedung de acu swa rütki eh a mina Israelme reca tei kebeu keyi leune teu nnui luiyi bamno? 30 Ciziemne RAMPAUBE, Israel Tinggwang, rangzeu, ‘Ih n kilungme, nah n pau kilungme de peu kelungta a gwatei kera sampet gaida.’ Dede cu ‘RAMPAUBE rangzeu, ‘Ciciude Ih cide tei lakda, kedanemene Ih acu rüt kelame de rüt zie, dede acu nlai kelame de nlai zie. 31 Pielo, Ih n kengkieng nah n pau kilungme kengkieng dangdi kera peting ge gwangla dida, iciude n pautsame kecingme migede gah dizie. 32 Ih lungh kebam ni ga nang lungrei ngau zie. Israel de lung keyi peu liede, n kiga kecingme migede gah dizie. 33 Ih a recabam gade dangdi kemak keheibe de peu pe miak siadi zie, nah pe teilung lungrei le puizie. N kelak ga mina lungh kelu leune tsai dizie. 34 Aide n napei kena, Hophni nah Phinehas da gwang kera n ziemne marengei ge zie: penai tingnai ge gage tsai dizie. 35 Ih a ziemne samsang kecu cingku ge, a kecet nah a nlung suibe teibeu kera gede teucuh luzie. Ih pe kelak tei ngkieng beuzie; nah pa Ih keniakkelu hegwangpei dwa kelungta hegwa teila zie. 36 N kelak ga bang kebamme leune gwang pe dwa keumie rangkanggeu nah taktyei kie eh rangzie, "Nggia eh acu peu cingkume de kenghame teilo, ciude Ih tangku gede tyeilu kerane."’"