1 Cidau Samuel macabung ge pwalwe cide Saul peu gage ruigai, nah pecu kemam gai. Pa rangdi, "RAMPAUBE ncu peu pe mina Israel reu kedi tei kera keniaklu de meni? * 2 Nang henai acu pütdi eh tetde, Benjamin deu Zelzah lie qu kela ni ga Rachel rau tai gade nang mi hangna de redau zie. Penai n dage rangzie, ‘Nang gada peei keladung de ngau luda. Cu n pei gadadung de ziemne pelung pang meda, nah n ziemne pelung pang eh keteu, "Ih a napei ziemne dai tei zieno ?"’ 3 Pecai nang cikade tet jüja mie zie, nah nang Tabor heni ga mhu bang de ga gwanglu zie. Nang cika de mina hangcum Bethel namdi ga Tinggwang da miekela redau zie, hangge hemeu keceuna kecum pung lazie, kedage tangku kwak cum pung lazie, nah kedage cai teigeu la zau pung lazie. 4 Penui ncu kelum zie nah ncu tangku kwak kena peu zie, nang cide penui ba gade keu luzie. 5 Cipau cai nang Tinggwang deutu ga gwang zie, Philistinme reugwame kebam ni ga. Nang cipau namdi be ga gwang kelu dau, nang caihakecime heni kehu gade penui gu harp ge, kehediang bung ge, terwaine ge, nah lyre penui dwa pwa lwe nghung kela dau hema gede dauzie; penui caihasam rang bamzie. 6 RAMPAUBE rabe nreu ga zette gwang zie, nah nang penuide ngngwa caihasam rang zie, nah ncu kedipwa mi kecamme ge dizie. 7 Cu, marehi aidungde nda gwang lude, n ba tei kera leune kengaube tei lulo, kedanemene Tinggwang ncu ngngwabam kelane. 8 Gilgal nam ga a dwarai nghung bamlu. Cidau Ih n taiga keru recadung teibeu kera nghung zie nah lungciep ratak recadung. Lang hena ne kwa bamlu Ih nda gwang eh nang daipai tei maisiabi ncu sauliabeu kemak tane."

9 Saul Samuel dade tetnreu dige, Tinggwang pecu nlung keheci ge peu. Cidau aidung pelane marehidung cipaunai teigwang cangdi. 10 Penui kideutu ga gwang luge, caihakecime maa ge pecu redaulu, nah Tinggwang rabe pe reuga kelwa gwangdi ciude pa penuide ngngwa caihasam ranglu kerane. 11 Ndaa pecu cibam kela leune pecu caihakecime de ngngwa eh caihasam rang kebam ngau luge, minadung hangge ge da rangdi, "Kish napei de dai teidi dino? Saul cu au caihakecime ge di deni?" 12 Mige heni cika lungh bam kelame ge keli eh cuh, "Ciucai penui peidung cau gamme kerabe no?" Kedanemene aide ziemne, ainzwa rangla di "Saul de caihakecime mi hangge deni?" 13 Pa caihasam rangcang dige, pa heni kecehu ga nghang di.

14 Cidau Saul pei sinabe pecu nah pe kilabe dage rang eh, "Nnai daiga miela no?." Pa samkeli eh, "Gadadung de peei la. Anai cidung de ngauluta dige, anai Samuel da mie." 15 Saul pei sinabe rangdi, "Samuel ncu dai ranglia bi kehereide acu ranglia lo." 16 Saul pe pei sinabe samkeli eh "Gadadung de ngaulu de lie kecu pa anaide pecu ranglia mcibeu." Dede hegwangram ha Samuel kerangde pa pecu ranglia ma.

17 Cu Samuel minadung de RAMPAUBE dwa Mizpah ga ge qu hekwa lu. 18 Pa Israelme mina dage rangdi, "RAMPAUBE, Israel Tinggwang ainzwa rangla: ‘Ih Israelme de Egypt gade ngngwampet lu, nah Ih nnuide Egyptme ba gade kelilu, nah nnuide tei keherei kela hegwangram pelane ba gade kelilu.’ 19 Dede henai nnui Tinggwang de püt dida, Pa nnuide kehereiting nah lungreidung pelane gade kelibeu; nah nnui pecu rang eh, ‘Anui reuga hegwangpei ge tei beulo.’ Cu nnui katei RAMPAUBE dwaga pe leuh rip nah pautsa rip tei eh ngkwalu." 20 Cine Samuel Israel leuhme pelane de ngngwa gwang nnalu, nah Benjamin leuhme de kedetlu. 21 Pecai Samuel Benjamin leuh de penui pautsadung gade ngngwa gwang mnalu, nah Matri pautsa de kedetlu; nah Kish napei Saul de kedetlu. Dede penui pecu peei kemiedau, pecu ngaulu tadi. 22 Cidau minadung Tinggwang dage madung keteu si neudi, "Mi keda cude gwang kera bamreu ni?" RAMPAUBE keli eh, "Pa pekatei pecu maniadung kakga kebaih pwabam." 23 Cidau penui pakmie Saul de cika de teu gwanglu. Pa mina kakga sap kegaidau, pe hekeutu nreu gade Israelme swade huki di. 24 Cidau Samuel minadung dage rangdi, "RAMPAUBE ne kedet kelube minabe de nnui ngau mi? Mina leune kakgade pa kenzwa cika migede gah!" Mina pelane sahgai, "Hegwangpei depeu ringtie lo!"

25 Cidau Samuel ranglia minadung dage hengwangme ge teikela zaidung nah hezaidung, laisiukwak ge gage cidungde raulu, nah cide RAMPAUBE dwa gage kaidi. Samuel pecai mina pelane de langgi di, mina hange ge de pe ki riep gage langgai di. 26 Saul de pe ki Gibeah ga gwangdi, nah mina kengkiengme, penui nlung Tinggwang ne tung kegaime, pecu ngngwa nzang miedi. 27 Dede minadung kesiamedung kangge rangdi, "Dainzwa mina aipau de anuide kelilu lai?" Mina aidung de Saul de mlaidi nah pecu mta mapeudung gede teu gwang beu ma. Dede Saul nlei ma.