1 Cu Philistinme penui reugwame pelane de Aphek namdi gage qu hekwalu, nah Israelme Jezreel ga duilet ge gage ramzeuki teilu. 2 Philistinme gwangpei minadung pe hai nah pe cang de ngngwa tetpet, David nah pe minadung pe cailebie Achish de kekwame de ngngwa eh tetpet. 3 Pecai keda Philistinme hegwangnadung rangdi, "Hebrewme aidungde aika daipai tei lano?" Achish, Philistinme hegwangna kedage dage rangdi, "Aide David meni? Saul kilabe, Israel gu hegwangpei, pa pe ting ketiege acu ngngwala dida, nah pa a da gwangkelu gade henai kecang Ih pe dade kemau gede ngau luma?" 4 Dede Philistinme hegwangna Achish de penui rata eh rangdi, "Cipaude de langcaili dilu, nangne kepeu heni gage pecu langcaili dilu, pa anuide ngngwa hereuga mielak, kedanemene hereu keteidau pa anuide renia cuhdi lubui. Kedanemene pa pe mpaube suiyi ngaudailu kera lampui aiswade pe ziemne lampui keyi daipai bamno? 5 Penui hangge ge dage rangdi, helim lim eh David dage lei tei bamla kebambe aide de meni,

‘Saul mina cangcang de gilu,

nah David mina cang kereirei de gilu?’" de rang eh.

6 Achish David de qulwe pe dage rangdi, "RAMPAUBE ring kelanzwa, nang masangla, nah nang hereu ga acu ngngwamie kera nah nang ngngwa gwang kera aide a suiyi da; Kedanemene nang a da gwangkelu benai gade henai kecang Ih n dade kemauge de ngau luma. Dede hegwangna kedame ncu pe suilu meda. 7 Cine n lungciep gade mie cu nah cailigwanglu, ciude nang Philistinme hegwangna suisiet tei dilak." 8 David Achish dade rangdi, "Dede Ih daipai tei dino? Ih n kilabe n da gwang kelubenai gade henai kecang kemauge de ngaulu meliecai, Ih daitei ncu a mpaube nah a hegwangpei de ngngwa mie eh ngauraume de regi melaino?" 9 Achish David sam keligai nah rangdi, Ih a lambie de au ncu Tinggwang samgwame ge nzwa eh n mauge de kegah Ih cibam; Philistinme hegwangna rangdi, Pa anuide hereu ga ngngwamie lak dedi. 10 Cine n mpaube kilame ncu nzang kegwangme de ngngwalwe tingcang cuh zilu; nah nang cuh zilulwe tingcang ting baapet de, tet dilu. 11 Cine David nah pe minadung, pecai benai tingcang nuge culwe Philistia ga cailigwang kera tetcuh di, dede Philistinme Jezreel gage hereu ziemne tetgai di.