1 Samuel sam Israel pelane da gwanglu. Cidau Israelme Philistinme de ngngwa hereu tei kera miedi. Penui Ebenezer namdi gage ramzeuki teilu, nah Phiilistinme Aphek namdi gage ramzeuki teilu.

2 Philistinme, Israel de ngngwa hereu tei kera sap bialu. Hereu teicuh ge, Philistinme Israel reu ngamlu, nah mipei cang mdai gede reutakbam gade teitsetdi. 3 Reugwame ramzeuki ga gwang luge, Israel muiteume rangdi, "Daitei RAMPAUBE henai peu Philistinme de anuide ngamdi no? Anui RAMPAUBE samkakbung de Shiloh gade aika pwa gwang lugo, iciu eh cide aika anui taiga bamlu nah cide anui ngauraume ba gade anuide kelilu kerane." 4 Cine penui mipeidung de Shiloh gage langgai; cikade penui Reugwame reu RAMPAUBE samkakbung de pwalu, cherubim kena kakga kebam de. Eli napei kena, Hophni penai Phinehas cika Tinggwang samkakbung de taiga bam. 5 RAMPAUBE samkakbung de ramzeuki ga gwang luge, Israelme pelane penui suiyi kwa sahbak gai, ge hangdeube nlaidi. 6 Sah kebam kwade Philistinme siu luge, penui rangdi, "Hebrewme ramzeuki ga sah kebam kwade pekie daino?" Cidau penui RAMPAUBE samkakbung de ramzeuki ga gwangbam kedi cilu. 7 Philistinme ngngidi eh penui rangdi, "Rabe ge ramzeuki ga gwang luda." Penui rangdi, "Ainei, anui da keherei gwang zieda! Pedwa aikenzwa madau gede teima!" 8 Ainei, anui da keherei gwang zieda! Caune anuide cipau kengkieng rabedung de ba gade kelibeu lai? Cidungde Egyptme de hetaideu gade keherei ketsamtsam le ngkap kecu rabedung de da. 9 Kuulu, nah mipei nzwalu, nnui Philistinmedung, mecai nnui Hebrewme baang tei zie, penui nnui baang tei kecu nzwa. Mipei nzwa regilu. 10 Philistinmedung regi eh Israelme de ngamlu. Mipei leune penui ki gage pak gaidi, nah kekiee gede daptsetdi; Israel hepi reugwame cang camrei ge kaudi. 11 Tinggwang samkakbung de tui teudi, nah Eli napei kena Hophni penai Phinehas tsaidi.

12 Benjamin leuhme pei ge reutakbam gade Shiloh gage pakgai eh cipaunai gage gwang cika canglu. Pe lungrei keulia kerane pe paini hietdi delwe pe peu ga tangnia kailu. 13 Pa gwang cang luge, Eli Tinggwang samkakbung de ziemne pelung keherei eh lampui kungga pe bam ga ntum eh piebam. Cidau minabe namdi ga lütlwe sam paubeu, ge namdi ga minadung pelane hap cuhdi. 14 Eli kehap kwa siu keludau, pa keteudi, "Aipau mra kwade daino?" Mipeibe zette gwang Eli de gwang paubeu. 15 Cu Eli mmi riakhekui-hesetdi; nah pa pe miak mneidi eh mangau tadi.

16 Mipeibe Eli dage rangdi, "Ih reutakbam gade gwang kelabe de delie. Ih henai hereu gade pak gwang luda." Eli keteugai, "Dai nzwa dino, a napei?" 17 Sam pau kebeube peide keligai, "Israelme Philistinme dade pak dida. Nah mina kekiee gede ngkap dida. Cirünne mene, n na kena, Hophni penai Phinehas de tsai dida, nah Tinggwang samkakbung de tuiteu pwa dida." 18 Pa Tinggwang samkakbung ha rang kegai dau, Eli herieki taiga pebam gade kau tanglet miedi. Pe ngwang cumdi eh pa tsaidi, kedanemene pa cingdi nah pe zierüt kedine. Pa mmi riakdai ge Israel tutiak teigwang.

19 Cu pe napei, Phinehas nau, tetlak bam nah mna kera tingdi. Pa Tinggwang samkakbung de tui pwadi lie kecu nah pe pau penai pe nahpei tsaidi lie kecu sam siu luge, pa koktung mielwe mnalu, dede pe mna tetteei de teei zudi. 20 Pa tsaidi lai zeuge, pecu rengei kebam puidung rangdi, "Ngngi so, nang mipeina gede mna luda." Dede pa sam keli mede penui rang kebamde gage pelung kailu tadi. 21 Pa henabe zi Ichabod* msiaklu, "Kendu Israel dade tet dida!" de rang eh, Tinggwang samkakbung tuiteu kedine, nah pe pau penai pe nahpei tsai kedine. 22 Pa rangdi, "Kendu Israel dade tet dida, kedanemene Tinggwang samkakbung de tuiteu kedine."