1 Pa Saul dage ma rangcang dige, Jonathan keringria David keringria da ncütdi, nah Jonathan pecu kupwa pe keringria de keku nzwadi. 2 Cipaunai Saul David de ngngwa pegwa teidi; pa pecu peu pe pei ki ga cailigwang tadi. 3 Cidau Jonathan nah David zangna tei kera sampet teilu kedanemene Jonathan pecu kupwa pekatei pe keringria de keku nzwa kedine. 4 Jonathan pe nia pa teu kelade gau mpetlwe David de peu, pe reunet, kingtie, lakpi nah kiakang de si eh. 5 David Saul pecu lang kegai leu ga mie, nah pa ngkieng lu. Saul pecu hereu keteime reu gage kaibeu. Aide mina pelane miakdwade suiyi teilu nah Saul kilame dwade de.

6 Penui Philistinme de ngam lwe gwang keladau, Israel namdi leune gade mipuidung leitei nah helim lim eh hegwangpei Saul de dau kera gwang, tambourinedung kwa eh, penui suiyi eh nah leibungdung kwa eh. 7 Mipuidung nggwa eh hangge ge dage leitei gai. Penui leitei gai:

"Saul mina cang cang teitset lu,

nah David mina cang kereirei teitset lu."

8 Saul pe rata sütdi, nah lei aide pe suisiet tei di. Pa rangdi, "Penui David de cang kereidung de rang bam, dede acube cang rünsangne. Pa dai ge teumai siareu ah hegwang ketei de si mene?" 9 Saul cipaunai gade David de mning msia eh piedi.

10 Pecai benai hera kesia Tinggwang dade zette Saul da gwang di nah pa kilung ga kemieme ge nzwa sah bakbak bam di. Cine David pe leibung kwa gai, pa langnai ramsangne tei kebam nzwa. Saul pe ba ga hengei ge bam. 11 Saul hengei de hiagai, "David de tangdeu gage hiagim dizie" de pa cet. Dede ainzwa eh David, Saul dwade pia na paklu. 12 Saul au David de hing di, kedanemene RAMPAUBE au peda la, dede Saul de ngngwa lasi tadi. 13 Cine Saul pe dwa de pecu keu mpetdi nah peu mina cang reu muibe tei kera kedetlu. Ainzwa eh David hereu teikera tetpet nah ngkiengkelu teu eh pe minadung da cailigwanglu. 14 David pe lampui leune ga yilu, kedanemene RAMPAUBE peda kelane. 15 Saul David yi kedi ngau luge, pa pe ma cangh sütdi. 16 Dede Israelme nah Judahme pelane David de hungdi, kedanemene pa hereu teikera pet ge ngkiengkelu teu eh pe minadung da cailigwang kelune.

17 Cidau Saul David dage rangdi, "Aika a napui cingtube Merab bam. Nnau kera Ih ncu peu zie. A ziemne kuulu nah RAMPAUBE hereudung regilu." Kedanemene Saul cet kecu, "Peu a ba lepwa pe reu gage kai diso, dede Philistinme ba de peu pe reu gage kailu." 18 David Saul dage rangdi, "Ih cau no, nah a kibaumedung cau no, mede Israel ga a pei pautsa, peu acu hegwangpei napui nahpei lu kera?" 19 Dede Saul napui Merab de, David de peu kerating di ge, pecu Meholahme Adriel nau kera peu di. 20 Dede Michal, Saul napui henabe, David de mrai di. Penui Saul dage ranggai nah aide pa pe suilu. 21 Cidau Saul cet di, "Ih Michal de pecu peu zie, ciude pa baih ge luzie pe ziemne, nah iciu lude Philistinme ba pe reu gage kailu kerane." Cine Saul David dage pe kenabe rang, "Nang a napui nahpei zie."

22 Saul pe kilamedung dage aja kaigai, "David de ngkim eh resiu lu, nah aiciu eh ranglu, ‘Ainie, hegwangpei ncu pesui yibam, nah pe kilamedung pelane ncu hung lie. Cine cu, hegwangpei napui nahpei tei di lulo.’" 23 Cine Saul kilamedung sam aidungde David dage ranggai. Cidau David rangdi, "Hegwangpei napui nahpei tei kera makeceuna ge ni nnui ziemne, Ih au makegahme ge kecune, nah mi ne mning hena kelame?" 24 Saul kilamedung David kerang samdung Saul dage paulia. 25 Cidau Saul rangdi, "David dage aide ranglo, ‘Hegwangpei au hemeupui mi magede luuneu ma Philistinmedung haige gu geutün gwale, hegwangpei ngauraume dade hekumpeeilu kerane.’" Cu Saul David de Philistinmedung ba gade peu kaudi kera cetdi. 26 Pe kilamedung David dage sam aidung ranglia ge, David hegwangpei tsapei kera pe sui yidi. 27 Tingba cidungde cangdi kemakdwa, David pe minadung de ngngwa mie nah Philistinme haina de gilu. David penui geutün keugwang, nah penui ci pelane hegwangpei de peudi, iciu eh pa hegwangpei napui nahpei lu kerane. Cine Saul pe napui Michal de pe nau kera peudi. 28 RAMPAUBE David da kela ngau nah cilu ge, nah Michal Saul napui David de pe sui kedi ci dige,* 29 Saul David de hing gwa di. Saul au David de ngaurau jüja di.

30 Pecai Philistinme hegwangdung hereu tei kera tetpet, nah penui tet kemie ramsang, David Saul gu kedimedung pelane swade ngkieng kiee lu, cine pe zi disüt di.