1 Philistinme Tinggwang samkakbung de tuiteu kedicai, penui cide Ebenezer namdi gade Ashdod namdi gage pwagwang lu. 2 Philistinme Tinggwang samkakbung de Dagon kerecaki gage pwa gwanglu, nah cide Dagon mie tai gage kaidi. 3 Pecai benai tingcang nuge Ashdod ga minadung cuh luge, ainie, Dagon mie de RAMPAUBE samkakbung dwaga kaumie hangdeu ga pe zu ngkum bam. Cine penui Dagon miede pwalwe pebam gage kai daidi. 4 Dede pecai benai tingcang nuge penui cuh luge, ainie, Dagon mie RAMPAUBE samkakbung dwa ga kaumie hangdeu ga pe zu ngkum bam. Dagon peu nah pe ba kenana cum mpetlwe kimui tet kenlüt lampui ga mla bam. Dagon pe paube rünne bam. 5 Aide ziemne, henai kecang de Ashdod ga, Dagon cingkumedung nah Dagon ki ga gwang kela keheibe Dagon kimui tet kenlüt de ga penui pi dau lama.

6 Ashdod nam ga minadungde RAMPAUBE saja peu sütgai. Pa Ashdodme nah penuide twagwa kebam namdung de ngkapdi nah penuide keteeizam le teikeherei sütgai. 7 Ashdod ga minadung cide tei kedi ngau luge, penui rangdi, "Israel Tinggwang samkakbung anui taiga bam dau lakta, kedanemene pa anuide nah anui rabe Dagon de saja peu zeu kecune." 8 Cine Ashdodme Philistia ga hegwang pelane de Ashdod gage qugai lu; penui penui dage rangdi, "Israel Tinggwang samkakbung de teu anui daitei laino?" Penui keligai, "Peu Israel Tinggwang samkakbung de Gath namdi ga pwagwang lu." Cine penui Israel Tinggwang samkakbung de cika pwa miedi. 9 Dede penui cika pwagwang luge, RAMPAUBE namdibe de saja peugai, iciu eh penui peusui tei kegwak sütdi. Pa keteeizam le pwa Gath namdi ga minadung hena gade kecing kecang de teikeherei sütgai. 10 Cine penui Tinggwang samkakbung de Ekron nam gage langgai di. Dede Tinggwang samkakbung Ekron nam ga gwanglu herizi, Ekronme sah cuhdi, "Penui Israel Tinggwang samkakbung de anui nah anui minadung de teitsetdi kerane anuida pwagwang gaida." 11 Cine penui Philistiame gwangdung leune de qugai; penui penui dage rangdi, "Israel Tinggwang samkakbung de langgi dilu, nah peu cide pe deudi ga cailigwang dilu, iciude cide anuide nah anui minadung de teitsetdi melu kerane." Tinggwang saja peu süt kegaine namdi leune ga kengngi bamdi. 12 Mina tsaidi kemakmedung de keteeizamdung le teikeherei sütgai, nah Ekronmedung hapkegai kwade tinggimdung ga nghangdi.