1 Saul hegwang tei mdeu keludau mmi camrei di*, nah pa Israel reu mmi riakdai hegwang tei, 2 Saul Israelme mipei cang cum kedet lu, Cang na petai ga bam lu Michmash namdi ga nah hangdeutu deudi Bethel ga, cang ge Benjamin leuhme deu ga Gibeah ga Jonathan taiga bam di. Reugwame kedame de penui kilung gage lang gaidi, pe paiki riep gage. 3 Geba ga Philistinme ramzeuki ga reugwame de Jonathan nah pe reugwame ne ngamlu nah Philistinme cide pelane siulu. Ge Israel deudi reu pelane gage telui kwa gai, ge Saul rangdi, "Peu Hebrewme dungde siu lulo." 4 Israelme pelane de Saul Philistinme ramzeuki reugwame de ngamlu delie kecu siulu, nah iciu eh Israelme Philistinme ngkau ge teidi. Pecai reugwamedung de Gilgal gade Saul da gwanglu lo de qu hekwa gai.

5 Philistinmedung Israelme de ngngwa keregi kera ngkwalu, penui bagidung cang cum, bagidung teu kerame cang herok nah reugwame jaadi kedi kung ga heciangdung kieege nzwa. Penui Michmash Beth Aven kepetle bie hang ramzeuki teilu. 6 Ge Israelme penui kerehim bam kedi ngau lu eh, penui swa gadi, penui tsupop gadung, mapuikangdung, tsurakang kak gadung, tekwadung nah hekwakidung ga mbai di. 7 Hebrewme kangge Jordan kah lu eh Gad nah Gilead deudung ga ladi. Dede Saul cidau Gilgal ga lareu, nah mina maa pelane mbeu eh pe caisui ladi.

8 Pa lang henane kwa lu, Samuel peting riet kebeu de nzwa. Dede Samuel Gilgal ga gwang lu tadi, nah minadung Saul dade zangpet cudi. 9 Saul rangdi "Acu keru reca nah kezuyi recadung teu gwang beulo," ciu eh pa keru ratak tei gai. 10 Pa keru ratak teicang lu siakge Samuel gwanglu. Saul pecu redau kerane petlu nah pecu kelum gai. 11 Pecai Samuel rangdi, "Nang dai teidi deno?" Saul keligai, "Minadung acu gidi zeu kecu ngaugai nah nang riet kenzeu be ting ga gwang canglu ma, nah Philistinme Michmash ga gwang ngkwa bamdi. 12 Ih rangdi, Philistinme acu aika Gilgal renia nghung zieda nah Ih RAMPAUBE sui ci luma, cine Ih keru ratak ge teigai maisia de lie eh teidi." 13 Ge Samuel Saul dage rangdi, "Nang kemie ta ge tei dida. Nang RAMPAUBE, n Tinggwang ncu aja kai kebeu de mzailu meda. Ciciu lude RAMPAUBE n kedi kelungta Israel reu peu bam luzie nage. 14 Dede cu au n kedi bam jüja gailakta, RAMPAUBE pa pesuibe ge de peei luda, nah RAMPAUBE pecu peu pe minadung reu di kera kedetlu da, kedanemene nang pa aja kai kebeu de mzai lu ta kedine."✝ 15 Ge Samuel cuhlu delwe Gilgal gade Benjamin deu Gibeah ga nghang di.

Ge Saul minadung petai ga kebam hai herok kenzwa gede pei hekwalu.

16 Saul, pe napei Jonathan nah minadung pe taiga kebamme Benjamin leuhme deu Gibeah ga bamdi. Dede Philistinme ramzeuki Michmash ga bam. 17 Philistinme reugwadung maa cum tei eh ramzeuki gade gwang. Maa ge Shual deu ga Ophrah namdi lam miedi. 18 Keda maa Beth Horon namdi lambie nreutet di, nah keda maa Zeboyim Langkam nah hetaideu kengau lebie miedi.

19 Israel pelane ga hegeu ta keteime de ngau luma, kedanemene Philistinme rangdi, "mecai peu Hebrewme de kingtie nah hengei penuikatei ziemne tei bam zie de nage." 20 Dede Israelme penui hepei, tsinghang, nreu nah tangkane mui tei kera Philistinme da mie la. 21 Hepei nah tsinghang mui tei kecu shekel zicum gade zina keula, nreu mui nah hetumhepei tei nzui kera shekel zicum gade zige keula. 22 Cine hereu ketei benai, reugwame mige ba gade kingtie mede hengei gah Saul penai Jonathan de ngngwa kelame; Saul nah pe napei Jonathan katei bam.

23 Philistinme ramzeuki reugwame mie Michmash gicak de kwalu.