1 Tingnai ge, Jonathan Saul napei pe reunet pwakelabe rehangbe dade rangdi, "Anai Philistinme ramzeuki ga kahpet go lie." Dede Jonathan pe pei de ranglia ma. 2 Saul Gibeah gade mdei kemak Migron ga kuraletsi bang kang ga bam. Pa mina hai herok kenzwa ge ngngwala. 3 Cidung kakga Ahijah cingkupei hekeutupai kai kelabe, Ichabod sinabe Ahitub napei, pa Phinehas napei nah Shiloh ga RAMPAUBE cingkupei Eli tsapei. Reugwame Jonathan tetkedi cima. 4 Michmash gicak, Philistinme ramzeuki ga gwang kerane Jonathan kah gwang kera dega, tsurakang kedi kena gicak lule ailam tu bam. Ket te Bozez* lie qula nah kedabe de Seneh* lie qula. 5 Ket gicak tingtünle bam, Michmash ncwa eh, kedabe de tingbangle bam, Geba ncwa eh.

6 Jonathan pe reunet pwakelabe rehangbe dade rang eh, "Kau, anai hegeurumkemak medung ramzeuki ga kahpet pie go. RAMPAUBE anai keleu gade heta tei beu de cilak, mage nede RAMPAUBE de kam mzeu gailak mide kelibeu kerane mina kiee mede cam liede." 7 Pe reunet pwakelabe rehangbe de keli di, "N mlung gade tei neu kela bedung teiciak lulo. Mie nswa culo, ainie, Ih au ncu ngngwa la, nang tei lo kebeubedung mzai ciak kerane." 8 Ge Jonathan rangdi "Anai tet kahpet zie da delwe peu Philistinme de anaide ngau gai zie da. 9 Penui anaide, cika gwang cang kemaktane kwa lulo di cai, anai kahpet mene anai bam ga bam dizie. 10 Dede penui keli cai, ‘Anui tai ga gwang lu,’ ciucai anai kahpet luzie; kedanemene cide RAMPAUBE anai de penui reu ngkieng kelu kepeu marengei gelu." 11 Cine penai Philistinme de penai de peu ngaugai, Philistinme rangdi, "Pielo, Hebrewme penui mbaibam gade mpet zeu da." 12 Cine ramzeuki ga minadung Jonathan nah pe reunet pwa kelabe de qu eh rangdi, "Anui tai ga nghang lu, nah anui nnai dage mage pwalia zie." Jonathan pe reunet pwa kelabe dage rangdi, "Acai suilu, kedanemene RAMPAUBE Israel de penui reu kengkieng peu dida." 13 Jonathan nra nghang di, nah pe reunet pwakelabe rehangbe de pecai sui lu. Jonathan pedwa ga kela Philistinme de teitset di nah pe reunet pwa kelabe pecai gade midung ge de teitset lu. 14 Gitset kerai be gade Jonathan penai pe reunet pwa kelabe mina hang ngkai gede gidi, deukui acre pempie* nage gade. 15 Cika ramzeu ki ga, luh ga nah minadung kakga tei ngngi di. Ramzeuki nah gwakelütme de ngngi di. Nnuiteudi nah cika ngngi süt bamdi.

16 Benjamin deu Gibeah ga Saul pumkwame, Philistinme reugwame lule ailam pak nlüt mpet kebam ngau bam di. 17 Cine Saul minadung de ngngwa kebam dage rangdi, "Peilo delwe caube anui kak gah bi kecu pielo." Cidau penui peipie ge, Jonathan penai pe reunet kepwabe de gahdi. 18 Saul Ahijah dage rangdi, "Aika Tinggwang samkakbung de keu gwang lu," kedanemene cidau ting cide Israelme da la. 19 Saul cingkupei de mpau kebam dau, Philistinme ramzeuki ga ma kebwak bam jüja nah kie reureu bamdi. Cine Saul cingkupei dage rangdi, "RAMPAUBE de resiu bam kera ting gah da" 20 Saul nah minadung Philistinme de ngngwa kebamme hereu ga miedi. Philistinme penui katei kakgade ma kebwak süt eh hangge ge de keregi bam. 21 Ndaa Hebrewme kangge Philistinme lam ngngwa kelame, nah penuide ngngwa ramzeuki ga mie kedime, penui Saul penai Jonathan de ngngwakela Israelme de ngngwa ncütlu. 22 Israel ga minadung Ephraim deutudung ga mbai kebamme Philistinme pak tet di zeu lie kecu siukelu dau, penui de hereu ga penuide gwa mie. 23 Cine RAMPAUBE cipau nai Israel de kelilu, nah Beth Aven swa gade hereu kah miedi.

24 Cipau nai Israelme mneidi kedanemene Saul minadung de sampet ge kaigai nah rangdi, "Ih a ngauraume dade hekum pei lu kemakne henai matyei kecube keheibe de reset pung lulo". Cine reugwame migede taktyei msi ma. 25 Ge penui pelane* hegung ga lüt nah cika hangdeu ga heliadui bam. 26 Minadung hegung ga lüt keludau heliadui puibam, dede mige de pemui gage kai ma kedanemene penui reset de hing kedine. 27 Dede Jonathan pe pei minadung de sampet kai kenzeude siu ma. Pa hetuitie pe ba ga pwa kelade hetwa pwa heliaduilip gage keci gai. Pa peba keu ncuh pe mui gage kailu, ge pa pe miak nrakpetlu.* 28 Ge reugwame kakgade mige Jonathan dage keligai, "N pei anui dage samkak mtingsüt eh kainzeu pwabam, rang eh, ‘henai migede matyei kecube peu reset pung lulo,’ minadung nzeu nah mnei ciau bamde." 29 Ge Jonathan rangdi, "A pei anui deu gage makennang teigai. Pielo, Ih heliadui nsi kelune daikenzwa gede Ih a miak nrakpet silu de bi. 30 Henai minadung penui ngauraume dade tui keludung de tyeilu liecai, daikenzwa gede yiki zieno? Kedanemene Philistinme de gi kie lu meda."

31 Cipaunai penui Michmash gade Aijalon ga kecang Philistinme de keregi mie. Israel reugwamedung leu sütdi. 32 Penui tui keludung gage pak gai, meurün, hetumseu nah hetumnadung cika de daptset lu. Penui cika de cidungde tyeilu hejaidung si eh. 33 Ge penui Saul dage rangbeu, "Pielo, minadung hejaidung si eh tyei eh RAMPAUBE dage kemau tei gai bam dida." Saul rangdi, "Nnuide nlum gaikelak ta tei dida. Cu tangtsukang kedi ge aika acu kela gwang beulo." 34 Saul rangdi, "Minadung kakga mie cu delwe penuide ranglia beulu, ‘Peu mi keheibe de de pe tumseu nah pe meuründung aika teu gwang daptset lwe tyei zie. Hejai tyei si eh RAMPAUBE dage kemau tei gai di so.’" Cine cipau ziu penui pe tumseu riep teugwang lwe daptset lu. 35 Saul RAMPAUBE dage recabam ge tei gai beu, pa cide recabam tei beu raitube.

36 Ge Saul rangdi, "Anui tingmui gage Philistinme de gwaketang eh tingcang kemaktane penuide ngkap nah penui pelane de teitset di go." Penui sam kelidi, "N kecet gade yi tube tei lulo." Dede cingkupei rangdi, "Anui Tinggwang suibe keteu raitu ge lo." 37 Saul Tinggwang de keteu, "Ih Philistinme de gwaketang zie ni? Nang Israelme de ngkieng kelu peu zie ni?" Dede cipau nai Tinggwang pe sam keli beu ma 38 Ge Saul rang eh, "Nnui mina muiteumedung aika gwang; henai aipau kemau daipai tei di de bi ci nah pie lulo. 39 Cine, Israelme de keli beu kelabe, ring kela RAMPAUBE, Jonathan a napei liede, pa tsai bizie. Dede migede mina pelane kakga de pecu sam keli ma." 40 Pecai pa Israelme pelane dage ranggai, "Nnui pelane tu ge lam pet sap lu, Ih nah Jonathan a napei anai keda lebie sap luzie." Penui Saul dage rang eh, "N kecet gade dai yitu bi tei lulo." 41 Saul rangdi, "RAMPAUBE, Israel Tinggwang! Aipau mau de Ih ne mede a napei Jonathan ne tei liecai, RAMPAUBE, Israel Tinggwang, Urim de peu gailo. Dede aipau kemau de n minadung Israel ne tei gai liecai, Thummim de peu gailo." * Cidau Jonathan nah Saul de peu dacak tei, dede reugwame be nzeu lu. 42 Cidau Saul rangdi, "A napei Jonathan anai kakga peu dacak lo." Cidau Jonathan ne dacak be keulu.

43 Cidau Saul Jonathan dage rangdi, "Nang daipai ge tei di bi acu ranggai lo". Jonathan pe dage rang beu, "Ih heliadui nage msi dida a ba ga kebam tsingtie tün ga taulwe. Ih aika bam da, Ih tsai zie da." 44 Saul rangdi, "Jonathan, nang tsai mecai peu Tinggwang de acu teitset di lu." 45 Cidau minadung Saul dage ranggai, "Jonathan Israelme de ngkiengkelu kedi aide teu gwang kebeube depeu tsaidi zieni? Ring kela RAMPAUBE zi teu eh pe peutam lei nage de hangdeu ga cakmie dilak lie, pa henai tei kegaide Tinggwang ngha teu eh teida". Cine mina Jonathan tsai kera gade kelilu. 46 Pecai Saul Philistinme de gwa zui si tadi, nah Philistinme penui deurai ga cailigwangdi.

47 Saul Israel ga hegwang tei luge, pa kehei ga pe ngauraume de ngngwa keregi. Moabme, Ammonme, Edomme, Zobah gwangpeidung, nah Philistinme. Pa nreu kegai leune ga pe ngauraume de saja peu. 48 Pa kuu süt eh keregi eh Amalekme reu ngkienglu. Penui ngauraume leune dade de pa Israelme de kelibeu.

49 Saul napeidung au Jonathan, Ishvi, nah Malki-Shua. Pe napui neraibe zi Merab nah Michal, henabe pui. 50 Saul nau zi Ahinoam; pa Ahimaaz napui. Pe reugwame reu kedibe zi Abner, Ner napei, Saul pei swa kecingbe. 51 Kish au Saul pei; nah Ner, Abner pei, Abiel napei.

52 Pe teilung tane Saul Philistinme de ngngwa keregi gwang. Saul mi kengkieng mede kekuu gede ngaulu ge, pa pecu peu pe reugwame ge teidi la.