1 Samuel cing dige, pa na kena de peu Israelme reu tutiakme tei. 2 Pe neraibe zi Joel, nah pe napei pe kenabe zi Abijah. Penai Beersheba nam ga tutiakme tei. 3 Penai pe pei nzwa, dede masangkemak gie de zui ladi. Penai hetau henim lutyei nah makiedung masang eh nzangbeu tadi.

4 Cine Israel ga hangkiame pelane gwang ngkwalwe Ramah ga Samuel da gwang. 5 Penui pe dage rangdi, "Ainie, nang cingdi dizeu da, nah n napei kena nang nzwa ma. Heleuh keda nzwa eh anui tu kerane anuide hegwang ge kedet beulo." 6 Dede penui, "Anuide hegwangpei ge peulo anui tutiak kerane," de rang kegai dau, Samuel pe sui tadi. Cine Samuel RAMPAUBE dade kiedi. 7 RAMPAUBE Samuel dage rangdi, "Minadung n dage kerangbe leune kingnei lulo. Penui ncu gidi kecube ma, dede penui acu penui gwangpei laklie mlai dida. 8 Ih penuide Egypt gade ngngwa mpetkelu benai gade penui ndaa nzwala dida, penui a dade nreutet dida nah hera kedadung de recala dida; nah penui cu n dage de cinzwa teigai zeu. 9 Cu penui kwa kingneilu; dede penuide mrairang mtingsüt beulu nah hengwangme penui reu dainzwa teu gwang ziebi kecu peu penuide cilu."

10 Cine Samuel minadung hegwangpei ge kie kebamme dage RAMPAUBE pe dage rang kebeu sam leune paubeu. 11 Pa rangdi, "Nnui reu hegwang tei kerabe de ainzwa tei zie. Pa nnui napeidung de peu pe bagidung teu zie nah pe bagi keteume teizie, nah pe bagidung dwaga pak zie. 12 Pa pe ziemne mina kangge de peu pecang reu nah riakngei reu kedime tei zie. Pa midungge de peu pe luh puu zie, midungge de pe mei luhlüt zie, nah midungge pe reunetdung tei zie nah pe bagi niadung tei zie. 13 Pa nnui napuidung de peu mariem kehengui keteime, malangme, nah tangku kerume tei zie. 14 Pa nnui luhdung yitube, kube luh nah olive luhdung luu luzie, nah cidungde pe kilame de peu dizie. 15 Pa nnui meiciu nah kubetsidung kereizige luulwe, pe kangga kedime nah pe kilamedung de peu dizie. 16 Pa nnui kilame pei nah kilame pui, gadadung nah ketum yitubedung luuteu dizie; delwe peu pe ta tei zie. 17 Pa nnui kauhaudung kereizige luupwa dizie, nah nnuide pe baangme tei dizie. 18 Cipau benai nnui ne kedetkelu hegwangpei de ziemne nnui ncam sütdi zie; dede RAMPAUBE cipaunai nnui sam keli beulak."

19 Dede minadung Samuel sam kingnei raudi; penui rangdi, "Lak! Anui reu hegwangpei ge bam maisia,✝ 20 iciu eh anuide heleuh kedadung nzwalu kerane, nah anui gwangpei anui tu tiak nah anui dwa tetpet eh anuide ngngwa hereu teilu kerane." 21 Samuel mina samdung leune siu luge, pa cidungde RAMPAUBE dage pau beudi. 22 RAMPAUBE Samuel dage rangdi, "Penui kwa kingneilu nah penuide hegwangpei ge peu lu." Cine, "Mi leune de pe namdibe rip ga gwang dilu," de eh Samuel Israelmedung de rang beudi.