1 Hena nabe Samuel Eli kang gade RAMPAUBE gwatei. RAMPAUBE dade sam cipau tingdau gwang camsüt; marengei kengau de camsüt. 2 Cipau tingdau, pe miak mnei reureu di eh mangau mcita kedibe Eli, pe zeu ga zeu bam. 3 Tinggwang mibung heu bamreu, nah Samuel RAMPAUBE kerecaki, Tinggwang Samkakbung kebam ga zip kera ga zeubam. 4 Ge RAMPAUBE Samuel de qugai, nah pa keligai, "Ih aika bam." 5 Samuel Eli da pakmie eh rangdi, "Ih aika bam, nang acu qu ni?" Eli rangdi, "Ih ncu qu ma; gwang zeudai dilu." Cine Samuel gwang zeudi. 6 RAMPAUBE qudai, "Samuel." Ge Samuel cuh dailwe Eli da mie eh rangdi, "Ih aika bam, nang acu qu ni?" Eli keligai, "Ih ncu qu ma, a na; zeudai cu." 7 Cu Samuel cide RAMPAUBE lie kecu cima, kedanemene RAMPAUBE pedwale madauge de peda marang kemakne. 8 RAMPAUBE Samuel de pia pe kecumbe qugai dai. Samuel cuh dailu delwe Eli da mie eh rangdi, "Ih aika bam, nang acu qu ni?" Cidau Eli RAMPAUBE ne mipei nabe de qu kebam cilu. 9 Cidau Eli Samuel dage rangdi, "Gwang zeu daicu; pa ncu qudai cai, nang ranglu maisia, ‘Ranggailo, RAMPAUBO, n kilabe kingnei bamlie.’" Cine Samuel gwang pe zeu ga zeu daidi.

10 RAMPAUBE gwang saplu; pa pedwa nzwa qugai, "Samuel, Samuel." Cidau Samuel rangdi, "Ranggailo, n kilabe kingnei bamlie." 11 RAMPAUBE Samuel dage rangdi, "Pielo, Ih au Israel ga ge mage teigai lai eh bam dida, cide siukelu leune mbeu dizie." 12 Cipau nai Ih Eli kilungme ha rang kegai leune tei zie, kerai gade kekam kecang. 13 Ih pa kemau ci kebam leune ziemne kelungta pe kilungme ha tiak zie rangbeu dida, kedanemene pe namedung penuikatei penui reu gage reset pung gwanggai kedine nah pa penuide kaamdi kemakne. 14 Aide ziemne pe kilungme mau madau gede ratak nah reca le tei ngngah gailak lie kecu Ih Eli kilungme dade a sam pet gaila. 15 Samuel tingbaa kemaktane zeu bam; pecai pa cuhlwe RAMPAUBE ki kikamdung ngkeilu. Dede Samuel marengei ha de Eli dage ranglia kera ngngidi. 16 Cidau Eli Samuel de qugai eh rangdi, "A na, Samuel." Samuel keligai, "Ih aika bam." 17 Pa rangdi, "Pa n dage dai sam rang beu no? Kenggia eh a dade cide kebai diso. Tinggwang n dage rang kebeu samdung pelane nang a dade kebai dicai, pecu peu ncu saja siasüt eh peu lulo." 18 Samuel pe dage maleune rangbeu; pa pe dade magede kebai dima. Eli rangdi, "Cide au RAMPAUBE. Peu pecu petaube teilu." 19 Samuel ngkieng cuhlu, nah RAMPAUBE peda la, nah peu Samuel kerang leune teicang lu. 20 Israel pelane tingpeule Dan nam gade gwang tingpile Beersheba nam ga kecang Samuel de peu RAMPAUBE caihakecime ge tei kera kedet kelude cilu.✝ 21 RAMPAUBE Shiloh gade pecu peu ngaugai dai, kedanemene pa Shiloh gade Samuel de pe sam gade liagai.