1 Samuel Israelme pelane dage rangdi, "Ih nnui a dage rang kegaidung de siu luda, nah Ih nnui reu hengwang tei kera ge de kedet luda. 2 Cu, aika au hegwangpei nnui dwaga tet gwang bam dida, Ih au cing nah a peu pu dida, nah a napeidung nnui kakga bam. Ih a rehang ting gade henai kecang nnui dwa tetgwang dida. 3 Ih aika bam, acu mmaulu RAMPAUBE dwa gade nah pa ne keniakkelu hegwangpei dwa gade. Ih caudung ge gu hetumseu luupwa di no? Ih caudung gu gada luupwa dino? Ih caude cwa di no? Ih caude mneu dino? Caudung ge ba gade hetau henim keuno Ih? Acu mmaulu, ciude Ih cidungde nnuide pwa peudai dizie."✝ 4 Penui keligai, "Nang anuide cwa ma, anui suisiet teima, mede nang mige ba gade magede rega nzeu ma." 5 Pa penui dage rangdi, "RAMPAUBE ne n zierang da, nah pa ne keniakkelu hegwangpei de henai pe zierang da, a ba ga magede tei mau nzeu kemak nang kengau de." Penui sam keli di, "RAMPAUBE ne zierangbe da."

6 Samuel minadung de rangsi eh, "RAMPAUBE ne Moses nah Aaron de kedet kelube da, nah nnui paumedung de Egypt deu gade ngngwa mpet kelube. 7 Cine cu, gwanglu nnui, iciude Ih RAMPAUBE dwa gade nnuide rangmsialu kerane RAMPAUBE masang tadung leune de, nnui nah nnui paumedung ziemne pa tei kegaidung. 8 Jacob Egypt ga gwang keludau, nah nnui paume RAMPAUBE dage kie kegaidau, cidau RAMPAUBE Moses nah Aaron de langgai, penai ne ngngwa mpetlu nnui paume de Egypt gade nah penui heni aika lungh di. 9 Dede penui RAMPAUBE penui Tinggwang de nsungtadi. Cine pa Siserame, Hazorme reugwa kedibe nah Philistinme nah Moabme gwangpei ba gage kaigai beudi. Penui pelane nnui paume de ngngwa regi eh gwang. 10 Nnui paumedung RAMPAUBE dage hap eh rangdi, ‘Anui mau dida, kedanemene anui RAMPAUBE dade nreudi delu nah Baal penai Ashtoreth mamie de recadi delu. Dede cu anuide kelibeu lo anui ngauraume ba gade, nah anui n gwatei zie.’ 11 Cine RAMPAUBE Jerub Baal,* Bedan, Jephthah nah Samuel de langgai beu eh nnui ngauraume ncu twagwa kebam leu reu peu ngkieng lu, ciu eh peu nnui de lungh kwak lu kerane. 12 Nnui Nahash, Ammonme gwangpei nnuide regi kera lüt kecu ngau kelu dau, nnui ada ge rangdi, ‘Lak! Ciuliede, hegwang ge anui reu kedi bam maisia’, RAMPAUBE nnui Tinggwang, nnui gwangpei liede. 13 Cu nnui kedet kelube hegwangpei de aika bamda, nnui kie kegaibe de, nah cu RAMPAUBE nnui reu hegwang tei kera kedetkelube de. 14 Nnui RAMPAUBE mie hing liecai, pe gwatei lu, pe sam mzailu nah RAMPAUBE ajadungde de renia diso, iciude nnuide nah nnui gwangpei kengkieng keteube n RAMPAUBE Tinggwang caisuime teilu zie. 15 Magade nnui RAMPAUBE kerang kwade mzai ma, dede RAMPAUBE sam kaikebeu de mlai dicai RAMPAUBE de nnuide mlai dizie, nnui paumedung dede mlai kedinzwa. 16 Cu de nnui RAMPAUBE da gwang lu, nah RAMPAUBE makedi aide nnui miak dwa gade teigai lai eh kebam de pielu. 17 Henai wheat luhlüt kecu ting meni? Ih RAMPAUBE dage kie gai zie, ciude pa tingceu nah tingrui langgai kerane. Pecai nnui kemau kedi teidi delie kecu ci nah ngaulu zie, nnui RAMPAUBE dwade tei kedi de, nnui ziemne hegwang ge kie kegai de." 18 Cine Samuel RAMPAUBE dage qugai, nah cipau nai RAMPAUBE tingceu nah tingrui kekiee ge langgai beu. Ge mina cika kebamme pelane RAMPAUBE penai Samuel de hing süt di.

19 Cidau Samuel dage minadung pelane rangdi, "N kilamedung ziemne RAMPAUBE n Tinggwang dade kie gai lo, ciude anui tsaidi melu kerane. Kedanemene anui maudung pelane gage kaisi dai luda, anui ziemne hegwang ge kie eh." 20 Samuel keli gai, "Ngngi di so, nnui tsaidi lak. Nnui kemau cikenzwa tei di lie de, RAMPAUBE dade nreu tet diso, dede RAMPAUBE de nnui mlung pelane teu pegwa teilu. 21 Kemtadung mamiedung nnuide ngha beu mede keli gai kelakbedung caisui so, kedanemene cidungde au pemi gahlu. 22 Pe zi kedi de ziemne, RAMPAUBE pe minadung de gidi lak, kedanemene pa nnuide pe mina tei kera pelung gade tiaklu delu.✝ 23 A ziemne au, Ih nnui ziemne kie tadi eh RAMPAUBE dage kemau teigai kerabe ma. Meliene, Ih nnuide daipai be yi nah petau bi kecube lampui ledeu beuzie. 24 RAMPAUBE de rünne hinglu nah nnui mlung pelane teu kesangbe gade pegwa teilu. Pa nnui ziemne ma kedi tei kegaidung de nsung lu. 25 Dede nnui kesiabe tadung tei jüja lacai, nnui nah nnui gwangpei de ngkapdi zie."