1 Midung ge David dage rangdi, "Pielo, Philistinmedung au Keilah namdi de nggwa regi bam dida nah hecaipung de sütbam dida." 2 Cine David RAMPAUBE dage ngha lo eh kekie teigai nah pecu keteudi, "Ih mie Philistinme de gwaketang zie ni?" RAMPAUBE David da rang eh, "Mie Philistinme de gwa ketang eh Keilah de kelilu." 3 David minadung pe dage rangdi, "Ainie, anui au Judah aika ngngi bam. Anui Keilah ga mie Philistinme reugwame de ketang cai daikenzwa ge si zie no?" 4 Cidau David RAMPAUBE dage ngha lo eh kie gai dai. RAMPAUBE pe samkeligai, "Cuhlu, Keilah ga hungcu. Ih ncu Philistinme reu kengkieng peu zie lu." 5 David nah pe minadung Keilah ga mie Philistinme de ngngwa regi. Pa penui tum gwa tetdi nah penuide gi sütdi. Cine David Keilah ga kelungme de kelilu. 6 Ahimelech napei Abiathar Keilah ga David dage pakgai kedi dau, pa hekeutupai ge peba ga keulwe nghung.

7 David Keilah ga gwang di delie Saul dage rangbeu. Saul rang eh, "Tinggwang aba gage pecu peu dida. Kedanemene namdi ge heriekidung nah renamrie pwa kebam ga pa lütlwe pe katei pecu ngkuinam kedine." 8 Saul hereu tei kerane pe reugwame pelane de Keilah ga nghung lulo qugai, David nah pe minadung de tuilu kerane. 9 David Saul pecu teikeherei gai kera riem pwa bamlie kecu cilu ge, pa cingkupei Abiathar dage rang eh, "Hekeutupai de aika keu gwanglu." 10 Cidau David rangdi, "RAMPAUBE, Israel Tinggwang, Saul Keilah ga gwang kesang kerade n kilabe siu luda, a ziemne namdibe ngkapdi kera. 11 Keilah ga minadung pe ba gage acu kaibeu dizie ni? N kilabe siukelu nzwa, Saul nghung zie ni? RAMPAUBE, Israel Tinggwang, Ih n dade kie la, N kilabe dage nggia eh rangbeu lo." RAMPAUBE rangdi, "Pa nghung luzie." 12 Cidau David rangdi, "Keilah ga minadung dage a minadung nah acu Saul dage kaibeu dizie ni?" RAMPAUBE rangdi, "Penui dage ncu kaibeu dizie." 13 Cidau David nah pe minadung, hai herok kenzwa ge, cuhlu delwe Keilah gade tetdi, nah penui heni ge gade heni gega mie. Saul dage David Keilah gade pakdi delie rangbeu, nah pa pecai gwakela de mtakdi. 14 David hetaideu ga kemsiubamdung ga bamdi, Ziph hetaideu, lamlwatu deudi ga. Saul langnai ramsang pecu peei, dede Tinggwang pecu pe ba gage kaibeu dima.

15 David Saul pe keringria keu di kera peei gwang kela ngaulu; cidau David Ziph hetaideu Horesh ga bam. 16 Cidau Jonathan, Saul napei, cuhlwe Horesh ga David da mie, nah Tinggwang dade kengkieng ngaulu. 17 Pa pe dage rangdi, "Ngngi diso. Saul a pei ncu peei gai lakta. Nang Israelme reu hegwang tei luzie, nah Ih n cai zie. A pei Saul de aide cibam." 18 Penui RAMPAUBE dwa gade samkaklu. David Horesh ga bamdi, nah Jonathan kilung gwang di.

19 Pecai Ziph gade midungge Gibeah ga Saul da gwang eh rangdi, "David Horesh kemsiubamdung ga anui kakga mbai bam meni, Hakilah deutu ga, Jeshimon* tingpile? 20 N keneu nzwa nghung lu, hegwangpei! N keneu nzwa, nghung lu! Anui nsam au pecu hegwang ba gage kai beu kera deda." 21 Saul rangdi, "RAMPAUBE de peu ncu samlam beulo. Nang acu ngaunggia kegai ziemne. 22 Mie, delwe ci mcilu. Pa daiga mbai bam bi kecu nah cau cika pecu ngaubi kecu ci lulo. Ada ge rang kebeu au pa mriaksüt lie zeu. 23 Cine pielo, nah pa pekatei mbai kebam henidung pelane cilu. Delwe nang ci mci gilu de cailigwanglu, iciude Ih ncu ngngwalwe mie zie. Magade pa cipau deu ga bam cai, Ih pecu Judahme pecang kebam kakgade peei mpet luzie."

24 Cidau penui cuhlu delwe Ziph ga Saul dwarai miedi. Cidau David nah pe minadung Maon renaamkang ga bam, Jeshimon tingpile Arabah ga. 25 Saul nah pe minadung pecu peei mie. Dede cide David dage rangbeu, cine pa tsura deutu Maon hetaideu ga mie lunghdi. Saul cide siulu ge, pa David de Maon hetaideu ga zuimie. 26 Saul lamlwatu tuge lambie ladi, nah David nah pe minadung lamlwa keda lebie tet ladi. David Saul dade kelwa eh pak ladi. David nah pe minadungde Saul nah pe minadung ne twagwalu penuide tui kera, 27 Samgwame ge Saul da gwang eh rangdi, "Kelwa eh gwanglu, Philistinmedung hangdeube ga gwalwet ladi kecune." 28 Cine Saul David de zui si tadi nah Philistinme de renia kera cailigwang di. Ciziemne heni cide de Pakkelu Tsura Deutu lie qula. 29 David cika de nghang di nah Engedi kemsiubamdung ga lungh di.