1 Cine David cika de pak pwa Adullam namdi gage pakgai di. Pe siname nah pe kibaume David daiga mie dibi kecu siuluge, penui pe taiga miedi. 2 Pelane penuide teikeherei kecume mede mipau pung kedime mede penui suisia kedime peda gwang ngkwalu. David penui reu muiteu teilu. Pe taiga mina hai mdai kenzwa gede nzangla.

3 Pecai David cika de Moab deu ga Mizpah nam ga miedi. Pa Moab hegwangpei dage rang eh, "Kehereide peu apei penai apui de ngngwa mpet beulo, Ih Tinggwang a ziemne daipai teigai lai eh bambi de cilu kemaktane."* 4 Pa penaide Moab ga hegwangpei dage püt gaidi. Cine pe pei penai pe pui peda bamdi, peting pelane David cika bamdi. 5 Pecai caihakecibe Gad David dade rangdi, "Aika bam so, cika pütdi delwe Judah deuga mie cu." Cine David tetdi delwe Hereth gung ga miedi.

6 Mige ne Saul dage David nah pecu ngngwa kela minadung de ngaulu delie pau beu. Cidau Saul Gibeah ga bam. Ramah ga tamarisk bang ge kang ga ntum bam, pe ba ga pengei bam, nah pe kilamedung pecu sap twagwa pung bam. 7 Saul pe kilame pecu sap twagwa kebamdung dage rangdi, "Cu kingneilu, Benjamin leuhmedung! Jesse napei nnui pelane de luh nah kubeluhdung peuciau zie ni? Nnui pelane de cangcang reu nah haihai reu kedi tei kera peu zieni, 8 acu kemmau ciem riem kebeu ne? Nnui migede a na Jesse napei de ngngwa samkak kela sam de acu rangma. Nnui migede aziemne nnui lungnei ma. Nnui migede a dage a kilabe dage David a minadung pecu tei ngkuu beu kera ha rangma. Henai David mbaih eh acu kwabam iciude pa acu gwa ketang kerane*." 9 Pecai Doeg Edomme, Saul kilamedung taiga kebambe samkeligai, "Ih Jesse napei Nob ga Ahitub napei Ahimelech da gwang eh pecu ngauda. 10 Ahimelech RAMPAUBE dade kekie teigai David de nghabeu kerane, nah pa pecu taktyei kesa nah Philistinme pei Goliath kingtie pwapeu."

11 Pecai hegwangpei Saul cingkupei Ahimelech Ahitub napei nah pe kibaume Nob ga cingku tei kebam peciakne de qu kera mige de langgai. Penui pelane hegwangpei da gwanglu. 12 Saul rangdi, "Cu kingnei lu, Ahitub napei." Pa samkeligai "Ih aika bam, a mpaubo." 13 Saul pe dage rangdi, "Daitei eh nang acu nah Jesse napei de mmau eh heciem pei lano, cinzwa eh nang pecu tangku nah kingtie ge peu, nah Tinggwang dage nghalo kie, pa pecu nghalu kerane, ciude, pa cuhlwe acu renia lu kerane,* pa henai tei kebam nzwa kengkim ga mbailu kerane ni?" 14 Pecai Ahimelech hegwangpei de keligai nah rangdi, "N kilame peciakne kakgade cau David nzwa samsang bamno, hegwangpei napui nahpei, n pumkwame reu kedibe da nah n ki ga mina leune pecu rütsüt lie. 15 Henai ne raitube tei eh pecu ngha beulo Ih Tinggwang dade kieni? Ada de ndei dilu! Peu hegwangpei de pe kilabe mede a pei ki ga kebam peciakne dede peu nmau diso. Kedanemene n kilame magede cigai laklu." 16 Dede hegwangpei sam keligai, "Ahimelech, nang nah n kibaume pelane tsai bizie." 17 Hegwangpei pe taiga kwa kebamme dage rangdi, "Nreugwang RAMPAUBE cingkupeidung de teitsetdi. Kedanemene penui de David lam sap kela ne, nah penui pa pakdi kecu cibam, dede magede a dage paubeu ma." Dede hegwangpei kilamedung RAMPAUBE cingkupeidung de teitset kera heba ge de hwagai luta di. 18 Cine hegwangpei Doeg dage rangdi, "Nreugwang cingkumedung de teitsetdi." Cine Doeg Edomme nreugwang cingkumedung de teitsetdi, pa mina riakheset eh mengei de, langcimpai hekeutupai teubah kebamme de cipau nai teitsetdi. 19 Pa Nob namdi ga lungh kela pelane cingkumedung, mipei nah mipui, hename nah ngienadung, nah hetumseu nah gada, nah meuründung penui pelane de teitsetdi.

20 Dede, Abiathar, Ahimelech napei Ahitub napei hangge paklu, nah David cai miedi. 21 Abiathar David dage Saul RAMPAUBE cingkupeidung de teitsetdi kecu rangbeu. 22 David Abiathar dage rangdi, "Ih cipaunai Edommepei Doeg de cikade kengau dau pa Saul dage paubeu bi kera Ih cida. Ih n kibaume tsit pelane de a zie da! 23 Acu ngngwa bamlu, nah ngngi diso. Kedanemene mi ncu teitsetdi zielie pei kela de acu de pei kela da. Nang acu ngngwa bamlu, kwaklu zie."