1 Samuel tsaidi ge, Israelme pelane gwang ngkwa lwe pe ziemne hap, delwe penui pecu Ramah ga pe ki nam gage kungdi. Pecai David cuhlwe Paran hetaideu* ga miedi.

2 Maon nam ga mipei ge Carmel nam ga pe mabam de bam. Mipei aipaude hei süt cuge. Pa pe meuründung cangcum nah pe meu cangge bam. Pa Carmel gade pe meurün mai bitbam. 3 Cipau peide pezi cai Nabal, nah penau zi cai Abigail. Penau Abigail hezuyi nah mcing süt. Dede Nabal au perata sia nah maidakme ge. Pa au Caleb leuhme ge. 4 David hetaideu gade Nabal pe meurün mai bit kebam ha siulu. 5 Cine David rehangme hang kerei de langgai. David rehangme da rangdi, "Carmel ga hangcuh, delwe Nabal da mie, delwe a zi teu pecu kelum gailo. 6 Nnui pe dage rangbeulo, ‘Lungyi eh lung lulo. Kezuyi nda, nah kezuyi n kelak da nah nda kebam pelane da peu bam lulo. 7 Nang meurün mai kebitme bam lie Ih siu. N meurün kekwamedung anuide ngngwa bam la, nah anui penuide rezam dima, nah penui gu magede gahdi ma, penui peting pelane Carmel gabam. 8 N rehangme de keteulu, nah penui ncu rangbeu zie. Cu n miakngau gade a minadung depeu pesui lu. Kedanemene anui hengyi tingba benai gwang luda. Kehereide nang teilu kebui n na ga kebam nsam gade n kilame de nah n zangbe David de peu gailo.’"

9 David pe minadung gwanglu ge, Nabal dage David zi gade penui ma pelane rangbeu delwe cika kwabam. 10 David kilamedung dage Nabal samkeli gai, "Cau David no? Nah caube Jesse napei no? Cudau kilame pe n paumedung dade pak tet kedi kiee süt dida. 11 Ih a tangku nah a dui nah a hetei meurün mai kebitme ziemne Ih makaune daptset pwa kebam de Ih cikemak gade gwang kelame de Ih penuide pwa beu dizie ni?" 12 Cine David minadung nreugwang eh cailigwang, delwe rang kegai pelane sam de pe dage paubeu. 13 David pe minadung dage rangdi, "Nnui pelane pe kingtie keu punglu." Cine penui pelane pe kingtie keupunglu. David de pe kingtie keupunglu. Pe mina hai mdai ge David caisui tetdi, nah mina haina ge mania taiga kwa bamdi.

14 Dede rehangme ge Nabal nau Abigail dage rang eh; pa rangdi "David anui mpaube de kelum kegai sam tei hetaideu gade samgwame kangge de langgai, ciude pa penuide henui teidi. 15 Ciulie de minadung anui dade yi süt, penui madaude anuide rezam ma, nah anui penuide ngngwa luhdung ga mie kelatane magede gah dima. 16 Penui tangdeu ge nzwa tingmui tingba de anuide gumbeu, anui peting pelane anui meurün haudungde kwa eh penuide ngngwa kebam dau. 17 Ciziemne Aide cet gaidai eh nang daipai tei maisiabi cet lulo, kedanemene anui mpaube nah pe kelak peciakne ziemne kesia ge riem pwa bam di delu. Pa au pelung takzu kedine, mige de pecu ngngwa macet riem ncüt lama."

18 Pecai Abigail zette cu tangku kwak haina keulu, zau la kena, hemeu mtei kelube mengei*, tangku ru kelube kilogram mengei, kubetsi peu haige, nah tangzüttsi telei kelu tangku kwa hai na, keu lwe cidungde gadadung reu gage kailu. 19 Pa pe kilame dage rangdi, "Nnui a dwarai miecu nah Ih nnui caisui luzie." Dede pa pe nahpei Nabal dage pa tei kebam ha magede rang ma. 20 Pa pe gada reu ga tet gwang eh lamlwatu lebie hung luge, David nah pe minadung pe taiga gwang nah pa penuide redaulu. 21 Cu David pekatei pecu rang eh, "Kesang Ih kemta gade mina aipau de ma pelane gumbeu la da hetaideu gade, ciu eh pegu magede teinggah dima, nah pa kesiabe le pwa acu keyi ziehi teibeu. 22 Peu Tinggwang de a dage tei gailo, David nah ciswa de kiee gwa kecu, magade Ih tingcang gage pekilung gade mipei hangge dede bang beu di cai."

23 Abigail David de ngaulu sang ge, pa zette pe gada reu gade nghunglu delwe pezu hangdeu le nkumpung eh David dwa ga keukei miedi. 24 Pa David piga keumie eh rangdi, "A kedibo, peu ada rünne kemau gwang lulo. Kehereide n kilabe de peu nda ge sam ranglo, nah n kilabe kwa kingnei gailo. 25 Nabel au kesia nah perata kesia mi hangge kecu, kehereide de peu a mpaube de pe sam kette kingnei so. Pa au kemie kauge, pezi nzwa eh. Dede Ih n kilame a mpaube rehangme de ngau ma, nang lang kegai peide. 26 Ciciucai cu, a mpaube, RAMPAUBE nah nang ring kela nzwa, RAMPAUBE ne n ba le teitset nah hekum peidi lu kera gade kezeu beu da, cide nzwa eh n ngauraume pelane de, nah a mpaube de rejam kera tei kelame de peu Nabal nzwa reset pung kelube teilo. 27 Cu n kilabe a mpaube ziemne teugwang kela mta mapeu peu aide luu lulo, n minadung a mpaube caisui kelame de peulu. 28 Kehereide n kilabe kemau tei kedi leune maugi beulo, RAMPAUBE ne a mpaube ki kesang tei beuzie kecune, kedanemene a mpaube RAMPAUBE pe reutak regi kelane, nah nang ring kelatane n dade ma kesia gede ngaulak. 29 Keheibede ncu gwaketang nah teitset kera teicuh liede, RAMPAUBE n Tinggwang ne a mpaube teilung de pema pemi kehung ge gum kebam nzwa ncu gum beuzie; nah pa n ngauraume teilung au, mige pe tangnung le ncu kekap nzwa pane penuide kelien gi dizie. 30 RAMPAUBE a mpaube ziemne pa nda ge sampet kebeu nzwa maleune teibeu zie, nah ncu peu Israel reu muiteu tei kera kedet luda. 31 Aide n ziemne swaga püt ge dilak, nang kemau kegah zai de rui mpet kedi de, mede a mpaube pekatei pecu kelilu kera ketei kedine. Cidau RAMPAUBE a mpaube ziemne keyi tei beuzie, n kilabe de nsung gailo."

32 David Abigail dage rangdi, "RAMPAUBE de twalu, Israelme Tinggwang de, henai peu acu redau kerane ncu lang kegaibe. 33 N maci de ziemne Tinggwang de twa nah nang samlampunglu, kedanemene nang henai acu kai nzeu kelune, Ih mide daptset eh kemau teidi kera gade nah a ba le akatei a kum peidi kera gade kezeu kebeune! 34 Kesang kecune, ring kela, RAMPAUBE Israel Tinggwang Ih ncu teikeherei di kera gade, pa acu kam beuda, nang kelwa mie acu redau lu maige, cika kesangde ncünne tingcang gage Nabal mipei hangge ngiena tsai kapdi kerage." 35 Cine David pa teugwang keladung de pecu pe ba gade luulu delwe pa pe dage rangdi, "N kilung ga kezuyi teu cailigwang cu; ainie, Ih n sam de kingnei lu nah ncu luulu da."

36 Abigail Nabal kilung ga hengyi eh telei bam, hegwangpei nzwa eh hengyi be da caili gwangdi; ainie, Pa sakmie süt bam kedine, Nabal peda pesuiyi eh bam. Cine pa tingcang kemaktane pecu magede ranglia ma. 37 Tingcang Nabal mcing kebam dau, pe nau pedage maleune paubeu; Pecu keheu süt di, eh pe mlung tsaidi, nah pa pezeu ga tangtsu ge nzwa zeu bamdi. 38 Cide ziangrei kenzwa ge gwangdi ge RAMPAUBE Nabal de kedeu gai ge pa tsaidi.

39 David Nabal tsai kedi ha siulu ge, pa rangdi, "RAMPAUBE de twalu! Pa Nabal ba gade acu rang msia kecune a kum pei beuda, delwe peu pe kilabe de peu kemau gade teidi meda. Pa Nabal kemau tei kedine pemau ziemne pecu saja peuda." Pecai David Abigail de pe ziemne pecu penau kera nah pe sampet de langgai. 40 David kilame Carmel ga Abigail da gwang kelu dau, penui pecu resiu nah rangdi, "David ncu penau lu kerane ncu pe da ngngwa gwang kera anuide langgai lie." 41 Pa cuhlu, pekatei pezu hangdeu ga keumie lwe rangdi, "Ainie, n kilapui au a mpaube kilame pi hui kera be kila lie." 42 Abigail zette cuhlwe pe gada reuga nghanglu, pe kilapui hang mengei ngngwa kelame pe caisuidi; nah pa David samgwame caisui eh penau di.

43 David Jezreel nam gade Ahinoam de penau dailu; penai hangna na pe nau teilu. 44 Cidau, Saul pe napui Michal, David nau de pwa, Gallim nam gade kegwangbe, Laish napei Paltiel de peudi.