1 Midung ge Ziph gade Gibeah ga Saul da gwang eh rangdi, "David Jeshimon* dwaga kebam Hakilah deutu ga mbai bam meni?" 2 Pecai Saul cuhlwe Ziph hetaideu ga miedi, delwe Israelmena cangcum de kedetlwe pecu nzang eh, David de peei kerane Ziph hetaideu ga miedi. 3 Saul Hakilah deutu lampuikang gage ramzeuki teilu, cide Jeshimon deutu dwaga. Dede David hetaideu ga lareu, nah pa Saul hetaideu ga pecai sui gwangkela ngaulu. 4 Cine David reketme de langgai nah Saul cika bamlie kecu cilu. 5 David cuhlu eh Saul ramzeuki kebam ni ga miedi. Pa Saul nah reugwame reu kedibe Ner napei Abner zip kebam ni ngaulu, Saul ramzeuki lungga zipbam, nah pe minadung pecu twagwalwe zip ciobam.

6 Pecai David Hittime pei Ahimelech nah Abishai, Zeruiah (David tipui) napei, Joab sinabe dage rangdi, "Nnai caube acu ngngwa Saul ramzeuki ga nghung lai?" Abishai rangdi, "Ih! Ih ncu ngngwa nghung zie" 7 Cine cipau ziu David penai Abishai Saul ramzeuki ga lütlwe Saul ramzeuki sumga pe hengei hangdeu gage pe peu taiga ge cum pwabam eh cika zip bam. Abner nah pe reugwamedung pecu twagwalwe zipbam. 8 Pecai Abishai David dade rangdi, "Henai Tinggwang n ngauraube de n ba gage kaibeu da. Peu acu kehereide pe hengei keulu eh pecu hiagai lo, piage gage pecu hangdeu gage hiagim dizie. Ih pecu pia na au teilak." 9 David Abishai dage rangdi, "Nang pecu tei diso. Kedanemene cau ge RAMPAUBE ne keniak kelube de tei rejamdi delwe kemau tei melie lubui no?" 10 David rangdi, "RAMPAUBE ring kelanzwa, RAMPAUBE ne pecu teitset zie, mede tsaidi kera peting gwangcang zie, mede pa hereu ga mie eh ngkap dizie. 11 RAMPAUBE depeu pane keniak kelube de Ih a ba le rejam kera kezeu beu; dede cu, Ih n dade kiela, pe peu taiga kebam pe hengei nah pe duila pwalwe tetdi go." 12 Cine David hengei penai duila de Saul peu taigade pwalu eh penui tetdi. Migede penuide ngau ma mede David daipai tei dibi kecu cima, mede migede mrak cuh dima. Penui pelane zip zing kedine, kedanemene RAMPAUBE dade zipzing kecude penui reuga nghung kedine.

13 Pecai David hangdeu kedale kahpet nah lamlwatu mdeitube ga saplu; penai kakga mdei süt bam. 14 David Ner napei Abner nah reugwamedung dage pe rata di; nah pa rangdi, "Nang a sam keli lakni, Abner?" Pecai Abner pe sam keli eh rangdi, "Nang cauno Hegwangpei dage sah kebam ai?" 15 David Abner dage keligai, "Nang kuusüt kecu pei ge meni?" Israel gade nang kenzwa cau bamno? Ciu eh nang daitei n mpaube hegwangpei mapie eh gumlu me no? Cune mige n mpaube hegwangpei de teitsetdi kera lütda. 16 Nang aide teikedi yi ma. RAMPAUBE ring kelanzwa, nnui tsaidi kera lui lie, kedanemene RAMPAUBE ne keniak kelu nnui mpaube de gumlu me kecu. Cu ainie hegwangpei hengei nah duila pe peu taiga kebamde daiga bamno?

17 Saul David kwa cilu nah rangdi, "Cide n kwa ni, a na David?" David rangdi, "Cide a kwa da, oh hegwangpei, a mpaubo." 18 David rangdi, "A mpaube daitei pe kilabe de gwazui lareu no? Ih daipai tei dino? A ba ga dai kesia ge bamno? 19 Cu cine, Ih n dade a nggia kiela, peu a mpaube hegwangpei de pe kilabe samdung kiengnei gailo. RAMPAUBE ne acu renialu kera ncu teuncuh beucai, pecu peu reca ge luu lulo; dede mina ne cide teigai liecai, RAMPAUBE dwa gade peu penuide reset pung kelube teilu lo, penui henai acu gwampet kedine, ciu de Ih RAMPAUBE mapwame ge melu kerane; penui ada rangdi, ‘Mie keda rabedung de reca lulo.’ 20 Cu cine, peu hangdeube ga a jai nghai eh RAMPAUBE dwa gade mdei diso; rehume lamlwadung ga nruine ge cai zui kecudau Israel gwangpei tammaine ge de peei kecu."

21 Pecai Saul rangdi, "Ih kemau tei dida. Cailigwanglu, David, a na; Ih madaude ncu tei rejam dailak ta. Kedanemene henai n miakngau gade a teilung pemi hungsüt kecune." Ainie, Ih kemieme nggwa de tei dida nah ma tei mausüt dida, 22 David samkeli gai, "Ainie, aika n hengei bam, hegwangpei! Peu n rehangme hangge de aika gwang eh keulu delwe nda pwagwang lulo. 23 RAMPAUBE samsang nah masang kelame keheibe de ziehi peu lulo. Kedanemene RAMPAUBE ncu henai a ba gage kai beuda, dede Ih RAMPAUBE ne keniak kelube de tei rejam daulak. 24 Ainie, a miakngau gade n teilung hungsüt kecunzwa, cine peu RAMPAUBE miakngau gade a teilung depeu pemi hungki lo, nah pa peu acu lungrei pelane gade kelibeu kelube teilu lo." 25 Pecai Saul David dage rangdi, "Ncu peu samlam pung kelube teilo, David a na! Nang ma kedidung tei bizie nah nang cidung reu ngkieng luzie." Cine David pe lampuile tetdi, nah Saul pe ki ga cailigwangdi.