32 »I̱ndo̱ó máꞌ numuu rí asndo nimbáa tsíꞌyoo náá mbiꞌi jamí náá xtáa a̱kha̱ꞌ gáꞌne rúꞌkhue̱n. Ni máꞌ ánje̱l tsí júwa̱ꞌ ná mikhuíí tsíyáá, ni máꞌ A̱dée Ana̱ꞌlóꞌ, rí i̱ndo̱ó máꞌ Ana̱ꞌlóꞌ ndaꞌyoo.

1 Gíꞌmaa máꞌ rí ma̱tha̱ya̱á ríge̱ꞌ mangaa: rí awúun mbiꞌi rí na̱ka̱-rayámba̱ numbaa, maphú gakhe̱ gáꞌne. 2 Numuu rí ma̱ju̱wá xa̱bo̱ tsí naxná-gajmiéjúún juya-mijná i̱ndo̱ó máꞌ ikhiin, tsí na̱ni̱gu̱ún mu̱guaꞌdáá mi̱ndaꞌkho, tsí nune̱-tsiꞌyá, tsí nu̱xu̱xí-mijná, tsí nuthan xkawe̱ꞌ numuu Ana̱ꞌlóꞌ, tsí najñaguun inuu anu̱ú, tsí tsíthan núma̱aꞌ la, tsí tsíne̱-mba̱a̱ Ana̱ꞌlóꞌ, 3 tsí na̱nguá iñáwíin a̱kui̱ín ene̱ xa̱bo̱, tsí na̱nguá ene̱ mba̱a̱ a̱kui̱ín, tsí nune̱-xuxtaa ga̱jma̱á numúú xa̱bo̱, tsí tsíyoo gúni̱ꞌñáá rí nune̱ rí xkawe̱ꞌ, tsí nune̱ rí mu̱míni̱í xa̱bo̱, tsí na̱nguá i̱ni̱gu̱ún rí máján. 4 Ma̱ju̱wá xa̱bo̱ tsí mu̱xna̱xíin a̱ngui̱ín, tsí na̱nguá i̱ndxa̱ꞌwa̱-mijná rí mune̱, tsí na̱ju̱mu̱ú rí phú gíꞌdoo numúú, tsí i̱tha̱án máꞌ na̱ni̱gu̱ún mune̱ rí nandúún ikhiin xó rí nandoo Ana̱ꞌlóꞌ. 5 Muthee̱n rí nune̱-mba̱a̱ Ana̱ꞌlóꞌ, xómáꞌ rí nuni̱i̱ masngájma rí na̱nguá gakon rí nuthee̱n. Ikhaa jngó ma̱xámbáxa̱a̱ꞌ gajmiáaꞌ xa̱bo̱ tsí xkuaꞌnii jaꞌñúú.

17 "Naꞌthán Ana̱ꞌlóꞌ: awúun mbiꞌi rí na̱ka̱-rayámba̱ numbaa,

ma̱xnu̱ú Xu̱ꞌ mbá xúgíin xa̱bo̱ numbaa.

I̱jña̱ꞌlaꞌ tsí xa̱bekha jamí i̱jña̱ꞌlaꞌ tsí go̱ꞌo̱ mu̱rawíjnga̱a ajngóꞌ.

Tsí jñáma mbuyáa̱ inu-mbiꞌíí gáꞌne Ana̱ꞌlóꞌ,

jamí tsí xa̱bo̱ buanuu Ana̱ꞌlóꞌ maꞌthúu̱n ga̱jma̱á majñu̱u̱ xnuꞌndaa.

18 Jamí gakon máꞌ rí mbiꞌi rúꞌkhue̱n ma̱xnu̱ú Xu̱ꞌ yumbéꞌ,

kajngó xa̱bekha jamí go̱ꞌo̱ mu̱rawíjnga̱a ajngóꞌ.

19 Jamí ma̱ne̱ rí phú wáá ná mikhuíí,

xúꞌkhue̱n máꞌ ma̱ri̱gá rí phú ma̱makúún xa̱bo̱ gáꞌne ná inuu numbaa:

iꞌdi jamí agu, xúꞌkhue̱n máꞌ ru̱jmbo̱oꞌ gúní.

20 Xómáꞌ a̱kha̱ꞌ ma̱ꞌni̱i mijína,

jamí go̱nꞌ ma̱ꞌni̱i xómá iꞌdi,

nákhí rí xóó tsíga̱nú mbiꞌi rí ma̱ꞌkha̱a Táta̱.

Mbiꞌi rí phú mba̱a̱ jamí phú mitsaan ñajuun ne̱.

21 Jamí jámba̱a̱ tsí naxrígo̱o̱ mbiꞌyuu Táta̱,

ma̱jríya̱a̱ꞌ".*

15 Ikhaa jngó, ikháanꞌxo̱ꞌ nu̱tha̱nꞌlaꞌ ríge̱ꞌ, mbá rí jmína̱a̱ꞌ máꞌ Táta̱ niꞌthán: Ikháánꞌlóꞌ tsáánꞌ xóó juwa nduꞌyalóꞌ asndo mbiꞌi rí ma̱ꞌkha̱a Táta̱, mu̱xúꞌgua̱ gináálóꞌ gúxkamaa̱lóꞌ, rí ginuu a̱ngia̱nꞌlóꞌ tsí nijáñúú máꞌ magóó gúxkamaa̱. 16 Numuu rí jmína̱a̱ꞌ máꞌ Táta̱ ma̱ga̱taa ná mikhuíí ga̱jma̱á mbá a̱ꞌwá rí naꞌthán-ñájun, ga̱jma̱á a̱ꞌwóo mbáa ánje̱l tsí phú mba̱a̱ ski̱yu̱u̱ꞌ, jamí ga̱jma̱á a̱ꞌwóo e̱ꞌmbi drígo̱o̱ Ana̱ꞌlóꞌ. A̱ꞌkhue̱n rí tsí nanimbu̱únꞌ juyáá Krísto̱ nákhí nijáñúú, mbuya̱a mbiꞌñúú ginuu. 17 A̱ꞌkhue̱n rí tsáánꞌ juwa nduꞌyalóꞌ xóó, mbá nacha̱ ma̱ꞌga jiꞌdáanꞌlóꞌ ná du̱u̱n ga̱jma̱á nindxúu̱n ikhii̱n, kajngó mu̱dríguíilóꞌ Táta̱ ná inuu gíñá. A̱ꞌkhue̱n rí ma̱juwalóꞌ jámuu mbiꞌi ga̱jma̱á nindxu̱u̱ Táta̱. 18 Ikhaa jngó, gu̱xna̱-míjnálaꞌ tsiakhe̱ ga̱jma̱á ajngáa rúꞌkhue̱n.

6 Ikhaa jngó, mu̱xúꞌnulóꞌ xómá rí nune̱ i̱ꞌwíin xa̱bo̱, rí ga̱juwalóꞌ xawi jamí ga̱xa̱ba̱ꞌlóꞌ. 7 Numuu rí xa̱bo̱ tsí nunu, mbroꞌon nunii̱. Jamí xa̱bo̱ tsí naꞌwa̱a̱n iya najnga̱a̱ rá, mbroꞌon nune̱-majnga̱-mijnée̱. 8 Xómáꞌ ikháánꞌlóꞌ, tsáánꞌ juwalóꞌ ná nambiꞌi agu rá, ga̱ꞌne rí na̱xa̱ba̱ꞌlóꞌ. Numuu rí wéje̱ máꞌ a̱kia̱nꞌlóꞌ ná inuu Ana̱ꞌlóꞌ jamí nandalóꞌ máꞌ juꞌñúú xa̱bo̱, rí ñajuun xómá ajwa̱nꞌ rí katajmuu ná xo̱xta̱ꞌlóꞌ jamí tsu̱da̱ꞌlóꞌ. Mangaa máꞌ guáꞌthi̱ínlóꞌ ga̱jma̱á mbá jañii a̱kia̱nꞌlóꞌ rí ma̱jríñáaꞌlóꞌ, rí ñajuun xómá xtéde̱ ajwa̱nꞌ rí nambáyúu idxa̱ꞌlóꞌ.

9 Numuu rí Ana̱ꞌlóꞌ táraꞌwáa̱nꞌlóꞌ kajngó ma̱ꞌnii̱ rí mu̱drígúlóꞌ jamínu̱ꞌ, rí niraꞌwáa̱nꞌlóꞌ kajngó ma̱jríñáaꞌlóꞌ ga̱jma̱á majñu̱u̱ rí neꞌne Tátiálóꞌ Jesukrísto̱.

34 »Gu̱ña̱wa̱n-mijnálaꞌ, ra̱ꞌkhá ma̱ꞌne gúkú a̱kia̱nꞌlaꞌ gáꞌne rí napeꞌtso guéñalaꞌ, rí najngáanꞌlaꞌ, jamí rí phú naxná-gamiéjwanlaꞌ eꞌne rí ríga̱ ná numbaa ge̱jyoꞌ. Kajngó ma̱xáꞌne rí nda̱a̱ ajngóo gáꞌkha̱ mbiꞌi rúꞌkhue̱n ná inalaꞌ. 35 Numuu rí asndo xó mbá katsáꞌkhán jaꞌnii ma̱ga̱nú rí ma̱gíꞌníí mbá xúgíin xa̱bo̱ numbaa. 36 Ikhaa jngó ga̱juwa-na̱ma̱ñalaꞌ, gu̱tha̱n-jáñíílaꞌ máꞌ xúꞌkhue̱n Ana̱ꞌlóꞌ, kajngó ma̱goo ma̱jríñáaꞌlaꞌ inuu mbá xúgíí rí na̱ꞌkha̱ ma̱gíꞌníí xa̱bo̱, jamí ma̱goo mu̱xna̱xí-mijnálaꞌ ná inuu A̱dée Xa̱bo̱ Numbaa».

8 A̱ngui̱nꞌ, tsáanꞌ phú nandoꞌ ja̱ya̱ꞌlaꞌ, ma̱xámbumalaꞌ rí ná inuu Ana̱ꞌlóꞌ, mbá mbiꞌi jaꞌnii xómá mbá míl (1 000) tsigu, jamí rí mbá míl tsigu jaꞌnii xómá mbá mbiꞌi. 9 Ra̱ꞌkhá máꞌ numuu rí naꞌne-gajyúu Táta̱ rí ma̱ꞌne-mbánuu rí nixuda-mina̱ꞌ, xómá rí nu̱ndxa̱ꞌwa̱-mijná mbá tikhuun xa̱bo̱, rí i̱ndo̱ó máꞌ numuu rí phú mba̱a̱ a̱kuii̱n gíꞌdáa̱nꞌlaꞌ. Tsíyoo Ana̱ꞌlóꞌ rí ma̱ja̱ñúu nimbáa xa̱bo̱, rí nandoo̱ rí mbá xúgíin xa̱bo̱ ma̱thanga̱a a̱kui̱ín ná inuu̱ ikhaa̱. 10 Xómáꞌ Táta̱ ma̱ꞌkhaa̱ mbá mbiꞌi rí ndawa̱a̱ tsí i̱ju̱mu̱u̱, xómá na̱ꞌkha̱ mbáa ku̱ꞌwá awúun mbroꞌon.* Ído̱ gága̱nú mbiꞌi rúꞌkhue̱n, phú gakhe̱ ma̱wán namídá rí ma̱mbáa mbá xúgíí mikhu, jamí mbá xúgíí rí ríga̱ ná inuu ne̱ ma̱ꞌni̱i idi mbá jayu gáꞌne agu. Xúꞌkhue̱n máꞌ ju̱ba̱ꞌ mangaa, mbá xúgíí rí ni̱gu̱ma ná inuu ne̱ mi̱kha.*

11 Xkuaꞌnii ma̱mbáa mbá xúgíí rí ríga̱. Ikhaa numuu rúꞌkhue̱n, ikháanꞌlaꞌ jaꞌyoo rí ma̱juwalaꞌ xómá rí nandoo Ana̱ꞌlóꞌ jamí rí mu̱xna̱xí-mijnálaꞌ mbá jayu ná ñawúu̱n, 12 awúun máꞌ rí guáꞌthi̱ínlaꞌ jamí rí juwalaꞌ xawi rí ma̱ga̱nú mbiꞌi rí Ana̱ꞌlóꞌ maxúdaa awan ga̱jma̱á numúú xa̱bo̱. Mbiꞌi máꞌ rúꞌkhue̱n mi̱kha mbá xúgíí mikhu jamí ma̱mbáa ne̱, xúꞌkhue̱n máꞌ rí ríga̱ ná inuu ju̱ba̱ꞌ ma̱ꞌne-iya̱a ne̱ mbá jayu gáꞌne agu. 13 Xómáꞌ ikháánꞌlóꞌ guáꞌthi̱ínlóꞌ mbá mikhu nuxe̱ꞌ jamí mbá ju̱ba̱ꞌ nuxe̱ꞌ, xómá rí Ana̱ꞌlóꞌ nixuda-mina̱ꞌ rí ma̱ꞌne ku̱maa, ná mbá xúgíin xa̱bo̱ mune̱ i̱ndo̱ó máꞌ rí nandoo̱ ikhaa̱.

51 Gu̱dxawíín májánlaꞌ, numuu rí ma̱tha̱nꞌlaꞌ awan drígo̱o̱ Ana̱ꞌlóꞌ rí i̱ndo̱ó máꞌ ikhaa̱ ni̱gi̱da̱ꞌ idxu̱u̱ nákhí wajyúú: Ra̱ꞌkhá mbá xúgiáanꞌlóꞌ ma̱ja̱ñálóꞌ, i̱ndo̱ó máꞌ numuu rí mbá xúgiáanꞌlóꞌ ma̱xtiꞌkhuáanꞌlóꞌ mbá jayu. 52 Mbá nacha̱ jayu gáꞌne, xómá rí naxpáduu xa̱bo̱, ído̱ gáwán rí nda̱wa̱á jayu ajwa̱nꞌ e̱ꞌmbi. Numuu rí ma̱wán e̱ꞌmbi, jamí tsí nijáñúú mbuyaa̱ mbiꞌñúu̱ rí ma̱ju̱wée̱ꞌ jámuu, xómáꞌ ikháánꞌlóꞌ ma̱xtiꞌkhuáanꞌlóꞌ mbá jayu.

1 Nda̱wa̱á a̱ꞌkhue̱n ndi̱yo̱o̱ mbá mikhu nuxe̱ꞌ jamí mbá ju̱ba̱ꞌ nuxe̱ꞌ, numuu rí mikhu jamí ju̱ba̱ꞌ rí ginii nánda̱a̱ ne̱. Nánda̱a̱ máꞌ iya a̱pha̱ mangaa. 2 Jamí ikhúúnꞌ Juáán* ndi̱yo̱o̱ xuajñuu Ana̱ꞌlóꞌ mangaa, xuajen Jerusalén rí nuxe̱ꞌ, rí na̱ga̱taa mikhuíí ná xtáa Ana̱ꞌlóꞌ, asndo xó mbáa dxáꞌgú tsí neꞌne-karatha-mina̱aꞌ rí mbayáa a̱jmbe̱e jaꞌnii ne̱. 3 A̱ꞌkhue̱n ni̱dxawuun mbá a̱ꞌwá rí phú gakhe̱ naꞌthán ná mikhuíí:* «A̱gu̱ya̱álaꞌ rí ná majñu̱ú xa̱bo̱ numbaa ꞌgí guꞌwóo Ana̱ꞌlóꞌ rí xúge̱ꞌ rá, jamí ikhaa̱ ma̱xtáa̱ gajmíi̱. Xómáꞌ ikhii̱n ma̱nindxúu̱n xa̱bo̱ xuajñuu̱, jamí jmína̱a̱ꞌ máꞌ Ana̱ꞌlóꞌ ma̱nindxu̱u̱ Anúu̱. 4 Ana̱ꞌlóꞌ maxúdíi mbá jayu iyoo idúu̱n. A̱ꞌkhue̱n rí nánguá ma̱ja̱ñúu̱, ni máꞌ nánguá mu̱mbi̱ye̱e̱ꞌ, ni máꞌ nánguá mu̱míníi̱, ni máꞌ nánguá me̱kho̱ xuñúu̱, numuu rí wámba̱ máꞌ rí ni̱ꞌkha̱-raríga̱ nákhí wapha».