Legalidades

Fye kwu əfyehni gafyi n aikwoda akwnu

1 Fa zahozahoyi waa əwohni gadna ń aikwoda akwnu, ntuge ikwo to lo m, akpəge ədo ń Shekwoyi wo la shi nyi. Ikwo ń kwo lo nyi, Shekwoyi nu ɓə shi kwo. 2 Ntucenu, zahozahoyi ń wo gnyiapaapa lo n ikwoi, wo gnyiapaapa n ənyai nu n Shekwoyi wo la shi, jesnu aza yi n ɓa zhni ce, ɓa ɓe ɓahni n owadai nu. 3 Ntuge abegyiyi to zhni anya ədnanazhii nu ń aza yi aba ń ɓa zhni aɓo manai nyi m, ama ń aza aba n ɓa zhni aɓo nukwoi, ɓa wodna. Ho ncei pmalo ha gnyi ntna ədna ikwoda nya? Akpəge ho zhni əɓo ń kwo bmya jesnu ń a ɓa ci ho. 4 Ntuge əza n ikwo dna ń əwo akwnu, wo zhni Shekwoyi tnutnuyi nu, nabai n aɓo ɓa lo n bmya. Ama ń fya zhni əɓo nukwoi, fye wodna, ntuge abegyiyi ta la əbeyaakwo ntna ɓətukwo m. Ɓa zhni Shekwoyi atnutnuyi nu, aminagyi shiyi nabai ɓa ga aɓənukwoizhniyi tata. 5 Ntucenu, kwo zhni ɓəshishi nu fya kwu əfyehni ga fyi ń aikwoda akwnu, toge n ɓwasnu ntu ń tata ɓo m, ama jesnu ntu n bwugbafu ɓwa əho tukwovnyi nya ɓo.

6 Dəye nu je əɓo zhni ń kwo zhni fyei gba gədu, ntuge aikwoda zhni Shekwoyi atnutnuyi nu, ń ɓa kwu əɓa əsa ga vnyanya ntu əbegyi ɓo. 7 Fye ga zahozahoyi ənya n fye ń əkwo ətai shi wo: N fye n gədui nu shi əta, a gba gədu; n gnyikwogyi nu, akpəge a gba gnyikwogyi; ngye mwamwaga nu, akpəge a ga mwamwa; ngye lalatu nu, akpəge latu.

Yeyewu nu zhni owa nunu

8 Fye to kwu zhi n atai shi m, akpəge yeyewu əta, ədo n taa zo kwo gba nyi m, ntuge zahozahoyi ń wo wu azaje yeye wo kwu owa nu.

12 Fye gyianyì manai fyi n ashnagbayi atasni, nabai kwo ɓai gye nge fye zhni əɓənukwoi nu, ɓa ɓá gye əfye atnutnu manai əwye njesnu ɓa la Shekwoyi tu əwyi n wo ɓə ɓe yi gnaɓyi ncei. 13 Fye kwu əfyehni tukwo ga fyi n azanyikwoci ikwo dəhodəhoi akwnu ntu n Dagayi ɓo: kwo n əsu aba, ngye ikwo duduyi, 14 kwo n agwomna aba, aza n wo tnu n ɓai ɓa ta aza yi n ɓa zhni ɓənukwoi, njesnu ɓa ci aza yi n ɓa zhni əɓo n kwo wu cewo.

17 Yi ye ha gna yi nsayi, knyiyi nu zhni əho ɓəmwi a? Kwo wulo ceewo a gba Kaisa begyi gədu, kwo a to gba ma a?"

18 Ama Yeisu, woi kpe əɓa bwugba nukwoi ɓəmwi ye, wa gna, "Əfye akwocednayi, knyiyi nu zhni fyei pyi mi agbúlu a? 19 Fye wu mi gyiwye zhnana n fye gba gədu ncei nyi." Ɓa ɓe wo n sisinkəɓwo yi, 20 Wa nya ɓa, "Nyika dogbe nu tu nyi a? Jesnu nyika əye nu kwnukpe n kwo a?"

21 Ɓa dnaɓəgbe, "Kaisa nya nu."

Nlonu wa gna ɓa, "Ntulonu fye ga Kaisa ənya n kwo zhni Kaisa nya, jesnu Shekwoyi ənya n kwo zhni Shekwoyi nya."

Dagayipwuwa gədu

24 Əsa n Yeisu n əwo amwutuyii ɓə kwu si Kapanam, Dagayipwuwa agədu gwoyi shekel tokwnui nya, ɓa ɓe da Byitusu ɓa nyaɓo, "Əfye nyawuyi ta kwnu Dagayipwuwa gədu m?"

25 Wa dnaɓəgbe, "Əə, wo kwnu lo." Əsa n Byitusu ɓə loɓe pwuwa, Yeisu nu ɓə kpmi ɓəda da. Wa nyaɓo, "Sima, ho zhninubwo ge nanu a? Asu anyì nya gwo gədu n anyika nu a; n əɓa aɓyi nu kwo n azaje a?"

26 Byitusu wa dnaɓəgbe, "N azaje nu."

Yeisu wa gna wo, "A gye ɓa n əɓa aɓyi aɓwai kwnukwnuiya lo nuu. 27 Ama nabai to ya ɓe n abwii m, lo nuwna-znudna, hoi she əho əgwo ya fyi n kwo. Əbmya kpmisnui n ho ɓə wna; gwu əkwo əgbe ya, ho ɓa gye shekel gbmanyi dna n kwo. Gbmi kwo haa ga ɓa, əmi gədu ɓədo n əfye nyai."

25 "Kwnu aɓəya n pyepyei n əho nuwnuyii n wo lo ń hoi n owada bwokwnu. Zhni ce fyei kwnu lo n zokwo, nabai to əho nuwnuyii wa ta ho ya dna ń owadayi akwnu m, jesnu owadayi woi dna ho n bwusiɓyiyida akwnu, ɓa she ho ya dna n zhalu m. 26 Ɓəhnihni mi gna ho, ho to ɓə gbmiya m, akpəge ho kwu sisinkəɓwo kpmacei zo gba.

18 Ntu əmi ɓo a ɓə kwu fye lo ncei n agwomna abye ɓədo n asui ngye aɓəkwnuyi ga əɓa jesnu ń Abyedoi. 19 Ama she a wna fye, ce to wo fye m, ntu ənya ɓo ń fye ɓa da m, kwo shi fye ɓa da kwo m. N əsayii, a ɓə gna fye əɓo ń fye ɓa da,

Yeisu Mama

1 Fyi ń anyipyei yii, Kaisa Agwotusu wa ga ɓəgbetu nge a bà aza ń Roma əknyi vnyanya. 2 (Dəye nu ɓə zhni azaba kpmisnui əsa ń Kwurinus ɓə zhni gwomna tu n Siriya nyi.) 3 Zahozahoyi wa jezelo əwo əzhi nabai wa lo aa ka əwo əye.

4 Ntulonu Yusufu cè, wa fa Nazereti dna n Gəlili, wa gwnulo Baitalamyi ń Yahudiya əknyi ń Dawuda əzhi, ntuge wo ɓə gbmi ń əbyé yi nu. 5 Wo ɓə lo əzhi yi aa ka əwo əye nu ɓədo n Mariyamwui ń a ɓə la wo dù, wa pamwula n woi nyi, jesnu əwo əɓyima sa ɓə la gá kwa si.

9 ntuge abwokwnumi yaakwo la gwuya gnyi ga mi ntu tnutnu abyegyi ɓo, jesnu aza mwa bəgyé lo n ɓa gnyiapaapa n mii.

10 Byilatusu wa gna, "Ho ta ye lo ha dna mi ɓəgbe m? Ho ta kpəlo nge mi n ikwoi lo maa ho loya kwo ma znu ho du m?"

11 Yeisu wa dnaɓəgbe, "Ho taa ɓwa ikwo tu n əmi to ai ga ho kwo n əshemi nu m. Ntucenu əza n wa dna mi n əho akwnu nyi, əwo nu n ɓəgyi leifyi yaakwo gnadui lo."