1 N labmilabmii, apirisiti atukwoda vnyanya n abyedai ɓa pakwúlu shi ɓa ɓá wu Yeisu n wú. 2 Ntulonu ɓa pa wo, ɓa gbmiya lo n woi jesnu ɓaa wo taya ga Gwomna Byilatusu.

3 Shi Yahuda, əza n wo ɓə ɓwu wo nyi, ɓə gye nge a la əfyi owa znutu Yeisu, bwugba kwa wnu wo dəidəi, wa jezelo n azulufa shiitai ga apirisiti tukwoda n abyedai. 4 Wa gna, "Mi kwu leifyi zhni, ntuge mi la əza ɓwu n əwo ami to n ɓəgyii lo m."

Ɓa dnaɓəgbe, "Yii gye əyi anuwna a? Dəye ce əho ɓəzhnizhni nu."

5 Nlonu Yahuda wa she agyiwye yi ya zhi n Dagayipwuwa wa laka. Nlonu wa lo waa əwohni gyitu.

6 Apirisiti atukwoda ɓa kwu gyiwye azhnanai ɓa gna, "Owa to ncei ye lo ge a ya gyiwye ye fyi n nyaɓwasofyiba m, shikwonyi kwo zhni ami gyiwye nu." 7 Ntulonu ɓa kwu gbegwnu, ɓa zhniapma n gyiwye yii ɓa si shakwnumiyi əknyi, ɓaa kwo zè avnyigwo azhiɓeyi abyi ba. 8 Cenuzhni ai yi abaayi nge Əknyi Ami nya, nya n naiye. 9 Nlonu əɓo n sheɓəgwognayi Irimyiya ɓə da nyi, kwa kwu nu: "Ɓa kwu azulufa azhnanai shiita, gyiwye əwo kwnúkwnú nya n Israila aza ɓə znutu n əwo tukwo, 10 jesnu ɓa si shakwnumiyi əknyi, ngye shi Dagayi ɓə tu mi əgbe."

11 Əsa fyewyi Yeisu wa gnyiagnyi n gwomna abye, jesnu gwomna wa nya wo əɓo, "Əho nu zhni Ayahudiyi əsu?"

Wa dnaɓəgbe, "Ho kwu da lonu."

12 She apirisiti atukwoda n abyedai ɓə tu wo əɓo lonu, to wa dnaɓəgbe m. 13 Nlonu Byilatusu wa nya wo əɓo, "Ho ta wo ɓəgbmi ye lo n ɓa ɓe ncei tu n əho tukwo nyi m?" 14 Ama to Yeisu wa dnaɓəgbe m; kwo tu n ɓətu gbmanyi m, kwaa zè ɓəwowoi yaakwo n gwomna aba.

15 N əsayii kwo ɓə zhni Gwomna kwnunu nu, ń awyefna əsa yi, wa lo zhaluda ya n deeji la knyi nyi. 16 Dna n əsayii, ɓa ɓə n zhaluda tawoɓoi, ai kpe wo ye, n wnadna n zhalu, ai yi əwo nge Barabas. 17 Ntulonu she deeji ɓəə la yezhi, Byilatusu wa nya ɓa əɓo, "Nyika nu n fye ye a loya ga fye a: Barabas kwo Yeisu n a yi Kirisiti nyi a?" 18 Ntuge wo ɓə kwu kpe ge shewo nu ɓə zhni ɓa, ɓaa Yeisu dna n əwo akwnu.

19 Əsa n Byilatusu ɓə sasetu n owada shnikpegye, əwo nyikwo wa tnu wo n ɓəda yei: "To zhni ɓəhoɓəhoi tu ń tnaɓətuyi ye tukwo m, ntuge mi kwu azhnì yaakwo gyewye n naiye n ənanu ntu n əwo əɓo."

20 Ama apirisiti atukwoda n abyedai ɓa tna deejii aɓwa nge ɓa nya Barabas nu ɓo jesnu nge a la Yeisu wu.

21 Gwomna wa nyaɓo, "Nyika nu n aza ngwnu-aba ye n fye ncei pma a loya ga fye a?"

Ɓa dnaɓəgbe əɓa vnyanya, "Barabas."

22 Byilatusu wa nya, "Knyiyi nu n mi ɓa zhni, nsayi, n Yeisui, n a yi Kirisiti nyi a?"

Əɓa vnyanya ɓa dnaɓəgbe, "A la wo Znudu!"

23 Byilatusu wa nyaɓo, "Ntu n knyiɓei a? Knyi əɓogalai nu n wo kwu zhni a?"

Ama ɓa ɓəwyi əɓa vnyanya n əgbei latu, "A la wo znudu!"

24 She Byilatusu ɓə gye nge ɓəda ye taa si n woi n ɓwaho m, ama n əkwoɓwi ɓa ya wyiɓe, wa la nuwna, wa na əwo aɓwa n bəgyé abye. Wa gna, "Əmi aɓwa to fyilo n za ye ami ɓo m. Əfye ɓəzhnizhni nu!"

25 Aza vnyanya ɓa dnaɓəgbe, "Əwo ami ɓa la tu n əyi ɓədo n əyi aɓyii!"

26 Nlonu wa lo Barabas ya ga ɓa. Ama wa zhni a ɓye Yeisu ya, jesnu waa wo taya ga ɓa, a lo ə la wo znudu.

27 Nlonu Gwomna akwnuyi, ɓa la Yeisu lo ncei n bwokwnu jesnu ɓa ye akwnuyi zhi vnyanya ɓa kwu shekna əwo. 28 Ɓa kpma wo aje ya jesnu ɓa kpe wo əje-byeibyei kpadalai, 29 nlonu ɓa pmyi fnunyi aknawui nya ɓaa kwo kwnu wo n tukwo. Ɓa dna wo bwusi n əwo ɓwaizhe. Nlonu ɓa knyiakwokwo zhi n əwo abye, ɓa kpe wo agyè. Ɓai gna, "Haamwasa, əsu Ayahudiyi nya!" 30 Ɓa knyiaknyí kpe wo, jesnu ɓa la bwusi ɓa znu wo n tukwo, ɓai bmakpe-bmakpe. 31 Shi ɓa ɓə kwu agyè zo wo kpe, ɓa kpma wo əje-kpadalai ya, ɓa kpe wo əwohni aje. Nlonu ɓa lo n woi ə lo wo znudu.

32 She ɓa ɓə zhi ɓai kwnuya lo, ɓa gye əza woi gbmi n Sireni, ai yi wo ge Sima, ɓa tu wo znudu n akalái. 33 Ɓa si abaho ai yi ge Gwolgwota (n kwo nu gyi nge "Tukwobwe aba"). 34 N abaayi ɓa ga Yeisu anamnuwna nge wo sni, n gbmiaje n bədobədoi; ama shi wo ɓə la kwo towo, to wa ye kwo sni ɓo m. 35 She ɓa ɓə la wo znudu, ɓa gna əwo aje n əbashei. 36 Ɓa kwu sase zhi, ɓai shi wo awye n abaayi. 37 Tu n əwo tukwo əshe, ɓa kwu əwo ɓəgyi kakpe ɓaa kwo gyitu:

Yeisu nu nyi,

Ayahudiyi Əsu.

38 A kwu akalákpeyi ngwnu-aba znudu kpe n kwnusnu n woi, gbmanyi n ma n əwo ɓwaizheɓwa jesnu gbmanyi n ma n əwo ɓwaipmiɓwa. 39 Aza yi n ɓa ɓə duya n səpai, ɓa knyi wo akpmi, ɓai myi atukwo, 40 jesnu ɓai gna, "Əho n ho ɓa la Dagayipwuwa ya jesnu ha mi kwo dna n anyipyei ngwnu-ata, gnyi əhohni! Kashi ɓe n znudu, ngye ho zhni Shekwoyi Nugwnu nu!" 41 N ɓwasnu nlonu apirisiti atukwoda, ɓədo n owa anyawuyii n abyedai ɓa kpe wo agyè. 42 Ɓa gna, "Wo ɓə la azaje gnyi, ama wo ta myilo n əwohni gnyi m! Əwo nu zhni Israila əsu! Fa wa kashi shnizhi n znudu nsaiye, nabai ya ga wo gaiciya. 43 Wo kpema lo n Shekwoyi nu. Fa Shekwoyi wa gwo wo ya nsaiye ngye wo ye wo lo, ntuge wo kwu gna, ‘Mi zhni Shekwoyi Nugwnu nu.’ " 44 N ɓwasnu nlonu, akalákpeyi n a ɓə n ɓai znudu kpe n kwnusnu n woi nyi, ɓa knyi wo akpmi cè.

45 Ənya n kwo ɓə laka n nyipyei atukwogwnu kwoi lo snukna ngwnu-ata n nyipyei, wyegbma kwa ɓe kpe n əknyii vnyanya. 46 Əsa ngye snukna ngwnu-ata n nyipyei, Yeisu wa yì n bəgyei latu, "Eloi, Eloi, lama sabachthani?" (N əkwo nu gyi nge "Əmi Shekwoyi, əmi Shekwoyi, knyiyi nu zhni ho nyi la mi ya a?")

47 She aza yi n ɓa ɓə gnyiagnyi zhi n abaayi ɓə wo dəye, ɓa gna, "Wo yi Iliya lo."

48 N əsayisayii zaknayi n ɓa wa bwusi lo wa ɓe n soosoi. Wa da kwo fyi n anamnuwna mamai, wa pa kwo gyi n bwusi tukwo, wa ga Yeisu əkwo nge wo sni. 49 Azaje ɓa gna, "Nsaiye fye fa wo. Yi kwu zhi ya gye ngye Iliya ɓa ɓe wa gnyi wo."

50 Njesnu She Yeisu ɓəə kwu əɓwici n bəgyei lawu, wa dna əsnu.

51 Nsayii əjesa n a ɓə ncei kna, Dagayipwuwa nya kwa gnajeya ngwnu-aba, ənya n kwo laka n əshe kwoi lo snuta. Əknyi kwa jeashna, ape ɓa ɓaya 52 avnyigwo ɓa gwuya. Aza agyigyiyi anayi n ɓa ɓə kwu fyí nyi, ɓaa jezeɓe n wyewyeyi. 53 Ɓa kwnuɓe n avnyigwo n Yeisu kalala avnu ɓa lo əzhiyaakwo gyigyiyi ɓa kwnuzhi da aza bəgyé.

54 Əsa n bəzhetagyida n aza yii n ɓa ɓə zhi ɓai gwu Yeisu nyi, ɓə gye əknyi kwoi jeashna, jesnu n aɓo vnyanya n ɓa ɓə zhni nyi, ədna kwa wo ɓa, jesnu ɓa daɓo, "Ɓəhnihni wo ɓə zhni Shekwoyi Nugwnu nu!"

55 Anyikwoza n mwa bəgyé ɓe zhi n abaayi, ɓai shiawye n tagnyi. Ɓa ɓə kwnu ń Gəlili nù ɓai vyi Yeisu ɓai wna wo əɓo akna. 56 N əɓa atasni, Mariyamwu Magadalayi, Mariyamwu Jemyis əya n Yusufui, jesnu Zebədi anugwnu əyai.

57 Shi wyeshe ɓə gnyi kwoi she, gyiwyeda wa ɓe woi gbmi n Arimatiya, ai yi wo nge Yusufu, əwo n wo ɓə la əwohni ga, waa zè Yeisu mwutuyi nyi. 58 Wa lo da Byilatusu, wa nya Yeisu nayi əɓo, Byilatusu wa ga əgbe nge a la Yeisu nayi ga wo. 59 Yusufu wa la Yeisu nayi, waa kwo pa dna n əje luweluwei gyigyii. 60 Waa kwo dna n əwohni vnyigwo woiwoi n wo ɓəə la nyìi n əpe nyi. Wa pmyi kwuta yaakwo ya tu n vnyigwo aloba jesnu wa lo wo nya. 61 Mariyamwu Magadalayi n Mariyamwu dəyii ɓa ɓə sase kpe n awyei ce n vnyigwo nu.

62 N əfyegyizhii, əwyi n kwo ɓo ya tu Paska nyagyi zhni nya nyi, apirisiti atukwoda jesnu n Afarisiyii ɓa lo da Byilatusu. 63 Ɓa gna, "Haamwasa, yi pá lo nge əsa n kwocednayi ɓə ye gnyi n wyewyeyi nyi, wo ɓə kwu gna, ‘N anyipyei ngwnu-ata avnu, mi ɓə je kala la.’ 64 Ntulonu, ga əgbe a gwu vnyigwo cenyicenyi nya nyipyei ngwnu-ata. Ntolonu m, əwo amwutuyi ɓa myi ɓa lo ɓai wyi əwo nayi jesnu ɓai gna aza nge wo la laka n əfyi. Kwocedna kpmasnui ye ɓə la du kpmisnuyi."

65 Byilatusu wa dnaɓəgbe, "La abagwuyi kwu. Lo, fye kpe nge vnyigwo n knaknayi lo ngye shi fye ɓa myi." 66 Ntulonu, ɓa lo ɓa zhni shi a ɓa gye nge vnyigwo knaknayi lo, ɓaa kwo tu əznù n kwutai jesnu ɓa tnu n azagwuyii zhi n ɓo.