1 She Yeisu ɓə shniɓe n əpe ɓe əknyi, deeji yaakwo kwa vyi wo. 2 Əzaho n nayiwnu nyasnai wa ɓe wa ceakwokwo shi ń əwo abye wa gna, "Dagayi, ngye əho ɓəye nu, ho ɓa myi ha ga mi kágna."

3 Yeisu wa ta əwo əɓwa ya wa to wo əɓwa. Wa gna, "Əmi ɓəye nu, gwo kágna!" Nsayisayii wa ɓwa kágna n əwo nayiwnu nyasna. 4 Nlonu Yeisu wa gna wo, "To gna zahozahoyi ɓəye m. Ama, lo ho wu əhohni tukwo n pirisiti aba, jesnu ha ga nyaga n Mwusa owa ɓə tugbe nyi, ngye ɓəgbmi ga ɓa."

5 She Yeisu ɓə lo Kapanam, Roma bəzhetagyida ho wa ɓe da wo, woi nya wo bmazhni ɓo. 6 Wa gna, "Dagayi, əmi tnutnuyi shilo n apyi n nayii fyífyii, woi gyeazhnì n mwa."

7 Yeisu wa gna wo, "Mi ɓe ma ka wo gna nuu?"

8 Roma bəzhetagyida wa dnaɓəgbe, "Dagayi, mi to kwnuce lo ha ɓe əmi pwuwa m. Ama da ɓədagbma, əmi tnutnuyi ɓa ɓwa kágna. 9 Ntuge əmi n mihni mi zhni ikwoda nu, n akwnuyii fyi n əmi akwnu. Mi gna əza ye, ‘Lo,’ wa lo; əza yi, ‘Ɓe,’ wa ɓe. Mi gna əmi tnutnuyi, ‘Zhni ɓəye,’ wa zhni kwo."

10 She Yeisu ɓə wo əɓo ye, ca wo wo, wa gna aza n ɓa vyi wo nyi, "Ɓəhnihni mi gna fye, mi too ɓwa əzaho dna ń Israila n gaiciyaganunui yaakwo ye pyai m. 11 Mi gna fye nge bəgyé ɓə kwnuɓe ń kpəkwó n shnikwó, jesnu ɓai ɓe ɓa kwu sase kpe ń agbmada nyagyigyi awyefna aba n kwnusnu n Ibrahim, Ishakwu n Yakwuɓwui ń əshebemi. 12 Ama a ɓə la aza n ɓa zhni əbemi nya kwnuya zhi n əbmyi fyi n wyegbma, aba n a ciɓwi ai gyi anyikna."

13 Nlonu Yeisu wa gna Roma bəzhetagyida, "Lo! Fa kwa zhni n ɓwasnu shi ho la gaiciyaga nge kwo ɓa zhni nyi." Njesnu əwo tnutnuyi waa kágna ɓwa nsayii.

14 She Yeisu ɓə lodna n Byitusu pwuwa, wa gye Byitusu yezhi nyikwozada n yatu n gədo n nayi-nagwnui. 15 Wa to wo əɓwa jesnu nayi-nagwnu kwa fa wo, wa laka gnyiagnyi, wa ya wo ɓəvyi.

16 She wyeshe ɓə she, a ɓe wo n bəgyéi n ɓa ɓə n asei fyi, wa kwnu azafnu nukwoi ya n ɓədagbmai, wa ká anyasnayi gna vnyanya. 17 Dəye ɓə ye kwa nu əɓo nu ń a ɓəə kwu da dna n sheɓəgwognayi Ishaya əgbe:

"Wo ɓə la əyi akalágba kwu shi jesnu

wa gwo əyi anyasna kpe əwohni."

18 She Yeisu ɓə gye deeji n shegwnu wo zhi, wa ga əgbe nge ɓa piyalo nuwna-znudna əkpma dəyi. 19 Nlonu owa nyawuyi ho wa ɓe da wo wa gna, "Nyawuyi, mi ɓa vyi ho abahobahoi n ha lo."

20 Yeisu wa dnaɓəgbe, "Acamcam n aɓwoi lo jesnu alú n amai kpəlo, ama Əza Nugwnu too n abai lo n wo ɓa ya əwo tukwo shi m."

21 Mwutuyi dəho wa gna wo, "Dagayi, fa, ma lo mii la əmi dada byi kpa."

22 Ama Yeisu wa gna wo, "Vyi mi, fa azafyí ɓa byi əɓa aza afyífyiyi."

23 Nlonu wa lodna n əya nuwnanya jesnu əwo amwutuyi ɓa vyi wo. 24 Ntna əsagyii agbmaase nukwoi ɓa ɓe kpe n nuwna-znudna, ntulonu nuwna-adokwo ɓa shefyi n əya nuwnanya. Ama Yeisu ɓə dna woi wnagye. 25 Amwutuyi ɓa lo ɓa kwnu wo agyewyiya, ɓai gna, "Dagayi, gnyi yi! Yi ye ya ɓwunuwna nu!"

26 Wa dnaɓəgbe, "Əfye agaiciyaganunui agbagbaida, knyiyi nu zhni fyei wodna nsnu nlai a?" Nlonu wa laka gnyi wa gnaknyi ase n nuwna-adokwoi, ɓaa nazhi vnyanya.

27 Ca wo aza jesnu ɓa nyaɓo, "Nyika pya nu gnyi n əza yei a? Kwo ase n nuwna-adokwoi ɓai vyi əwo ɓəgbetu!"

28 She wo ɓə si Gadara əkpma dəyi, aza ngwnu-aba n nunui n ase nukwoi ɓai kwnu n avnyigwo ɓa shegwnu wo. Ɓa ɓəə zhni aɓəgala zhniyi nu to aza ɓai myi n zokwo yi wna m. 29 Ɓa fyiakwu, "Shekwoyi Nugwnu, ho ye knyiyi nu n əyi a? Ha ɓe n ya ha kpe yi azhnì nu, to əkwo əsa kwoi si m?"

30 N tagnyi fyewyi, abwulutu gəluce yaakwo ɓə fyi ɓai gyi anyagyi. 31 Ase nukwoi ɓa ɓa Yeisu, "N ho ɓa kwnu yi ya, tnu n yii fyi n abwulutu gəluce."

32 Wa gna ɓa, "Fye lo!" Nlonu ɓa kwnuya ɓa lo ɓa lofyi n abwulutu, gəluce yi vnyanya ɓa bwusi shnilo n agəgyigəgyii ɓaa kaya fyi n nuwna-znudna ɓa kwu fyí fyi n nuwna. 33 Abwulutu knayi ɓa bwusi, ɓa lofyi n əzhimi ɓa wu aɓo ye anabagyi vnyanya, ɓədo she a ɓə kwnu aza yi ase nukwoi ya. 34 Nlonu əzhi vnyanya kwa kwnu lo kwa shegwnu Yeisu. Njesnu she ɓa ɓə gye wo əwye, ɓa ɓa wo nge wo la əɓa əknyi fa.