1 Yeisu wa je əɓo da ń ɓai n ɓəsisii, woi gna: 2 "Əshebemi wulo ngye əsu nu ń wo ɓə shi mwula awyefna ntu ń əwo nugwnu ɓo. 3 Wa tnu əwo atnutnuyi ń aza yi aba ń wo ɓəə kwu awyefna pa ɓa nyi nge ɓa ɓe, ama to ɓa ye ɓe ɓo m.

4 "Nlonu wa ɓe atnutnuyi, wa je tnu n ɓai woi gna, ‘Fye gna aza yi ń a ɓə kwu awyefna pa ɓa nyi nge mi kwu wyeshenyagyi zhnizhi: Mi kwu anakwonugbai wu, jesnu nyahonyahoi n zhi lo kwoi pmi. Fye ɓe amwula awyefna.’

5 "Ama to ɓa zè əwye m, ɓaa gnamyi; gbmanyi wa lo əwo ofwa, əzado wa lo əwo aɓwaze. 6 Aza n ɓa ɓə ce nyi, ɓa wna əwo atnutnuyi, ɓa kpe ɓa azhnì jesnu ɓa wu ɓa. 7 Minagyi napyei kwa gyi əsu. Wa tnu n əwo akwnuyii ɓa zhni azawuyii agbma jesnu ɓa kwu əɓa əzhiyaakwo kpəna.

8 "Nlonu wa gna əwo atnutnuyi, ‘A kwú amwula awyefna ɓo zozhni, ama aza ń mi ɓə yi nyi, ɓa to kwnuce lo ɓa ɓe m. 9 Ntucenu fye lo adnadna ɓwakwonu n abofyefyéi fyei yi zahozahoyi n fya gyewye.’ 10 Ntulonu atnutnuyi ɓa kwnuya lo adnadna ɓwakwonu, ɓa yi aza vnyanya n ɓa ɓə gyewye; anukwoi ɓədo n amanaii, mwulapa aba kwaa nu gnyi n azhiɓeyii.

11 "Ama əsa n əsu ɓə lo ɓe wá gye azhiɓeyi, wa gye əza dna ń ɓo, ń wo to ɓə n amwula ajei kpe m. 12 Wa nyaɓo, ‘Nugwnudo, ha lodna n abaye ń wunanu ntna amwula ajekpei a?’ Əza yi wa cegnyi pyi.

13 "Nlonu, əsu wa gna atnutnuyi, ‘Fye pa wo n aɓwa n apitai, fya shewoya shi əbmyi, dna n wyegbma, aba ń a ɓə ciɓwi ai gyi anyikna.’

14 "Ntuge a la bəgyé yi, ama aknyiknyiyi ɓwasnu lo fyewyi nu."

15 Nlonu Afarisiyi ɓa kwnuya lo ɓəə pakwúlu nabai ɓa wna wo dna n əwo aɓədagbma. 16 Ɓa tnu əɓa amwutuyi tnutnu lo wo aba n kwnusnu n Ahirudiyi. Ɓa gna, "Nyawuyi, yi kpəlo nge ho zhni əza gaiciyazhniyi nu, jesnu nge ho wu Shekwoyi zokwo nu ń kwo lodo lo n gaiciyanunui nyi. Aza ta myilo n ɓa pmyi ho awye m, ntuge ho ta shi əza awye lo kwo ɓa zhni anyika nu m. 17 Yi ye ha gna yi nsayi, knyiyi nu zhni əho ɓəmwi a? Kwo wulo ceewo a gba Kaisa begyi gədu, kwo a to gba ma a?"

18 Ama Yeisu, woi kpe əɓa bwugba nukwoi ɓəmwi ye, wa gna, "Əfye akwocednayi, knyiyi nu zhni fyei pyi mi agbúlu a? 19 Fye wu mi gyiwye zhnana n fye gba gədu ncei nyi." Ɓa ɓe wo n sisinkəɓwo yi, 20 Wa nya ɓa, "Nyika dogbe nu tu nyi a? Jesnu nyika əye nu kwnukpe n kwo a?"

21 Ɓa dnaɓəgbe, "Kaisa nya nu."

Nlonu wa gna ɓa, "Ntulonu fye ga Kaisa ənya n kwo zhni Kaisa nya, jesnu Shekwoyi ənya n kwo zhni Shekwoyi nya."

22 Əsa n ɓa ɓə wo lonu, ca wo ɓa. Ntucenu ɓa fa wo, ɓa wna əɓa zokwo.

23 N əwyi yii Asadusiyi, ń ɓa gna nge əfyikalakwu to lo nyi m, ɓa ɓe da wo n ɓənyai shi. 24 Ɓa gna, "Nyawuyi, Mwusa ɓə kwu gna yi nge ń zanugbai wa fyí ntna əɓyi, kwo zhni ɓəshishinu nge əwodo wa la nyigbayi yi, nabai wa ɓwa aɓyi ga wo. 25 Nsayii aza ɓə nyi ngwnu-tnaaba ɓai kwnu ń əyàmi gbmanyi fyi əyi atasni. Əza kpmisnuyi wa la nyikwo, waa fyí; shikwonyi wo to ɓəə ɓwa əɓyi m, waa əwo nyikwo yagnyi əwodo. 26 Əɓo gbmanyigbmanyi kwa ɓwa jezhni ń əzabaayii ń taayii, kwoi shnilo tnaaba yi. 27 N kpmasnu, nyikwoyi waa fyi. 28 Nsayi, dna ń əfyikalakwu, wo ɓə zhni nyika nyikwo nu ń aza tnaaba ye a, shikwonyi əɓa vnyanya ɓə kwu mwulapa n woi nyi a?"

29 Yeisu wa dnaɓəgbe, "Fye fyilo ń abaɓwi ntuge fye ta kpe Nyakagyigyiyi ye lo kwo Shekwoyi kalá m. 30 N əfyikalakwu wyii aza to ɓə pamwula kwo ɓai kna mwula m; ɓa ɓə wu ngye amaləka nu fyi ń əshemi. 31 Ama ntu n afyífyiyi kalakwu ɓo, fye too ba ənya ń Shekwoyi ɓə gna fye, 32 ‘Əmi nu zhni Shekwoyi Ibrahim nya, Shekwoyi Ishakwu nya, jesnu Shekwoyi Yakwuɓwu nya m’? Wo to zhni Shekwoyi azafyifyiyi nya nu m, ama awyewyeyi nya."

33 She deeji ɓə wo dəye, əwo nyawu ɓo kwa wo ɓa.

34 Shi Afarisiyi ɓə wo nge Yeisu wo la Asadusiyi znu əgbe nya, ɓa yezhi n abagbmanyi. 35 Zaknayi ń ɓa, owa gnayekpeyi wa mwi wo n ɓənya yei: 36 "Nyawuyi, knyidei nu zhni Owa ɓəgbetu duduyi a?"

37 Yeisu wa dnaɓəgbe: " ‘Ye Dagayi əho Shekwoyi n əho bwugbai vnyanya jesnu n əho wyewyeyii vnyanya jesnu n əho ədui vnyanya.’ 38 Dəye nu zhni kpmisnuyi jesnu ɓəgbetu dudui. 39 Njesnu baayi wulo ngye əkwo nu: ‘Ye əho kwnuzhiyi ngye əhohni.’ 40 Owa vnyanya n Sheɓəgwognayi nyawui, ɓa kpəlo ń aɓəgbetu ngwnu-aba ye nu."

41 Shi Afarisiyii ɓə la yezhi, Yeisu wa nya ɓa əɓo, 42 "Fye zhni ɓənubwo lo nge nanu ntu Kirisiti ɓo a? Wo zhni nyika nugwnu nu a?"

Ɓa dnaɓəgbe, "Dawuda nugwnu nu."

43 Wa gna ɓa, "Knyiyi nu zhni Dawuda, woi daɓo dna n Zafnu, wa yì wo ‘Dagayi a’? Ntuge wo ɓə gna,

44 " ‘Dagayi ɓə gna əmi Dagayi:

"La sasetu n əmi ɓwaizhe ɓwa

nya əsa ń mi ɓə kwu əho anuwnuyi fyi n əho apitabwada snuta." ’

45 Ngye Dawuda ɓə yi wo ‘Dagayi,’ kwo ɓa zè n wunanu waa zhni əwo nugwnu a?"

46 Əzaho to ɓə dna wo ɓədagbma ɓəgbe m, tunyi n wyiyii kwoi lo abye, əzaho to ɓə shna myi wa je wo əɓəho nya m.