1 N anyipyei tnaanyi avnu, Yeisu wa kwu Byitusu, Jemyis ɓədo n Yohanai, Jemyis ədo, wa gwnutu lo n ɓai ń əpe asnada ɓahniɓahni. 2 Tu n abaayi, waa znubma dna ń zafnu n əɓa awyeba. Əwo awyeba ɓa bmyana ngye nyipyei, jesnu əwo aje ɓa kwu fna palilii ngye bwuznagna. 3 Əsa fyewyi Mwusa n Iliyai ɓa kpmiyazhi n amwutuyi awyeba ɓai daɓo ń Yeisui.

4 Byitusu wa gna Yeisu, "Dagayi, kwo bmyalo shi yi kpəlo ń abaye. Ń ho ɓa ye, mi ɓa kpe alubwi ngwnu-ata; gbmanyi əho nya, gbmanyi Mwusa nya jesnu gbmanyi Iliya nya."

5 Woi ye gnyi woi daɓo, ənyì fnafnai kwa pwu ɓa, jesnu bəgye kwa gbmi ń ənyì kwa gna, "Əza ye nu zhni əmi Nugwnu, n mi ye wo, a da mi lo n woi zam. Fye kna wo tnubwa!"

6 She amwutuyi ɓə wo dəye, ɓa yazhi ń awyebai wu n əknyi n zhi n ədnai. 7 Ama Yeisu wa ɓe wa to ɓa əɓwa, wa gna, "Fye la kwukazhi, fye to zhni ədna wo m." 8 She ɓa ɓə kpmiawye shi wo, to ɓa gye Mwusa n Iliyai ye zhi m, akpəge Yeisu.

9 Shi ɓa ɓə ɓe ɓai kazhi shnizhi ń əpe, Yeisu wa ga ɓa ɓəgbetu, "Fye to gna zahozahoyi əɓo ń fye kwu gyewye nyi m, sai əsa n a ɓə la Əza Nugwnu laka n əfyi."

10 Amwutuyi ɓa nya wo əɓo, "Ngye nlonu, knyiyi nu zhni owa anyawuyi ɓai gna nge ɓəshishi nu Iliya waa ɓe n kpmisnu a?"

11 Yeisu wa dnaɓəgbe, "Ɓəhnihnii, Iliya ɓelo, jesnu wo ɓə la aɓo zhnizhi vnyanya. 12 Ama əmi nu gna fye, Iliya wo la luɓe, jesnu ɓa to ɓə kpe nge əwo nu m, ɓa zhni ɓəhoɓəhoi kpe wo ń kwo ɓə da ɓa. N ɓwasnu nlonu cè, Əza Nugwnu ɓə gyeazhnì dna ń əɓa akwnu." 13 Nlonu amwutuyi ɓa ɓwa awyega ge wo ɓə gnyi woi daɓo n ɓai ntu Yohana Batizimazhniyi əɓo nu.

14 She ɓa ɓə si deeji aba, əzaho wa ɓe da Yeisu wa ceakwokwo shi n əwo abye. 15 Wa gna, "Dagayi, gye əmi nugwnu snusnu, kpəkpə nyasna gna wo gnagna lo jesnu wo gyeazhnì lo n mwa. Kwo zhni wo wa myiya dna n əná kwo n nuwna ciici. 16 Ma ɓe n woi n əho amwutuyi aba, ama ɓa to myi ń əwo kágna m."

17 Yeisu wa dnaɓəgbe, "Əfye cala tna-gaiciyagayi n aɓo ajegbmiyii, mi ɓa kwnusnu n fyei əsa ngwnu aknyiyi nu a? Mi ɓa ɓwa bwugba n fyei əsa ngwnu aknyiyi nu a? Ɓe mi n əɓyinugbai yii n ya." 18 Yeisu wa gnaknyi əse yi, jesnu kwa gbmiya n əɓyi yi, wa ɓwa kágna n əsayii.

19 Nlonu amwutuyi ɓa ɓe da Yeisu fyaa ɓa nyaɓo, "Knyiyi nu na zhni to ya myi n kwo gbmiya ma a?"

20 Wa dnaɓəgbe, "Ntuge əfye gaiciyaganunui ɓwasnu lo cewyi nu. Ɓəhnihni mi gna fye, ngye fye n gaiciyaganunui lo n ɓwasnu ngye fulu byegye, fye ɓa myi fya gna əpe ye, ‘La laka ń ya ho la shi ń ɓwaayi,’ jesnu kwo ɓa lo. Ɓəho to lo ń kwo ɓa shenu ń əfye ba m. [21 Ama əse ye pya ta gbmiya m, akpəge dna n aduwazhni ɓədo n gbewnai.]"

22 She ɓa ɓə yezhi n abagbmanyi n Gəlili, wa gna ɓa, "A ɓə la Əza Nugwnu ga dna n aza akwnu. 23 Ɓa ɓə la wo wu, jesnu a ɓə la wo laka gnyi n wyewyeyi." Nlonu, amwutuyi ɓa kwu nu zhi n bwugbawnui.

24 Əsa n Yeisu n əwo amwutuyii ɓə kwu si Kapanam, Dagayipwuwa agədu gwoyi shekel tokwnui nya, ɓa ɓe da Byitusu ɓa nyaɓo, "Əfye nyawuyi ta kwnu Dagayipwuwa gədu m?"

25 Wa dnaɓəgbe, "Əə, wo kwnu lo." Əsa n Byitusu ɓə loɓe pwuwa, Yeisu nu ɓə kpmi ɓəda da. Wa nyaɓo, "Sima, ho zhninubwo ge nanu a? Asu anyì nya gwo gədu n anyika nu a; n əɓa aɓyi nu kwo n azaje a?"

26 Byitusu wa dnaɓəgbe, "N azaje nu."

Yeisu wa gna wo, "A gye ɓa n əɓa aɓyi aɓwai kwnukwnuiya lo nuu. 27 Ama nabai to ya ɓe n abwii m, lo nuwna-znudna, hoi she əho əgwo ya fyi n kwo. Əbmya kpmisnui n ho ɓə wna; gwu əkwo əgbe ya, ho ɓa gye shekel gbmanyi dna n kwo. Gbmi kwo haa ga ɓa, əmi gədu ɓədo n əfye nyai."