1 Shi ɓa ɓə wo vyivyiwyi n Urishelimai, ɓa ɓe Betifyeji ń Zaitu əpe, Yeisu wa tnu amwutuyi tnutnu əɓa ngwnu-aba, 2 wa gna ɓa, "Fye lo əzhi n kwo zhi ń əfye abye nyi, shi fye lofyi n kwo, fye ɓə gye zhagawyi n gyignyi n ɓo, n əkwo əɓyii ma kwo. Fye lo ɓa, fya ɓe mi n ɓai. 3 Ń əzaho wa nya fye əɓo, fye gna ge Dagayi ń əɓa apmai lo jesnu wo ɓa je tnu n ɓai wolowolo."

4 Dəye ɓə zhni nabai kwa nu əɓo nu ń a ɓə da dna n sheɓəgwognayi əgbe nyi:

5 "Gna Siyona Nyigwnu,

‘Gyewye, əho əsu ɓe da ho nyi,

n tukwownashii n gwnutu n zhagawyi,

jesnu tu ń zhagawyi snáyi.’ "

6 Amwutuyi ɓa lo ɓa zhni shi Yeisu ɓə ga ɓa əgbe nyi. 7 Ɓa ɓe n zhagawyii ɓədo n zhagawyi snáyii, jesnu ɓa kwu əɓa aje takpe n ɓa, nabai Yeisu wa sasetu. 8 Deeji yaakwo ɓa ta əɓa aje zhi ń zokwo, azaje ɓa bma ashnuwna aɓwala ɓa ta ɓa kpe lo ń zokwo. 9 Deeji n ɓa ɓə gyilo ń əwo abye nyi, jesnu ń aza yii ń ɓa ɓə vyi ń avnu nyi, ɓa ɓəwyi,

"Hosana ga Dawuda Nugwnu!"

"Anabəlikada nu n əzai ń wo ɓe dna ń Dagayi əye!"

"Hosana dna ń əshemi duduyi!"

10 She Yeisu ɓə lodna n Urishelima, əzhiyaakwo vnyanya kwaa totu, jesnu ɓa nyaɓo, "Əza ye zhni nyika nu a?"

11 Deeji kwa dnaɓəgbe, "Yeisu nu gnyi, sheɓəgwognayi ń wo gbmi n Nazereti nyi, ń Gəlili."

12 Yeisu wa lodna n Dagayipwuwa ashilagyí, waa aza yí nyaya vnyanya, ń ɓa ɓə fyi ɓai kwnú anya, jesnu ɓai si anya ń abaayi nyi. Wa kwu agyiwye shnayí atebwul knyianyikwnu n alukpe kwnuyi asasekpebai. 13 Wa gna ɓa, "A ncei kafyilo, ‘A ɓa yi əmi pwuwa ge aduwazhni pwuwa nu,’ ama fye la kwo zè ‘avyì pwuwa.’ "

14 Awyebwayi n azabmazhiyi ɓa ɓe da wo ń Dagayipwuwa, jesnu wa ká ɓa gna. 15 Ama she apirisiti tukwoda ń owa anyawuyii ɓə gye aɓo wowoi ń wo ɓə zhni, jesnu aɓyii ɓəwyi n Dagayipwuwa ashilagyí, "Hosana ga Dawuda Nugwnu," ɓa gyi minagyi.

16 Ɓa nya wo əɓo, "Ho wo əɓo lo ń aɓyi ye zhi ɓai da nyi?"

Yeisu wa dnaɓəgbe, "Əə, fye too shni kwo ba m,

" ‘Ń aɓyi anawyii agbei nu, jesnu n aɓyipwutui,

n əho, Dagayi, ho la əho cici lashi m’?"

17 Wa laka ń əɓa aba, wa lo Byetani, əzhiyaakwo, aba ń wo ɓə wnagye.

18 N labmilabmii, Yeisu woi jezelo əzhiyaakwo, myikwnu kwoi la wo gwnu. 19 Shi wo ɓə gye gbaayi shnuwna ń zokwogbe, wa lo kwo aba ama to wa gye nyaho ń gyitu ń kwo m, akpəge afnyitolo. Nlonu wa gna kwo, "Ho taa je gyigyi ga m nanyinanyi!" N əsagbmanyii shnuwna yi kwa kwu ɓwa.

20 She amwutuyi ɓə gye dəye, ca wo ɓa. Ɓa nyaɓo, "Knyiyi nu na zhni shnuwna ye kwoi ɓwa n pyepyei a?"

21 Yeisu wa dnaɓəgbe, "Ɓəhnihni mi gna fye, ń fye n gaiciyaganunui, jesnu to fya fyi abwugba-aba m, fye taa ɓwa gbaayi shnuwna ye nu əknyi tu m, ama fye ɓa myi fya gna əpe ye cè, ‘Lo, ho she əhohni ya dna ń shikwo,’ kwo ɓa zhni nlonu. 22 N fya ga gaiciya, fye ɓa gwo nyahonyahoi ń fya nya əkwo əɓo dna ń aduwazhni."

23 Yeisu wa lodna n Dagayipwuwa ashilagyí, shi wo ɓə dna woi wunya, apirisiti atukwoda ń abyedai, ɓa ɓe da wo. Ɓa nyaɓo, "N knyi ikwoi nu ń ho zhni aɓo ye a? Jesnu nyika nu naa ga ho ikwo ye a?"

24 Yeisu wa dnaɓəgbe, "Mi ɓa nya fye əɓo gbmanyi cè, n fya dna mi ɓəgbe, mi ɓa wu fye ikwo ń mi zhniapma ncei mii zhni aɓo ye. 25 Yohana batizimazhnizhni; kwo ɓə gbmi ń nanu a? Kwo ɓə gbmi n əshemi nu, kwo, əkwo əɓo ɓə pá n zanyikwoci nu a?"

Ɓa da kwo fyiaje ɓahniɓahni, ɓa gna, "N ya gna, ‘N əshemi nu,’ wo ɓa nyaɓo, ‘To knyiyi nu zhni to fyehni ga wo gaiciya m ma?’ 26 Ama ń ya gna, ‘Kwo gbmi n zanyikwoci nu,’ ədna wo yi lo ntu aza ɓo, ntuge əɓa vnyanya ɓa ɓə la Yohana la nge sheɓəgwognayi nu."

27 Ntulonu ɓa dna Yeisu ɓəgbe, "Yi ta kpəlo m."

Nlonu wa gna, "Əmihni ce, mi taa gna fye n knyi ikwoi nu, n mi zhni aɓo ye ncei m.

28 "Fye zhninubwo nge na a? Əzaho ɓə nyi ń anugwnui ngwnu-aba, wa lo da əɓyi kpmisnuyi wa gna wo, ‘Nugwnu, lo n naiye hoi zhni tnutnu ń anamzhni.’

29 "Wa dnaɓəgbe, ‘Mi taa lo m,’ ama əsa fyewyi, wa shna əwo bwugba do, waa lo.

30 "Nlonu əda wa lo da nugwnu baayi, wa gna wo əɓo gbmanyigbmanyi. Wa dnaɓəgbe, ‘Əmi dada, mi ɓa lo,’ ama to wa lo m.

31 "Nyika nu n anugwnu aba ye ɓə zhni əwo dada ɓəye a?"

Ɓa dnaɓəgbe, "Kpmisnuyi."

Yeisu wa gna ɓa, "Ɓəhnihni mi gna fye, agədu gwoyi n akaluwayi ɓa ɓə kwu lofyi n Shekwoyi əbemi ń əfye abye. 32 Ntuge Yohana ɓə ɓe nabai wa wu fye ɓəfyece zokwo nu, to fya ga wo gaiciya m, ama agədu gwoyi n akaluwayi ɓa kwu gaiciyaga. Jesnu fye ɓə kwu əɓo ye gyewye, to fya yeabwi, jesnu to fya ga wo gaiciya m.

33 "Knatnubwa, ha wo nabagyi ɓəsisi nya ədo: Əknyida ho ɓə nyi ń wo ɓə n anamzhnii dna. Wa mi gəlu n shegwnu kwo, waa anamnuwnapyiba nyì dna ń kwo jesnu waa abagwuyi nyakwnu asnada mi. Nlonu waa kwo ga afwaɓayi ho ɓa ɓá, wa laka wa lo abado. 34 She nyagyikwu əsa ɓə wo vyivyiwyi, wa tnu n əwo atnutnuyi ń afwaɓayi aba, ɓə gwo əwo anya gyigyii ga wo.

35 "Afwaɓayi ɓa taɓwashi əwo atnutnuyi; ɓa lu zaknayi, ɓa wu əzaho, jesnu ɓa knyi əza taayi akwuta. 36 Nlonu wa tnu ɓa n atnutnuyi adoi, ń du akpmisnuyi, jesnu afwaɓayi ɓa zhni ɓa əɓo gbmanyigbmanyi. 37 N kpmasnu, wa tnu ɓa n əwo nugwnui. Wa gna, ‘Ɓa ɓá ga əmi nugwnu mwamwa.’

38 "Ama she afwaɓayi ɓə gye əwo nugwnu, ɓa gna aje, ‘Əza ye nu zhni əgwúgyiyi. Fye ɓe, ya wu wo jesnu ya gwo əwo əgwú.’ 39 Ntulonu ɓa la wo, ɓaa wo sheyashi ń anamzhni əbmyi, jesnu ɓaa wo wu.

40 "Ntucenu, she anamzhni da ɓə ɓe, wo ɓəi zhni n ɓai n wuna a?"

41 Ɓa dnaɓəgbe, "Wo ɓei ɓe ń azagbəlo yei n zozo gbəloi nya aba, jesnu woi la anamzhni wa ga afwaɓayi ədo, ń ɓa ɓə ga wo əwo nyaɓwa ń anya gyigyi n nyagyikwu sai."

42 Yeisu wa gna ɓa, "Fye too shni ba, dna ń Anyakazhi ge:

" ‘Kwuta ń anyamiyi ɓə la əkwo aɓo na nyi,

əkwo nu la zè ɓwakwonu kwuta;

Dagayi nu kwu dəye zhni,

jesnu kwo zhni əɓo wowoi nu n əyi aba a?’

43 "Ntucenu mi gna fye nge a ɓə la Shekwoyi əbemi gwo n fye, ai la kwo ga aza n ɓa ga əkwo gyigyi. [44 Əza ń wa myiya tu ń kwuta ye, wo ɓə la vyiya wyiwowyiwo; əza ń kwa myiya tu ń wo, wo ɓə la bwaya."]

45 She apirisiti atukwoda ń Afarisiyii ɓə wo Yeisu ɓəsisi ye, ɓa kwu kpəge wo daɓo tu ń ɓa tukwo nu. 46 Ɓa zna zokwo shni nabai ɓa wna wo, ama ɓa wo deeji ədna, ntuge aza ɓə ń woi la ge wo zhni sheɓəgwognayi nu.