1 Nlonu Afarisiyi ho ɓədo n owa anyawuyii ɓa kwnu ń Urishelima ɓa ɓe da Yeisu ɓa nya wo əɓo, 2 "Knyiyi nu zhni əho amwutuyi ɓai znu azakwoi kwnunu gnana a? Ɓa ta na aɓwa lo, ɓa kpe nyagyi gyi m!"

3 Yeisu wa dnaɓəgbe, "Knyiyi nu zhni fyei znu Shekwoyi ɓəgbetu gnana ntu ń əfye akwnunu ɓo a? 4 Ntuge Shekwoyi ɓə kwu gna, ‘Ga əho dada n əho əyai mwamwa,’ jesnu, ‘Əza n wa knyi əwo əya kwo əwo dada akpmi, a ɓaa wo wu.’ 5 Ama fya gna nge ənya n zahozahoyi ɓə ɓa zhniapma ncei wa bma əwo dada zhni kwo əwo əya, ‘wó la kwo gbmishi ga Shekwoyi’ 6 wo taa ‘mwa əwo dada n əwo əyai n əkwoi m.’ N zokwo ye nu n fye wnu Shekwoyi ɓədagbma ya n ɓwasnu ntu ń əfye kwnunu ɓo. 7 Əfye akwocednayi! Ishaya ɓə da gaiciya nu əsa ń wo ɓə da sheɓəgwogna tu ń əfye ɓo nyi, wa gna:

8 " ‘Aza ye ga mi mwamwa n əɓa agbei nu ɓwasnu,

ama əɓa adu mwakpa lo n mii.

9 Ɓa ga mi mwamwa gbəloi nu;

əɓa nyawu ɓwa azanyikwoci aɓəgbekpe nu zhni.’ "

10 Yeisu wa yì deeji zhi ga əwohni jesnu wa gna, "Fye kwu Atnubwakna, fya ɓwa awyega. 11 Ənya n kwo lodna ń əza əgbe nyi, əkwo nu ta tu wo cegye m, ama ənya n kwo gbmiɓe ń əza əgbe, əkwo nu tu wo cegye."

12 Nsayi amwutuyi ɓa ɓe da wo ɓa nyaɓo, "Ho kpəlo nge ho ɓə la Afarisiyi bwi əsa ń ɓa ɓə wo ɓəye nyi?"

13 Wa dnaɓəgbe, "Nyabye dəhodəhoi ń əmi Dada əshemi nya nu to bye kwo m, a ɓaa kwo shiya ɓədo n əkwo agbegyei. 14 Fa ɓa; ɓa zhni azokwowúyi awyebwayi nu. N wyebwayi wa wu wyebwayi ədo zokwo, əɓa ngwnu-aba ɓa ɓaa kaya fyi ń ɓwokwnu."

15 Byitusu wa gna, "Wu yi əɓo ń ɓəsisi ye da."

16 Yeisu wa nya ɓa əɓo, "Fye ye fyilo ntna gənyikpe nu? 17 Fye ta gyewye lo nge nyahonyahoi ń kwo lo əgbe kwo lo nubwo nu jesnu nlonu kwa gbmiya ń nayi m? 18 Ama anya n ɓa kwnuɓe n əza əgbe ɓa kwnuɓe ń əwo ədu nu, əɓa nu tu wo cegye. 19 Ntuge dna n ədu nu ń aɓənubwozhni nukwoi kwnuɓe: əzawu, anagbái, asisiɓozhni, əvyiwyi, ɓəgbmi katá nya, əyewnuya. 20 Aɓo ye pya nu tu əza cegye; ama nyagyi gyi ntna aɓwana, ta tu əza cegye m."

21 She Yeisu ɓə fa abaayi, wa lo Taya n Sidonii. 22 Kaanayi nyikwoza woi gbmi n səpa yi wa ɓe da wo, woi ciɓwi, "Dagayi, Dawuda Nugwnu, gye mi snusnu! Ase nukwoi kwu wna əmi nyigwnu jesnu wo gyeazhnì lo ń mwa."

23 To Yeisu wa dnaɓəgbe m. Nlonu əwo amwutuyi ɓa ɓe da wo jesnu ɓa zhni n woi, "Nya wo ya, ntuge wo gna yi gnagna lo n ɓwucii."

24 Wa dnaɓəgbe, "A ɓə tnu ń mii n ɓwasnu ntu Israila aknyi aɓwuɓwui ɓo nu."

25 Nyikwoza ye wa ɓe wa ceakwokwo shi ń əwo abye. Wa gna "Dagayi, bma mi zhni!"

26 Wa dnaɓəgbe, "Kwo to bmyalo a kwu aɓyi biledi a sheyazhi amwi m."

27 Wa gna, "Əə kwo wo lo nlonu, Dagayi. Ama kwo amwi ɓa gyi awyiwoi n ɓa kaya zhi n əɓa dagayi tebwul nyi."

28 Nlonu Yeisu wa gna wo, "Nyikwoza, ho n gaiciyaganunui yaakwoi lo! Ənya n ha nyaɓo tu n kwo nyi, a la ga ho." Njesnu əwo nyigwnu wa gwo kágna n əsayii.

29 Yeisu wa laka n abaayi, wa lo n Gəlili shikwo ɓwai. Nlonu, wa gwnutu n əpe waa sasetu n ɓo. 30 Deeji yaakwo kwa ɓe da wo, ɓai ɓe n azabmazhii, awyebwayi, anayiwnuyi, atákpeɓəda n azajei n mwa bəgyé, jesnu ɓa ya ɓa zhi n əwo apitabwada aba; jesnu ɓa gwo kágna. 31 Ca wo aza əsa n ɓa ɓə gye atákpeɓəda ɓai daɓo, azabmazhi ɓai ɓwa lafyiya, apita shásháida ɓai znazna jesnu awyebwayi ɓai gyewyeba. Njesnu ɓa ci Shekwoyi Israila nya.

32 Yeisu wa yì əwo amwutuyi zhi wa gna, "Aza ye snusnu wna mi lo, ɓa kwu kwnusnu n əmii anyipyei ngwnu-ata nu ntna nyagyi. Mi to ncei pmalo ma gna ɓa ami n myikwnui m, sakwnú ɓa lo ɓai myiya ń zokwo."

33 Əwo amwutuyi ɓa dnaɓəgbe, "Yi ye ya ɓwa biledi ń nanu ń zhabwi ye, kwa kwnu deeji ye a?"

34 Yeisu wa nyaɓo, "Fye n biledi aknanai shilo ngwnu aknyiyi nu a?"

Ɓa dnaɓəgbe, "Ngwnu-tnaaba, ɓədo n abmya aɓyii fyewyi."

35 Wa gna deeji nge ɓa kwu sase zhi n əknyi. 36 Nlonu wa kwu biledi aknana ngwnu-tnaaba n abmyai, wa sa Shekwoyi ami, wa sa ɓa ya, wa ga əwo amwutuyi, əɓahni ce ɓa ga aza. 37 Əɓa vnyanya ɓa kwu gyi, nubwo kwa kwu ɓa fwu. N dəye avnu, amwutuyi ɓa kwu awyiwoi n ɓa ɓə ce nyi, acekwnu n nunui, ngwnu-tnaaba. 38 Aza bəgyé n ɓa ɓə gyi nyagyi nyi, ɓa ɓə nyi azanugbai adugwu-anyi nu, gbowo n anyikwozai n aɓyii. 39 Shi Yeisu ɓə kwu deeji gnami, wa lodna ń əya nuwnanya wa lo Magadan səpa.