1 Yeisu wa yì əwo amwutuyi ngwnu-awoceaba zhi əwohni, jesnu wa ga ɓa ikwo ɓa lo ɓəə kwnu azafnu ajegbmii ya, jesnu ɓa ga agwnùyi n anyasna dəhodəhoi pyai kágna.

2 Atnutnuyi awoceaba aye nu nyi:

Kpmisnuyi, Sima (əza n a yi ge Byitusu nyi) n əwodoi Anduru;

Jemyis Zebədi nugwnu, n əwodoi Yohana;

3 Fyilibwus n Batolomyii;

Toma n Matiyui gədu gwoyi;

Jemyis Alfyis nugwnu, n Tadiyosii;

4 Sima Ziloti n Yahuda Iskariyotii, n wo ɓə kwnu Yeisu Kirisiti nyi.

5 Ngwnu-awoceaba ye, Yeisu wa tnu n ɓai n aɓəgbega yei: "Fye to lofyi ń Abyedo aba kwo fya lo ń Asamariyayi əzhimi dəhodəhoi m. 6 Ama fye ɓwa Israila aknyi aɓwuɓwuyi aba nu lo. 7 Shi fye lo, fye da ɓəda ye: ‘Əshebemi kwo la ɓe vyivyiwyi.’ 8 Fye ga anyasnayi kágna, fye kwu azafyí kala, fye ga anayiwnuyi kágna, fya kwnu ase nukwoi ya. Fya gwo ń adaada nu; fye ga ń adaada.

9 "Fye to la zinali kwo azulufa kwo gyiwye ho pya dna ń əfye ashnipa nya m, 10 fye to la lagyiita əzna nya m, kwo əjekpe baayi kwo abwada kwo bwusi, ntuge tnutnuyi kwnuce lo a shi wo əɓwa. 11 Əzhimi dəhodəhoi kwo əzhigba ń fya lofyi, fye zna əza shni ń wo kwnuce lo fya fyi ń əwo pwuwa nya əsa ń fye ɓə fa abaayi. 12 Shi fye lofyi ń pwuwa, fya ga kwo əfye gnaɓyi. 13 Ngye pwuwa yi kwnuce lo, fya fa əfye anabəlika bwugbafu nya kwa shnikpe ń kwo; ń kwo to kwnuce lo m, fya fa əfye anabəlika bwugbafu nya kwa jezeɓe da fye. 14 Ń əzaho to gwo fye m, kwo wa wo ɓədagbma ye m, fya fa pwuwa yi kwo əzhi yi, fya lu aɓwutukwnu ya ń əfye apita fya kwnu n ɓo. 15 Ɓəhnihni mi gna fye, kwo ɓə la Sodom n Gwomworai gna wo faafa dna ń owada əwyii a fa əzhi yi.

16 "Mi tnu n fyei ngye aknyi nu fyi ń acamcam atasni. Ntucenu fye la ce ngye awa, ntnaɓətu ngye alukpe. 17 Fye kwu zhigwu, a ɓə kwu fye ga fyi ń azhi atukwoda akwnu, jesnu a ɓə la fye ɓyeya fyi n Ayahudiyibwokwnu. 18 Ntu əmi ɓo a ɓə kwu fye lo ncei n agwomna abye ɓədo n asui ngye aɓəkwnuyi ga əɓa jesnu ń Abyedoi. 19 Ama she a wna fye, ce to wo fye m, ntu ənya ɓo ń fye ɓa da m, kwo shi fye ɓa da kwo m. N əsayii, a ɓə gna fye əɓo ń fye ɓa da, 20 ntuge əfye nu to ɓə daɓo m, ama Zafnu əfye Dada nya nu ɓə daɓo ń əfye agbe.

21 "Əza ɓə ɓwu əwodo nya əfyi, jesnu əda ɓə ɓwu əwo nugwnu; aɓyi ɓə zhni tukwognanakwo kpe əɓa azamayi ɓai zhni ai kwu ɓa wu. 22 Aza vnyanya ɓə wnunu n fyei ntu əmi ɓo, ama əza ń wa myignyi nya azoba, wo ɓə la pwo. 23 She a zhni fye awyesnugbegye ɓo ń aba gbmanyi, fya bwusi lo abado. Ɓəhnihni mi gna fye, fye to ɓə zo azhi lo vnyanya ń Israila m; Əza Nugwnu woi ɓe.

24 "Mwutuyi to du əwo nyawuyi lo m, kwo fyenu n du əwo Dagayi m. 25 Kwo kwnuce lo amwutuyi ɓa kwu wu ngye əɓa anyawuyi, jesnu atnutnuyi ɓa wu ngye əɓa adagayi. Ń a la pwuwa tukwoda ye yì nge Byelzebwulu, a ɓa yi apwuwada aje nge na a!

26 "Ntulonu fye to wo ɓa ədna m, ntuge nyaho to lo ń kwo pwuanya n a taa kpe kwo anya ya m, kwo ń ɓwudna ń a taa kpekwoya wu pəipəi m. 27 Ənya ń mi gna fye dna ń wyegbma, fye da kwo n nyipyei pəipəi; ənya ń a da kwo snaanyá dna ń əho tnubwa, da kwo tu ń anyakwnusni. 28 Fye to wo aza yi ədna n ɓa wu nayi, ama n ɓa taa myi n ɓa wu wyewyeyi m. Ama, fye wo əza ədna ń wo ɓa wu wyewyeyi ń nayii jesnu wa sheɓaya fyi ń anápyi. 29 A ta kwnú agbakwolowyi ngwnu-aba kəɓwo gbmanyi nu m? Dudulonu dəho to lo n kwo kaya shi ń əknyi ntna əfye Dada akpe m. 30 Jesnu kwo əfye atukwoyi vnyanya a ncei babai lo. 31 Nlonu fye to wodna m; fye du agbakwolowyi bəgyé lo n apmaɓwa.

32 "Əza n wa ye əmi əyekpé ɓo gnyi ń aza abye, mi ɓə ye əwo yekpé ɓo gnyi n əmi Dada abye ń əshemi. 33 Ama əza n wa na əmi əɓo gnyi ń aza abye, mi ɓə na əwohni ɓo gnyi n əmi Dada abye ń əshemi.

34 "Fye to gye nge ma ɓe n bwugbafui nu ń anyì m. Mi to ɓe ń bwugbafui nu m, ama ma ɓe n əbeyaakwoi nu. 35 Ntuge mi la ɓe ma pmyi,

" ‘əza tu ń əwo dada,

nyigwnu tu ń əwo əya,

tnáyi tu ń əwo əvya,

36 əza anuwnuyi ɓa kwnu ń əwo pwuwa nu.’

37 "Əza ń wo ye əwo dada kwo əwo əya n du əmi, wo to kwnuce lo waa zhni əmi nya m; əza ń wo ye əwo nugwnu kwo nyigwnu ń du əmi, wo to kwnuce lo waa zhni əmi nya m. 38 Əza ń wo to lá əwohni znudu shi, waa vyi mi m, wo to kwnuce lo waa zhni əmi nya m. 39 Əza ń wa ye wa gnyi əwo wyewyeyi, wo ɓə ɓwu kwo nuwna, jesnu əza ń wa ɓwu əwo wyewyeyi nuwna ntu ń əmi ɓo, wo ɓə ɓwa kwo.

40 "Əza ń wa gwo əfye, wo la mi gwo, jesnu əza n wa gwo əmi, wo la əza gwo, ń wo ɓə tnú n mii nyi. 41 Əza ń wa gwo sheɓəgwognayi ngye sheɓəgwognayi, wo ɓə gwo sheɓəgwognayi gyiba, jesnu əza n wa gwo ɓəfyeceyi ngye ɓəfyeceyi, wo ɓə gwo ɓəfyece gyiba. 42 Njesnu, əza ń wa ga əza gnagbayi ń ɓa zhni əmi amwutuyi nyi nuwnafui, ɓəhnihni mi gna fye, əza yi to ɓə ɓwu əwo gyiba nuwna m."