1 Yeisu wa fa Dagayipwuwa woi lo woi znazna, əwo amwutuyi ɓa ɓe da wo ntuge ɓa wu wo shi kwo n anyakwnui safyi lo. 2 Wa nyaɓo, "Fye gye anya ye əwye lo vnyanya? Ɓəhnihni mi gna fye, kwuta gbmanyi ho to lo ń kwo ɓə ce tu ń ədo she m; a ɓə la dəhodəhoi shniya shi n əknyi."

3 Shi Yeisu ɓə sasetu n Zaitu Əpe, amwutuyi ɓa ɓe da wo fyaa. Ɓa gna, "Gna yi, aɓo ye ɓə zhni n knyi əsai nu, jesnu knyiyi nu ɓə zhni əznù əho ɓeɓe nya ń anyìzo nyai a?"

4 Yeisu wa dnaɓəgbe, "Fye la əwyewna nabai to əzaho wa dna fye kwoce m. 5 Ntuge bəgyé ɓə ɓe dna n əmi əye, ɓai gna, ‘Əmi nu zhni Kirisiti,’ jesnu ɓa ɓə dna bəgyé kwoce. 6 Fye ɓə wo okwnusnu nabagyi, jesnu ń okwnusnu aɓoi ń lìya, ama fye to ɓə ye dəye kwoi kwu əfye abwugbakala m. Ɓəshishi nu aɓo ye pya ɓai zhni, ama anyìzo ye ɓeɓelo. 7 Əbye ɓə laka da əbye, jesnu əbemi ɓə laka da əbemi. Myikwnu kəsnui ɓəə gwnu jesnu əknyi ɓəə jeashna kwoi sofyi n aba gbowogbowo. 8 Aɓo ye vnyanya nu zhni əɓyima nyasna yaya.

9 "Nlonu a ɓə kwu fye ga fyi ń aza akwnu, ai she fye əwyena, ai wu fye, jesnu abye vnyanya ɓə wnu fye ənu ntu ń əmi ɓo. 10 N əsayii nu ń bəgyé ɓə pmyiawyeya ń gaiciyaganunui, ɓai ɓwuaje jesnu ɓai wnunu n ajei. 11 Sheaɓəgwognayi katái n mwabəgyé ɓə kwnuɓe ɓai fyi aza bəgyé kwoce. 12 Ntu ń əkpízhni mwamwa ɓo, aza bəgyé əɓa yeyewu ɓə kwu fuse, 13 ama əza ń wa myignyi nyalo azoba wo ɓə la pwo. 14 Njesnu a ɓə zhni nabagyi manai əbemi nya ye waazi n anyì vnyanya ngye ɓəgbmi ga abye vnyanya, nlonu, anyìzozo əsa ɓəə si.

15 "Ntulonu she fye ɓə gye ‘əɓokasa n kwo ɓe n abalayai nyi, ń gnyiagnyi dna ń aba gyigyiyi,’ ədo ń sheɓəgwognayi Daninya ɓə da nyi, fa nyabayi wa ɓwa awyega 16 nlonu, fa aza ń ɓa fyi n Yahuda ɓə bwusi lo ape. 17 Əza n wo ɓə tu n əwo nyakwnusni tukwo, wo to ɓə kashi wa la nyaho ń əwo pwuwa m. 18 Əza n wo dnalo n bmana wo to ɓə jezelo apyi wo kwu əwo əjekpe m. 19 Anyipyei yi ɓə zhni ədna nya nu ń anubwoda aba n aɓyiya dai! 20 Fye zhniaduwa nabai ge əfye əsibwi to ɓə ɓe dna ń vnyinyikwo nu kwo n Sibyiwyi m. 21 Ntuge nsayii gnyagwnugnya ɓə ɓe, ədo ń kwo to n dəmwii lo m, n anyì yaya əsa kwoi ɓe nsayi ye m; jesnu a taa je kwo pya wyegye m kpeekpe.

22 "Ngye a to ɓəə gna a ce anyipyei yi ceya m, zaho to ɓə ɓa pwo m, ama ntu n aknyiknyiyi ɓo, a ɓə la anyipyei yi ceya. 23 Dna əsayii ń əzaho wa gna fye, ‘Shiawye, Kirisiti gnyi nyi ń ya!’ kwo ‘Wo gnyi nu!’ fye to ga kwo gaiciya m. 24 Ntuge amasifu akatá nya ɓədo n sheaɓəgwognayi katáii ɓa ɓə kwukazhi ɓai wu aznù, ɓai zhni aɓo wowoi nabai ɓai dna aza kwoce, n kwa ye zhni, du n aknyiknyiyii. 25 Gyewye, mi kwu gna fye to əsai si m.

26 "Ntulonu n əza wa gna fye, ‘Wo dna gnyi nu n zhabwikawu,’ fye to kwnuya lo m; kwo, ‘Wo dna nyi ń nyakwnumi,’ fye to ga kwo gaiciya m. 27 Ngye shi əgbma bmyana kwoi kwnu ń kpəkwó a gye kwo pəipəi ń shnikwó nyi, nlonu Əza Nugwnu ɓə ɓe. 28 Abahobahoi n ənya fyifyiyi shi, ń abaayi nu ń agwulu yezhi.

29 "She gnyagwnugnya anyipyei yi nya ɓə zo duduya

" ‘Nyipyei ɓə la dna wyegbma,

jesnu əpya to ɓə je əkwo bwuznagna ga m;

akpasi ɓə kaya ń anyìbmana,

jesnu anya n ɓa kpe n anyìbmana ɓa ɓə jeashna.’

30 "Nlonu n əznù Əza Nugwnu nya ɓə gbmiɓe n əshemi. Nlonu aza vnyanya n anyì ɓa ɓə zhni bwugbazhiizhii əsa n ɓa ɓə gye Əza Nugwnu woi ɓe dna n ənyì əshebmana nya, n kalái jesnu n latu yaakwoi. 31 Wo ɓə tnu n əwo amaləkai ɓai bye knaknaci n əɓwi yaakwoi, jesnu ɓai ye əwo aza aknyiknyiyi zhi n anyì awyepmyi asəpa ngwnu-anyi, ənya n kwo laka n anyiceshiba gbmanyi kwoi lo anyiceshiba ədo.

32 "Nsaiye fye tu əɓəye mwi n gbaayi shnuwna; əsa n fya gye kwoi kpmi akwo, jesnu kwoi ci afnyitolo, fya kwu kpe nge gbmama n la wo vyivyiwyi. 33 Ntulonu, she fye ɓə gye aɓo ye vnyanya, fya kwu kpe nge əsa n la wo vyivyiwyi nu, n gnyi ń abwokwnumi əgbe. 34 Ɓəhnihni əmi nu gna fye, cala ye taa duya m akpəge aɓo ye vnyanya ɓa kwu zhni. 35 Əshe ń əknyii ɓa ɓə la duya, ama əmi aɓədagbma taa duya m nanyinanyi.

36 "Ama ntu ń nyipyei yi ɓo kwo əsa, əzaho ta kpe əkwo əye lo m, kwo amaləka ń ɓa fyi n əshemi nyi, kwo Nugwnu m, akpəge Dada nu ɓwasnu gbmanyi. 37 Ngye shi kwo ɓə nyì ń Nuhu anyipyei, nlonu ń kwo ɓə snu n əwyii ń Əza Nugwnu ɓə jezeɓe nyi. 38 Ntuge fyi n anyipyei yi, to nuwnai kwnu-akpma m, aza ɓə laɓa ɓai gyi, ɓai sni, ɓai pa amwula jesnu ɓai kna amwula, nya nyipyei ń Nuhu ɓə lodna ncei n əya nuwnanya; 39 jesnu ɓa to ɓə kpe ɓəhoɓəhoi əye ń kwo ɓə ye kwa zhni m, nya əsa ń nuwna kpmakwnu ɓə ɓe kwaa ɓa kwuya vnyanya. Kwo ɓə ɓwa wu nlonu ń Əza Nugwnu ɓeɓe. 40 Aza ɓə kpe n ofwa ngwnu-aba; a ɓə knyí gbmanyi ai ce gbmanyi tu. 41 Anyikwoza ngwnu-aba ɓə fyi ɓai gwowyi ń tagwowyi; a ɓə la zaknayi ai fa gbmanyi dna.

42 "Ntucenu fye kwu zhigwu, ntuge fye ta kpe nyipyei əye lo ń əfye Dagayi ɓə ɓe ncei m. 43 Ama fye ɓwa ɓəye awyega: Ngye pwuwada ɓəə gna wa kwu kpe əsa ń əvyì ɓa ɓe dna ń sukwo yi, wo ɓə ɓa gnyigwu to wa ye ge a lofyi m. 44 Ntulonu əfyenyi ce, fye kwu zhi n əfyehnii yeyei, ntuge Əza Nugwnu ɓə ɓe n əsai nu ń fye to n əwo əɓoi dnalo m.

45 "To, nyikanu zhni tnutnuyi ceceyi n gbenuyi, n əwo dagayi wo kwu atnutnuyi əwo pwuwa nya fa fyi ń əwo akwnu wa ga ɓa nyagyi n əkwo əsai a? 46 Kwo ɓə la zhni əɓo manai nu n tnutnuyi aba ń əwo dagayi ɓə jezezhi wa gye wo gnyi woi vyi əwo əɓəgbetu. 47 Ɓəhnihni əmi nu gna fye, wo ɓə kwu əwo nyaɓwa vnyanya fyi n wo akwnu. 48 Ama ngye n tnutnuyi əkpizhniyi nu, wa gna əwohni, ‘Əmi dagayi ń kwu kalala zhni n jezezhii,’ 49 nlonu wa ya woi lu əwo atnutnuyi aje jesnu woi gyi woi sni n ajesniyi. 50 Tnutnuyi dagayi ɓə jezeɓe n əwyii ń wo to n əwo əɓoi dnalo m, jesnu n əsai ń wo ta dnace lo m. 51 Wo ɓə ce wo ya wyiwowyiwo jesnu woi la wo yadna nkwnusnu n akwocednayi, aba ń a ɓə ciɓwi jesnu ai gyi anyikna.