1 Yeisu wa lodna n əya nuwnanya, wa piyatu wa ɓe əwo əzhi. 2 Azaho ɓa ɓe wo n nayifyifyiyidai, n yatu n pəce. She Yeisu ɓə gye əɓa gaiciyaganunui, wa gna əza yi, "La bwugba dnakalá, əmi nugwnu; a kwu əho aleifyi zo ho."

3 N ɓəda yei, azaho n owa anyawuyi ɓa gna əɓahni, "Əza ye gnyi woi zhni atukwopmi əɓo nu!"

4 Yeisu woi kpe əɓa ɓənubwozhni əye, wa gna, "Knyiyi nu zhni fyei gwo aɓonubwozhni nukwoi fyi n əfye adu a? 5 Knyidei nu gna wo lo faafaa: a gna, ‘A kwu əho aleifyi zo ho,’ kwo a gna, ‘Laka gnyi ha znazna a’? 6 Ama mi ncei pmalo fya kwu kpe nge Əza Nugwnu n ikwoi lo dna ń anyì wa zo aleifyi." Ntulonu wa gna əza ń nayi ɓə n woi fyifyiyi nyi, "Laka gnyi, kwu əho pəce ha lo əho pwuwa." 7 Nlonu əza yi, wa laka, wa lo apyi. 8 Shi deeji ɓə gye dəye, ɓa kwu nu zhi n ɓəwowoi; jesnu ɓa ci Shekwoyi, n wo ɓəə la ikwo yi pya ga zanyikwoci nyi.

9 Shi Yeisu ɓə laka n ɓo, wa gye əza ai yi wo ge Matiyu n sasetu ń agədu gwoyi lubwi, wa gna wo, "Vyi mi." Matiyu wa laka wa vyi wo.

10 Əsa ń Yeisu ɓə tu woi gyi wyeshenyagyi dna n Matiyu pwuwa, agədu gwoyi bəgyé n aleifyidai ɓa ɓe ɓa gyi nyagyi n kwnusnu n woi ɓədo n əwo amwutuyii. 11 She Afarisiyi ɓə gye dəye, ɓa nya əwo amwutuyi əɓo, "Knyiyi nu zhni əfye nyawuyi woi gyi nyagyi n agədu gwoyii n aleifyidai a?"

12 Shi Yeisu ɓə wo ɓəye wa gna, "Lafyiyada ta zna shigbeda shni m, akpəge nyasnayi. 13 Ama fye lo fye zna ɓəye awyega shni: ‘Mi ye snusnugye nu, toge nyagbmi m.’ Ntuge mi to ɓe ma yi aɓəfyeceyi nu m, ama aleifyida."

14 Nlonu Yohana amwutuyi ɓa ɓe ɓa nya wo əɓo, "Kwo zè n wunanu əyi n Afarisiyii yii wnagbe ciici, ama əho amwutuyi to ɓai wnagbe m ma?"

15 Yeisu wa dnaɓəgbe, "Kwo ɓa yezhni n wunanu mwulaɓa azhiɓeyi ɓa wnubwugba woi ye kwnusnu n əɓai a? Əsa ɓəlo n a ɓə la mwulaɓa la ń əɓa aba; nsayii nu n ɓa ɓə wnagbe.

16 "Əzaho to lo n wo gwu əje-kwokwoi əta ǹ əje-woiwoyi m, ntuge əjetagwugwui ɓə kpeya n əje-kwokwoi, kwoi zhni əkwo sasaya kwoi la gna wu. 17 Aza ta ze anamnuwna woiwoi fyi n anamnuwna əpa-pwakwnu kwokwoi m. N ɓa zhni lonu, əpa-pwakwnu yi ɓə cepwo, anamnuwna kwa zeya; jesnu anamnuwna apa-pwakwnu ɓə la wnuya. Aawo, a fyi anamnuwna woiwoyi ń anamnuwna əpa-pwakwnu woiwoyi nù jesnu əɓa vnyanya ɓa ɓə kwu mwasa."

18 She wo ɓə gnyi woi da ɓəye, Ayahudiyibwokwnu tukwoda wa ɓe wa ceakwokwo shì n əwo abye, wa gna, "Əmi nyigwnu ye ɓwa fyi nu. Ama ɓe ha lo ho to wo əɓwa, wo ɓa ɓwa wyewyeyi." 19 Yeisu wa laka wa kwnulo n woi, jesnu əwo amwutuyi ɓa vyi wo.

20 Nlonu nyikwoza ho n wo ɓə gnyi n amizheya nyasnai woi kwu aye ɓwa ngwnu-awoceaba, wa gnyi n əwo avnu wa to əwo əjegbe əɓwa. 21 Wa gna əwohni, "Ngye n mi ɓa shni əwo əjegbe ɓwa toto, mi ɓa ɓwa kágna."

22 Yeisu wa pmyi, wa gye wo. Wa gna, "la bwugba dnakalá əmi nyigwnu, əho gaiciyaganunui kwo la ho kágna." Njesnu nyikwoza yi waa kágna ɓwa n əsayii.

23 Shi Yeisu ɓə lodna n Ayahudiyibwokwnu tukwoda pwuwa, wa gye deeji awyiɓei jesnu azai zhi ɓai bye amwayi, 24 wa gna, "Fye la kwnuya. Ɓyinyikwoi ye to fyí m, ama wo wnagye nu." Ama ɓa ma wo asna. 25 Shi a ɓə la deeji kwnuya zhi əbmyi, wa lodna wa taɓwashi ɓyinyikwoyi ń əɓwa, ɓyinyikwoyi wa laka gnyiagnyi. 26 Nabagyi ye kwaa gnamyi fyi laɓa n səpayi vnyanya.

27 Shi Yeisu ɓə laka n ɓo, awyebwayi ngwnu-aba ɓa vyi wo, ɓai gyiwye, "Gye yi snusnu, Dawuda Nugwnu!"

28 She wo ɓə la lodna ń pwuwa mi, awyebwayi ɓa ɓe da wo, jesnu wa nya ɓa ɓo, "Fye kwu gaiciyaga nge mi ɓa myi ma zhni ɓəye?"

Ɓa dnaɓəgbe, "Əə, Dagayi."

29 Nlonu wa to əɓa awye əɓwa jesnu wa gna, "Kwo la zè n əfye aba shi əfye gaiciyaganunui lo." 30 Jesnu ɓa je wyebagye. Yeisu wa kwnù ɓa n əwyei bmyibmyii, "Fye to ye zahozahoyi wa kpe ɓəye ye m." 31 Ama ɓa kwnuya ɓa lo ɓai gná əwo nabagyi myi laɓa n səpayi vnyanya.

32 Ɓa ye zhi ɓai kwnuya lo, a ɓe Yeisu n əzai n wo ɓə n ase nukwoii fyi, to woi myi n ɓəda m. 33 She a ɓə la əse nukwoi gbmiya, əza n wo to ɓə zhni woi daɓo nyi m, wa daɓo. Ca wo deeji, ɓa gna, "A too shni ɓəye pya gye n Israila m."

34 Ama Afarisiyi ɓa gna, "Wo kwnu ase nukwoi ye ya n ase nukwoi tukwodai nu."

35 Yeisu wa zna laɓa n azhimi n azhigbai vnyanya, woi wunya n əɓa Ayahudiyibwokwnu, woi zhni waazi nabagyi manai əbemi nya, jesnu woi ká anyasnayi dəhodəhoi gna n agwnumai. 36 She wo ɓə gye deeji, wa wna ɓa snusnu, ntuge a ɓə la əɓa awye zègbmiaje ntna bmazhniyi, ngye aknyi ntna knayi. 37 Nlonu wa gna əwo amwutuyi, "Nyagyiyezhi n mwakwokwo lo, ama atnutnuyi n ɓwasnu lo fyewyi nu. 38 Nya Dagayi nyagyiyezhi nya əɓo, wa tnu n atnutnuyii fyi ń əwo ofwa nyagyiyezhi nya."