1 Shi Yeisu ɓə la pwo əwo amwutuyi awoceaba nyawu ɓo, wa laka n abaayi ntuge wa lo wo zhni waazi ń Gəlili azhimi.

2 She Yohana, ń wo ɓə dna ń zhalu nyi, ɓə wo aɓo n Masifu zhni lo, wa tnu n əwo amwutuyii, 3 ɓə nya wo əɓo, "Əho nu zhni əza n wo ɓəlo nyi, kwo yi tuwye n əzado nu gbowo a?"

4 Yeisu wa dnaɓəgbe, "Fye jezelo fye gna Yohana aɓo ń fye kwu wo jesnu fyei gyewye: 5 Awyebwayi gwo wyebagye, azabmazhi ɓai znazna, anayiwnu anyasnayi ɓai ɓwa kágna, atnubwagwunayi ɓai wo atnubwaɓə, ai kwu azafyí kala, jesnu ai da nabagyi manai ga asnayi. 6 Anabəlikada nu n zahozahoyii ń wo to cebwonyi ntu əmi ɓo m."

7 Shi Yohana amwutuyi ɓə zhi ɓai kwuka, Yeisu wa ya ɓəda n deejii ntu Yohana ɓo: "Fye ɓə lo zhabwikawu fye gye knyiyi nu a? Anuwnaje nu ń əse pmyi ɓa laɓa nyi? 8 Ngye nlonu to m, fye ɓə kwnuya lo fyei gye knyiyi nu a? Əza nu n aje amanai kpe? Aawo, aza ń ɓa n aje amanai kpe nyi, ɓa fyilo ń asu agalukwo nu. 9 Ama knyiyi nu n fye ɓə kwnuya lo fyei gyewye a? Sheɓəgwognayi nuu? Əə, əmi nu gna fye, jesnu n du sheɓəgwognayi. 10 Əza nu nyi ń aa n ənyai kafyilo tu ń əwo tukwo:

" ‘Mi ɓə tnú n əmi tnutnudayii, woi la gyilo ń əho abye,

əwo nu ɓə zhni əho zokwo aba hoi ɓe ɓo.’

11 Ɓəhnihni mi gna fye, fyi ń aza yi ń anyikwoza ɓə ma nyi, əzaho to lo ń wo la gbmignyi n du Yohana Batizimazhniyi m; dudulonu, əza n wo gnagbagbai lo dna n əshe əbemi, wo du wo lo. 12 Ənya n kwo laka ń Yohana Batizimazhniyi anyipyei kwoi ɓe nsaiye, əshebemi gnyi kwoi shnizhi ń akalái nu jesnu aza akaláda nu gnyì kwo shnizhi ncei. 13 Ntuge sheaɓəgwognayi vnyanya n owai ɓa ɓə kwu sheɓəgwogna da kwa nya Yohana əsa. 14 Ngye fye ncei pmalo fya gwo kwo, əwo nu zhni Iliya ń wo ɓə ye wa ɓe nyi. 15 Zahozahoyi ń wo n atnubwai lo, akpəge wo wo.

16 "Mi ɓa mwi cala ye ədo n knyiyi nu a? Ɓa wulo ngye aɓyi nu ń ɓa sase kpe ń adubayaakwo ɓai yi aje:

17 " ‘Yi kwu mwayí bye ga fye,

to fya nyanya m;

ya kwo aka-anyi

to fya zhni bwugbazhii m.’

18 Ntuge Yohana ɓə ɓe to woi gyi kwo woi sni m, ɓa gna, ‘Wo n asei lo.’ 19 Əza Nugwnu ɓə ɓe woi gyi woi sni, ɓa gna, ‘fnana nu gnyi n nyasniyi, agədu gwoyi nugwnudo n aleifyizhniyii.’ Ama a kpe wyemwa bmyabmya ye n əkwo atnutnu nu."

20 Nlonu Yeisu wa ya woi lace azhi n wo ɓəə kwu əwo aɓo awowoyi zhni fyi n du nyi, ntuge ɓa to ɓə yeabwi m. 21 "Owii n hoi, Korazin! Owii n hoi, Betsaida! Ntuge ngye aɓəwowoi n a ɓə zhni ɓa fyi n əfye nyi, a ɓə gna a zhni ɓa fyi ń Taya nu n Sidonii, əsa ye la mwalo shi ɓa ɓə ɓa yeabwi fyi n ajekwokwoi n ətnui. 22 Ama mi gna fye, n owada əwyii, kwo ɓə la Taya n Sidonii gna wo faafa a fa əfye. 23 Njesnu əho, Kapanam, a ɓə la ho latu n ashebmana nu? Aawo, ho ɓə shnilo Akwu nu. Ntuge aɓəwowoi ń a ɓə zhni ɓa fyi n əho nyi, a ɓə gna a zhni ɓa fyi n Sodom nu, kwo ɓəi ye lo nnaiye. 24 Ama mi gna fye nge n owada əwyii kwo ɓə la Sodom gna wo faafa a fa əfye."

25 Dna nsayi Yeisu wa gna, "Mi ci ho lo Dada, Dagayi əshemi nya n əknyii, ntuge ho kwu aɓo ye so aza aceceyi n aɓəyekpeyii, jesnu honyii la ɓa kpmiyawu aɓyi anawyi nu. 26 Əə, Dada, ntuge ənya nu nyi n kwa da ho ha zhni.

27 "Əmi Dada wo kwu aɓo vnyanya fa fyi ń əmi akwnu. Əzaho to lo n wo kpe Əza ń Nugwnu n zhni m akpəge Dada, jesnu əzaho to lo n wo kpe əza ń Dada n zhni m, akpəge Nugwnu, jesnu ń aza yii n Nugwnu la ɓa knyí waa əwohni kpeyawu ɓa.

28 "Fye ɓe əmi aba, əfye vnyanya ń a kwu fye ɓe jesnu n akaya ashnawoi kpe, mi ɓa ga fye snusnu. 29 Fye kwu əmi korogbma fyi əfyehni jesnu fya tumwi ń mi, ntuge mi zhni tukwownashiyi nu jesnu n tukwogbai n ədu, jesnu fye ɓa ɓwa snusnu ntu əfye awyewyeyi ɓo. 30 Ntuge əmi korogbma n wu lo faafa jesnu əmi akaya ntna shnawoi."