1 She Yeisu ɓə kwu aɓo ye zo da vnyanya, wa gna əwo amwutuyi, 2 "Ngye shi fye kpəlo nyi, Gnanaznu awyefna kwo ɓwace anyipyei ngwnu-aba nu; jesnu a ɓə la Əza Nugwnu ga, ai la wo znudu."

3 Nlonu apirisiti atukwoda n abyedai ɓa gwnudo zhi ń apirisiti dnagbmai galukwo, ń əwo əye nu ɓə nyi Kayafas nyi, 4 jesnu ɓa pa kwulu ɓa wna Yeisu fyaa ɓa wu wo. 5 Ɓa gna, "Ama toge dna ń awyefna sa ye m. Sakwnú gbuzui kwoi laka dna ń aza bəgyé."

6 Yeisu woi ye dna n Byetani ń Sima Nayiwnuyi pwuwa, 7 nyikwoza wa ɓe da wo n lúulúu əmisnidaí nakwoyii shi, wa zè kwo kpe n əwo tukwo, woi myima tu ń tebwul.

8 She amwutuyi ɓə gye ɓəye, ɓa kwu zhi n kpukpurukpui. Ɓa nyaɓo, "Knyi nu zhni ai zhni ənya ye agbma a? 9 A ɓə ɓa kwnu əmisnidaí ye n gyiwyei mwa, a ɓwa a ga awyekwoyi."

10 Yeisu wa kwu əɓa ɓənubwozhni kpeye, wa gna ɓa, "Knyiyi nu zhni fyei gna nyikwo ye gnagna a? Wo kwu əɓo bmyabmyai zhni ga mi. 11 Awyekwoyi n kwnusnu lo n fyei ciici, ama fye taa ɓwa əmi ciici m. 12 She wa ze əmisnidaí ye kpe ń əmi nayi, wa zhni kwo woi la pita ntu əmi byibyi ɓo nu. 13 Ɓəhnihni mi gna fye, abahobahoi ń a zhni waazi nabagyi manai ye nya vnyanya n anyì, əɓo n wo kwu zhni nyi a ɓə da kwo ɓo ai pá əwo ɓo."

14 Nlonu zaknayi n Awoceaba; əwo n a ɓə yi ge Yahuda Iskariyoti nyi; wa lo da apirisiti tukwoda 15 wa nyaɓo, "Fye n knyiyi nu lo fya ga mi, ń ma dna fye wo n əfye akwnu a?" Nlonu ɓa ba azulufa shiita ga wo. 16 Ənya n kwo ɓə laka nsayii, Yahuda wa ya zokwo znashni shi wo ɓa ta wo ya ga ɓa.

17 N nyipyei kpmisnui Awyefna Biledi Tnayisti nya, amwutuyi ɓa ɓe da Yeisu, ɓa nyaɓo, "Ho ncei pma ya lo yii zhni Gnanaznu nyagyi gyi aba ga ho ń nanu a?"

18 Wa dnaɓəgbe, "Fye lofyi n əzhiyaakwo, fya lo da əzaho fye gna wo, ‘Nyawuyi wa gna: Əmi əsa n a cei shi mi nyi, kwo la wo vyivyiwyi. Mi ye ma nya Gnanaznu agbmada nu n kwnusnu n əmi amwutuyii dna ń əho pwuwa.’ " 19 Nlonu amwutuyi ɓa zhni shi Yeisu ɓə ga ɓa əgbe jesnu ɓaa zhni Gnanaznu nyagyi zhniaba shi.

20 She wyeshe ɓə she, Yeisu waa sasetu ń myima n tebwul n kwnusnu n Awoceabai. 21 Ɓai kpe ɓai gyi nyagyi, wa gna, "Ɓəhnihni mi gna fye, zaknayi n əfye wo ɓə ɓwu mi."

22 Bwugba kwa wnu ɓa jesnu ɓa ya ɓai nya wo əɓo gbmanyigbmanyi, "Ɓəhnihni Dagayi, ho da əmi nu ɓo"?

23 Yeisu wa dnaɓəgbe, "Əza ń wo la əwo əɓwa kwnudna n mii n əbwe nyi, əwo nu ɓa ɓwu mi. 24 Əza Nugwnu ɓa lo n ɓwasnu shi a ncei kafyilo ntu əwo ɓo nu. Ama owii n əza yii ń wo nu ɓwu Əza Nugwnu nyi! Kwo ɓəə ɓa wo du ngye to ai ma wo m."

25 Nlonu Yahuda, əza ń wo ɓə ye wa ɓwu wo nyi, wa gna, "Ɓəhnihni ho da əmi nu, Rabyi?"

Yeisu wa dnaɓəgbe, "Ho kwu da lonu."

26 Ɓai ye kpe ɓai gyi nyagyi, Yeisu wa la biledi, she wo ɓə kwu Shekwoyi saami, wa sa kwo ya jesnu wa ga əwo amwutuyi, woi gna, "Fye gwo fya gyi; dəye nu zhni əmi nayi."

27 Nlonu wa la bwoɓyi, jesnu woi kwu Shekwoyi saami, wa ga ɓa kwo, woi gna, "Əfye vnyanya fye sni kwo. 28 Dəye nu zhni əmi ami ɓəgbeshi nya, ń a la zeya ntu ń bəgyé ɓo ntu ń aleifyi zo ɓo nyi. 29 Mi gna fye, mi to ɓə ye je anam wnunuyi gyigyii ye sni m; ənya n kwo laka nsaiye kwoi lo abye, akpəge n əwyi yii, ń mi ɓə sni kwo n woiwoyii n kwnusnu n fyei dna n əmi Dada əbemi."

30 She ɓa ɓə kwu anyí kwo, ɓa kwnuya ɓa lo Zaitu Əpe.

31 Nlonu Yeisu wa gna ɓa, "Dna n sukwo ye, əfye vnyanya fye ɓə la myiya ntu n əmi ɓo, ntuge a kafyilo:

" ‘Mi ɓə znu knyiknayi ənya,

jesnu aknyi gəluce ɓə la gnamyi.’

32 Ama shi mi ɓə la laka, mi ɓə la gyi lo n əfye abye lo Gəlili."

33 Byitusu wa dnaɓəgbe, "Kwo n aza vnyanya ɓa ɓə la myiya ntu ń əho ɓo, mi to ɓə myiya m, nanyinanyi."

34 Yeisu wa dnaɓəgbe, "Ɓəhnihni mi gna fye, dna ń sukwo ye, Pisenugba ɓə snu n kwo cekwu, hoi la əmi aɓəna, aɓwa ngwnu-ata."

35 Ama Byitusu wa gna, "Kwo n mi ɓa fyí nu n kwnusnu n hoi, mi taa na ho aɓo m, nanyinanyi." Njesnu amwutuyi aje vnyanya ɓa ɓwa əɓo gbmanyigbmanyi nu da.

36 Nlonu Yeisu wa kwnulo n əwo amwutuyi aba n a ɓə yi ge Gesemani nyi, jesnu wa gna ɓa, "Fye kwu sase zhi n ya, ma zhnignyi n ɓwaayi mii zhniaduwa." 37 Wa kwu Byitusu n kwnusnu n Zebədi anugwnui ngwnu-aba ɓa lo, jesnu wa ya bwugbawnu n azhnìgyei. 38 Nlonu wa gna ɓa, "Əmi wyewyeyi n nunui lo n bwugbawnui kwoi to n əfyii. Fye kwu zhi n ya, fya kwu zhigwu n kwnusnu n mii."

39 Wa ceta lo n abyei fyewyi, wa sheyazhi n awyebai wu n əknyi wa zhniaduwa, "Əmi Dada, ngye kwo ɓa yezhni, fa aa bwoɓyi azhnìgye nya ye gbmi n əmi akwnu. Dudulonu toge əmi ɓəye m, ama shi ho ye."

40 Nlonu wa jezeɓe da əwo amwutuyi, wa gye ɓa zhi ɓai wnagye. Wa nya Byitusu əɓo, "Fye to myi fya kwu zhigwu n kwnusnu ń mii snukna gbmanyi m? 41 Fye kwu zhigwu jesnu fya zhniaduwa, nabai n fye taa lofyi n mwumwu m. Zafnu ncei ye lo, ama nayi ń gbakalá gbàgbài lo."

42 Wa laka lo əɓwa baayi wa zhniaduwa, "Əmi Dada, ngye kwo taa yezhni a gbmi mi bwoɓyi azhnìgye nya ye n əmi akwnu m, sai ma sni kwo, akpəge əho ɓəye kwo zhni."

43 She wo ɓə jezeɓe, wa je ɓa wyegye n zhi ɓai wnagye, ntuge əɓa awye ɓə kwu woshna. 44 Ntulonu wa laka n əɓa aba jesnu wa lo wa zhniaduwa əɓwa taayi, woi ɓwa əɓo gbmanyigbmanyi nu da.

45 Nlonu wa jezelo da amwutuyi wa gna ɓa, "Fye ye zhi lo fyei wnagye nu jesnu fyei snu u? Fye shiawye, əsa la si, a la Əza Nugwnu taya dna n aleifyizhniyi akwnu. 46 Fye kwuka! Yii lo! Əmi ɓwuyi nu ɓə nu!"

47 Yeisu wo ye gnyi woi daɓo, Yahuda, zaknayi ń Awoceaba yi, wa si n ɓo. Deeji yaakwo ɓa ɓe n əɓahnii pmapmai ń kwnusnu n woi n abeyaakwoi shi n abwusii, n apirisiti atukwoda ń abyedai ɓə tnu n ɓai nyi. 48 Nsayii əzaɓwuyi ɓəə la əznù wu ɓa: "Əza n fya gye ma shewna wo; əwo nu, fye wna wo." 49 Ɓa lo da Yeisu n əsagbmanyii, Yahuda wa gna, "Gəizha, Rabyi!" Wa shewna wo.

50 Yeisu wa dnaɓəgbe, "Nugwnudo, zhni əɓo n kwa ɓe n hoi."

Nlonu aza ɓa kwnu da wo, ɓa taɓwashi wo, ɓa wna wo. 51 She Yeisu amwutuyi ɓə gye nlonu, zaknayi ń ɓa, wa wa əwo əbeyaakwo, wa znu pirisiti tukwoda tnutnuyi, waa tnubwa ka wo ya.

52 Yeisu wa gna wo, "La əho əbeyaakwo dna ń əkwo apwi. Ntuge zahozahoyi n wa zhniapma n əbeyaakwoi, wo ɓə fyí n əbeyaakwoi nu. 53 Ho zhninubwo lo nge mi taa myi ma yi əmi Dada, jesnu n əsagbmanyii wa tnu mi n amaləkai agwodo awoceabai nu m? 54 Ama kwo ɓa yezhni n wuna Anyakagyigyiyi ɓa nu, n ɓa da nge ɓəshishi nu ɓa zhni n zokwo ye a?"

55 Nsayii Yeisu wa gna deeji, "Mi zhni kalákpei tukwoda nu, n fye gnyi fyei ɓe da mi n abeyaakwoi n abwusii, fya wna mi i? Nyipyei dəhodəhoi mi ɓə zhni maa sase dna n kwnusnu n fyei n Dagayipwuwa ashilagyí, mii wunya, ama to fya wna mi m. 56 Ama adəye ɓə zhni lonu nabai sheaɓəgwognayi anyaka ɓa nú nu." Nlonu amwutuyi vnyanya ɓa fa wo, jesnu ɓa bwusi.

57 Aza yi n ɓa ɓə wna Yeisu nyi, ɓa lo n woi ń Kayafas pirisiti dnagbmai aba, aba n owa anyawuyi n abyedai ɓəə la yezhi nyi. 58 Ama Byitusu wa lo woi vyi wo ń tagnyi, waa si pirisiti dnagbmai bwokwnu ashilagyí. Wa lodna waa kwnu sasetu n abagwuyii, nabai wa gye əɓo ń kwo ɓa zhni.

59 Apirisiti atukwoda n Sahindiri abwokwnudai vnyanya ɓa zna ɓəgyi katá nya shni tu ń Yeisu nabai ɓa wu wo. 60 Ama to ɓa ɓwa dəho m, kwo shikwonyi aɓəkwnuyi akatá nya bəgyé ɓə la kwnuzhi.

N kpmasnu, aza ngwnu-aba ɓa kwnuzhi 61 jesnu ɓa gna, "Əza ye ɓə gna, ‘Mi ɓa myì maa Dagayipwuwa Shekwoyi nya ye myiya, jesnu ma je kwo mi dna ń anyipyei ngwnu-ata.’ "

62 Nlonu Pirisiti dnagbmai wa laka gnyi wa gna Yeisu, "Ho taa dnaɓəgbe m? Knyi ɓəgbmi nu n aza ye gbmi tu n əho tukwo nyi a?" 63 Ama Yeisu waa gnyi pyi.

Pirisiti dnagbmai wa gna, "Mi gna ho dna ń nyasi n Shekwoyi wyewyeyidai: Gna yi ngye əho nu zhni Masifu, Shekwoyi Nugwnu."

64 Yeisu wa dnaɓəgbe, "Ho kwu da lonu. Ama mi gna fye, əfye vnyanya: Ənya ń kwo laka nsaiye kwoi lo n abyei, fye ɓə gye Əza Nugwnu ń sasetu ń Dagayi ikwo Duduyi ɓwaizhe ɓwa jesnu woi ɓe n tu ń anyì əshebmana nya."

65 Nsayi pirisiti dnagbmai wa sa əwo əjekpe ya jesnu wa gna, "Wo kwu tukwopmi ɓəda da! Yi shna knyi ɓəgbmiyi nu ye a? Shiawye, nsayi fye kwu tukwopmi ɓəda wo. 66 Fye zhninubwo lo nge nanu a?"

Ɓa dnaɓəgbe, "Wo kwnuce lo n əfyii."

67 Nlonu nu ɓa knyiaknyi kpe ń əwo awyeba jesnu ɓa lu wo n akwnui. Azaje ɓa knyi wo agnai apmi 68 jesnu ɓa gna "Da sheɓəgwogna ga yi, Masifu, nyika nu na znu ho ənya a?"

69 Nsayii Byitusu ɓə sase dna ń ashilagyí, ɓyinyikwoi tnutnuyi wa ɓe da wo. Wa gna, "Əhohni ce ho ɓə kwnusnu n Yeisu Gəliliyi."

70 Ama wa naɓo ń aza abye vnyanya. Wa gna, "Mi ta kpe əɓo əye lo n ho gnyi hoi da m."

71 Nlonu wa gbmiya lo abwokwnumi, aba ń ɓyinyikwoi tnutnuyi ədo ɓə gye wo, wa gna aza n ɓa ɓə zhi abaayi nyi: "Əza ye ɓə kwnusnu n Yeisui Nazeretiyi."

72 Wa je aɓəna n nyasísii: "Mi ta kpe əza ye əye lo m!"

73 Əsa snu fyewyi, aza n ɓa ɓə gnyiagnyi zhi n ɓo, ɓa lo da Byitusu ɓa gna, "Ɓəhnihni ho zhni gbmanyi nu dna n ɓa; əho nyitala aɓəda kwo la ho kná."

74 Nlonu wa ya aknyi yi kpe əwohni, jesnu wa sí nyasi ga ɓa, "Mi ta kpe əza ye əye lo m!"

N əsagbmanyii pisenugba kwa cekwu. 75 Nlonu Byitusu wa pá ɓədagbma ń Yeisu ɓəə kwu da. "Pisenugba ɓə snu n kwo cekwu, hoi la əmi aɓo na aɓwa ngwnu-ata." Njesnu wa gbmiya lo əbmyi wa ciɓwi bwugbazhii nya.