1 "Ntuge əshebemi wulo ngye ofwada nu ń wo ɓə gbmiya lo n fyegyiɓwai, wo kwu atnutnuyi ntu ń əwo anamzhni ɓo. 2 Waa ye nge wo ɓə gba ɓa denari gbmanyi ń nyipyei ɓwugyi tnutnu, wa tnu n ɓai lo əwo anamzhni.

3 "N labmii snukna ngwnu-ciwagbmanyi wa gbmiya lo wa gye azaje zhi ń gnyikwota ntna əɓo zhnizhnii. 4 Wa gna ɓa, ‘Əfyehni ce, fye lo fye zhni tnutnu ń əmi anamzhni, mi ɓə gba fye nyahonyahoi n kwo bmya.’ 5 Ntulonu ɓa lo.

"Wa je gbmiya lo n nyipyei tu n atukwo, ngye snukna ngwnu-ata, wa zhni əɓo gbmanyigbmanyi. 6 Ngye snukna ngwnu-atnu n wyesheɓwai, wa je gbmiya lo wa gye azaje ń yee zhi n ɓo. Wa nya ɓa əɓo, ‘Knyiyi nu zhni fyenyi zhi laɓa ń ya nya nyipyei zo ntna əɓo zhnizhnii a?’

7 "Ɓa dnaɓəgbe, ‘Ntuge əzaho too ga yi tnutnu m.’

"Wa gna ɓa, ‘Əfyehni ce fye lofyi fyee zhni tnutnu ń əmi anamzhni.’

8 "She wyeshe ɓə she, anamzhni dagayi wa gna əwo atnutnuyi tukwoda, ‘Yi atnutnuyi zhi ha gba ɓa əɓa atnutnu gyiwye, ha ya n azai ń a ɓə kpmakwu, kwa lo aza n a ɓə kpmikwu nyi.’

9 "Atnutnuyi ń a ɓə kwu ɓa snukna ngwnu-atnu n wyesheɓwai nyi, ɓa ɓe, zahozahoyi wa gwo denari gbmanyi. 10 Ntulonu she aza yi ń a ɓə kwu ɓa n kpmisnui nyi, ɓa ɓə n əwyei tu nge ɓa ɓá gwo n dutu nu. Ama zahozahoyi n ɓa ce, wa gwo denari gbmanyi. 11 Əsa n ɓa ɓə gwo kwo, ɓa ya awyice tu ń ofwada tukwo. 12 Ɓa gna, ‘Aza ye ń a kpma ɓa kwu nyi, ɓa ɓwa tnutnu zhni snukna gbmanyi nu, honyi gba ɓa dəidəi n yii ń ya zhni tnutnu dnagbmai jesnu nyipyei kwo kwu zo kpe n yi nyi.’

13 "Ama wa dna əzaknayi ɓəgbe n ɓa, wa gna, ‘Nugwnudo, mi too gyi fye fyi m. Fye to kwu ye nge fye ɓa zhni tnutnu denari gbmanyi m? 14 Gwo əho gyiwye ha lo. Mi ye ma ga əza ń ma kpma wo la nyi, ənya gbmanyigbmanyi nu shi ma ga fye nyi. 15 Mi to kwnuce lo ma zhni shi mi ncei pma n əmi gyiwyei m? Kwo ho wnunu n mii ntu n əmi ɓwaloya ɓo nu a?’

16 "Ntulonu əza kpmaknai wo ɓə la zè kpmisnuyi, jesnu əza kpmisnuyi wo ɓə la zè kpmaknai."

17 Nsayii Yeisu ɓə gnyi woi gwnulo Urishelima nu. Woi lo ń zokwo, wa pmyi awoceaba zhi n gnagna wa gna ɓa, 18 "Yi zhi yii gwnulo Urishelima nu, jesnu a ɓə la Əza Nugwnu taya ga apirisiti tukwoda n owa anyawuyii. Ɓa ɓə la əfyi owa znutu wo 19 jesnu ɓa ɓə la wo taya dna n Abyedo akwnu ɓai kpe wo agyè, ɓai ɓyewoya ń knalufnyii jesnu ai znuwodu. N nyipyei taayii, a ɓə la wo laka gnyi n wyewyeyi!"

20 Nlonu Zebədi anugwnu əya wa ɓe da Yeisu n əwo anugwnui, wa ceakwokwo shi, wa zna bmyashi shni ń əwo aba.

21 Wa nyaɓo, "Ho ye knyiyi nu a?"

Wa gna, "La ye mi nge gbmanyi ń əmi anugwnu ye ɓə sasetu ń əho ɓwaizheɓwa jesnu əza baayi ń əho ɓwaipmiɓwa dna ń əho əbemi."

22 Yeisu wa gna ɓa, "Fye ta kpe ənya əye lo ń fye nya əkwo əɓo nyi m, fye ɓa myi fya sni bwoɓyi ń mi ye ma sni nyi?"

Ɓa dnaɓəgbe, "Yi ɓa myi."

23 Yeisu wa gna ɓa, "Ɓəhnihni fye ɓə sni bwoɓyi n mi ye ma sni nyi, ama fyei sase kpe ń əmi ɓwaizheɓwa kwo ń əmi ɓwaipmiɓwa, əmi nya nu to, ma ga fye m. Abaye zhni aza yi nya nu ń əmi Dada ɓə zhni ɓa ntu əɓa ɓo nu nyi."

24 She amwutuyi ngwnu-awo ɓə wo ce, ɓa kwu zhi n minagyii n aza ngwnu-aba yei. 25 Yeisu wa yì ɓa zhi n abagbmanyi wa gna, "Fye kpəlo nge Abyedo abegyiyi nya wna ɓa əsnu, jesnu əɓa atukwoda ayaakwo zhni ɓa wu ɓa ikwo. 26 Ama ń əfye aba kwo taa wu nlonu m. Əzahozahoyi ń wo ye lo waa zè əza yaakwo ń əfye atasni, ɓəshishi nu waa zè əfye tnutnuyi, 27 jesnu əza n wo ncei pmalo waa zhni kpmisnuyi, ɓəshishi nu waa zè əfye fyenu, 28 n ɓwasnu shi Əza Nugwnu to ɓə ɓe nabai a zhni wo tnutnu nu m, ama wa zhni aza tnutnu, jesnu wa ga əwo wyewyeyi kwaa zè tagbanya ntu bəgyé ɓo."

29 Shi Yeisu n əwo amwutuyii ɓə zhi ɓai kwnuya n Jerikwo, deeji yaakwo kwa vyi wo. 30 Awyebwayi ngwnu-aba ɓə sase zhi ń zokwogbe, jesnu she ɓa ɓə wo nge Yeisu duya lo; ɓa ɓəwyi, "Dagayi, Dawuda Nugwnu, gye yi snusnu!"

31 Deeji kwa gnaknyi ɓa, jesnu ɓa gna ɓa nge, ɓa kwu cepyi, ama ɓa gná əwyi ɓeɓe nu, "Dagayi, Dawuda Nugwnu, gye yi snusnu!"

32 Yeisu wa kpegnyi, wa yì ɓa. Wa nya ɓa əɓo, "Fye ye ma zhni knyiɓei nu ga fye a?"

33 Ɓa dnaɓəgbe, "Dagayi, yi ye ya gyewyeba."

34 Yeisu wa gye ɓa snusnu, wa to əɓa awye ɓwa. Nsayisayii ɓa gwo əɓa wyebagye, ɓa vyi wo.