1 N Sibyiwyi avnu, n fyegyi ɓwai ń nyipyei kpmisnuyi laadi yi nya, Mariyamwu Magadalayi n Mariyamwu dəyii ɓa lo ɓəə gye vnyigwo.

2 Əknyi ashnaje yaakwo kwa laka ntuge maləka Dagayi nya ɓə shnizhi ɓe ń əshemi, wa lo vnyigwo, wa pmyi kwuta ya jesnu wa sasetu ń kwo. 3 Əwo nayi ɓə wu ngye əgbmanabmya nu, jesnu əwo aje n wu bwuibwuii ngye əgbmakwuta. 4 Əwo ədna kwa wo abagwuyi kwa zhni ɓa vnyi, ɓa kwu zè ngye azafyí.

5 Maləka wa gna anyikwoza yi, "Ədna to wo fye m. Ntuge mi kpəlo ge fye zna Yeisu nu shni, n a ɓə znu wo du nyi.

6 "Wo to dnalo ń ya m; wo la laka n ɓwasnu shi wo ɓə da nyi. Fye ɓe fya gye aba ń a ɓə n woi shi nyi.

7 "Nlonu fye lo ń pyeepye fyei gna əwo amwutuyi: ‘Wo la laka ń əfyi jesnu wo gyilo ń fye abye woi lo Gəlili. N abaayi nu ń fye ɓəə gye wo əwye.’ Nsaiye, mi kwu gna fye."

8 Ntulonu anyikwoza yi, ɓa gaya ń pyeepye n vnyigwo aba, n ədnai, ama n nunui n agbmadai, jesnu ɓa bwusi lo ɓəə gna əwo amwutuyi. 9 N əsagbmanyii Yeisu wa shegwnu ɓa. Wa gna "Sambəlika." Ɓa ɓe da wo, ɓa shi wo ń apitabwada jesnu ɓa ga wo mwamwa. 10 Ntulonu Yeisu wa gna ɓa, "Ədna to wo fye m. Fye lo fye gna əmi azaje nge ɓa lo Gəlili; n abaayi nu ń ɓa ɓəə gye mi əwye."

11 Shi anyikwoza yi ɓə yee lo n zokwo, abagwuyi hó ɓa lofyi ń əzhiyaakwo ɓa ga apirisiti atukwoda əɓa əɓədokwu ɓəhoɓəhoi ń kwo ɓə kwu zhni. 12 She apirisiti atukwoda ɓə yezhi ɓədo n abyedai ɓa pakwúlu, ɓa ga abagwuyi gyiwye yaakwo, 13 ɓai gna ɓa, "Fye da aza nge, ‘Əwo amwutuyi ɓəə ɓe n sukwoi ɓa wo wyi, yii kwu wnagye.’ 14 N anabagyi ye ɓə ló gwomna tnubwa, yi kpe əɓo əye lo ń yi ɓə gna wo, ya kwnu fye ya ń azhnìgye." 15 Ntulonu abagwuyi ɓa gwo gyiwye, ɓa zhni shi a ɓə gna ɓa. Jesnu anabagyi ye ɓaa gnamyiya fyi ń Ayahudiyi, nya nyipyei ye.

16 Nlonu amwutuyi awocei-gbmanyi ɓa lo Gəlili, ɓa lo əpe aba ń Yeisu ɓə gna ɓa nge ɓa lo nyi. 17 She ɓa ɓə gye wo əwye, ɓa ga wo mwamwa; ama azaho ń ɓa, to ɓa ga gaiciya m. 18 Nlonu Yeisu wa ɓe da ɓa wa gna, "A la ikwo ga mi vnyanya n əshemi ɓədo n anyìi. 19 Ntucenu fye lo fye kwu aza zhni amwutuyi n anyì vnyanya, fyee zhni ɓa batizima dna ń Dada əye n Nugwnui n Zafnu Gyigyiyii, 20 jesnu fyee wunya nge ɓa vyi aɓo vnyanya n mi ɓə tu fye əgbe nyi. Ɓəhnihni mi kwnusnu lo n fyei ciici, nya anyìzo sa."