1 Shi a ɓə la Yeisu ma dna n Baitalamyi n Yahuda əknyi, dna ń əsu Hiridusu əbəgyisa, Awyemwayi ɓai kwnu n kpəkwó ɓa ɓe Urishelima 2 ɓa nyaɓo, "Əza yi dna n nanu ń a la ma Ayahudiyi əsu nyi a? Ya gye əwo kpasi əsa n kwa kpe tu nyi, jesnu yi kwu ɓe ya ga wo mwamwa."

3 She əsu Hiridusu ɓə wo ce, kwa wnu wo bwugba ɓədo n Urishelima əknyii vnyanya. 4 She wo ɓə la apirisiti atukwoda n owa anyawuyii yezhi vnyanya n aba gbmanyi, wa nya ɓa abaayi ɓo ń a ɓə ma Kirisiti. 5 Ɓa gna, "Dna ń Baitalamyi n Yahuda əknyi. Ntuge əɓo nyi n sheɓəgwognayi ncei kafyilo:

6 " ‘Ama əho, Baitalamyi, n Yahuda əknyi,

ho to zhni əzhi wyegbaciyi nu ń Yahuda abegyiyi m;

ntuge əza ɓə gbmiɓe ń əho nu ń wo ɓə kna Israila əmi aza.’ "

7 Nsayi Hiridusu wa yì Awyemwayi zhi fyaa, wa nya ɓa əsa ɓo n kpasi ɓə kpeyawu ncei. 8 Wa tnu n ɓai n Baitalamyi, wa gna, "Fye lo fye zna əɓyi yi shni pəceye. N əwo wyegyegyei, fye ɓe fya gna mi, nabai ma lo mi ga wo mwamwa ce."

9 Shi ɓa ɓə kwu əsu ɓəda wo, ɓa wna zokwo, kpasi ń ɓa ɓə gyewye əsa ń kwo ɓə kpeyawu nyi, ɓa gye kwoi lo ń əɓa abye jesnu ɓa vyi kwo lo nya əsa ń kwo ɓə kpetu n aba ń əɓyi ɓə dna nyi. 10 She ɓa ɓə gye kpasi yi, bwugba kwa da ɓa n mwa. 11 Ǹ əɓa pwuwa loloí, ɓa gye əɓyi n əwo əyai Mariyamwu, ɓa yazhi ɓa ga wo mwamwa. Ɓa gwu əɓa anyaɓwa ya ɓa ga wo anyaga zinali nya, frakisensi n myirii. 12 Əsa ń ɓa ɓə jezelo əɓa əknyi, to ɓa lo Urishelima ɓa ga əsu Hiridusu anabagyi m, ntuge Shekwoyi ɓə la əɓo kpma ɓa dna ənanu nge ɓa lo n zokwo doi.

13 She ɓa ɓə kwu lo, maləka Dagayi nya wa ɓe Yusufu aba dna ənanu, wa gna wo, "Laka ha la əɓyi n əwo əyai ha wyiya lo Masar. Ho la dna n ɓwaayi, nya əsa n mi ɓə gna ho nge ho jezeɓe, ntuge əsu Hiridusu ye wa zna əɓyi ye shni nu nabai wa wu wo."

14 Dna n sukwo yi, wa laka wa la əɓyi n əwo əyai ɓa lo Masar, 15 aba ń wo ɓə dna, nya Hiridusu əfyi sa. Ntulonu əɓo n Dagayi ɓəə kwu da n sheɓəgwognayi əgbe, kwa kwu nu: "Ń Masar nu ń ma yi əmi nugwnu."

16 She Hiridusu ɓə kpe nge awyemwayi n la zè n əwo avnu, wa gyi minagyi napyei, wa ga əgbe nge a wu aɓyi azanugbai vnyanya ń ɓa ɓəi n ayei ngwnu-aba kwoi lo snuta ń Baitalamyi n əkwo azhigbai, woi vyi əsa ń awyemwayi ɓə da wo ncei. 17 Nsayi, ənya ń a ɓə da ń sheɓəgwognayi Irimyiya əgbe, kwa kwu nu:

18 "A kwu bəgye wo dna n Rama,

ɓwuci nya n bwugbawnu yaakwoi,

Rahila woi ciɓwi woi zhe awyenyi ntu n əwo aɓyi ɓo,

to woi wo atnazhni m,

ntuge ɓa to ye lo m."

19 Shi Hiridusu ɓə la fyí, maləka Dagayi nya wa kpeya da Yusufu dna n ənanu n Masar, 20 wa gna, "Laka, la əɓyi ye n əwo əyai fya jezelo Israila əknyi, ntuge aza yi n ɓa ɓə zna əɓyi wyewyeyi znashni nyi, ɓa kwu fyí."

21 Ntulonu wa laka, wa la əɓyi n əwo əyai ɓa lo Israila əknyi. 22 Ama she ɓa ɓə wo nge Arkelas nu tú woi gyibe tu n Yahuda ń əwo dada Hiridusu apita, ədna kwa wo wo ń wo ɓa lo n ɓo. Ai la kpma wo ń ənanu, wa pmyiya lo Gəlili əknyi, 23 wa lo waa dna ń əzhi ai yi Nazereti. Ntulonu ɓəda ń sheɓəgwognayi ɓə da kwa kwu nu, nge a ɓə yi wo nge Nazeretiyi.