1 Dna ń əwyi yi, Yeisu wa gbmiya ń apyi wa lo waa sase ma n nuwna-znudna əgbe. 2 Deeji yaakwo kwokwo kwa yezhi n shekna wo, kwa zhni wo wa lodna ń əya nuwnanya, waa sase dna ń kwo, n azai gnyiagnyi zhi n nuwna əgbe. 3 Nlonu wa gna ɓa aɓo bəgyé fyi ń aɓəsisi, woi gna, "Fwanuyi ɓə gbmiya lo wo bye əwo nyabye. 4 Shi wo ɓə lo woi she nyabye, adəho ɓa kaya zhi n zokwo, alú ɓa ɓe ɓa kwu ɓa gyi. 5 Adəho ɓa kaya kpe ń apmatala, aba ń ɓa to ɓə n amwii kpe n mwa m. Ɓa pa n pyeepye, ntuge amwii to ɓə loloi m. 6 Ama she nyipyei ɓə kpeɓe əkwo wowo kwa zhni ɓa kwu ɓwaa, ntuge ɓa to ɓə n agbegyei sasayii m. 7 Nyabye dəho kwa kaya fyi ń aknawui, aknawui ɓa mwa ɓaa kwo gyice. 8 Dudulonu, nyabye dəho kwa kaya fyi ń əknyi manai, aba ń kwo ɓə ga gyigyi n mwa; dəho tagyi, dəho shiitnanyi, dəho shiita. 9 Zahozahoyi ń wo n atnubwai lo, akpəge wo wo."

10 Amwutuyi ɓa ɓe əwo aba ɓa nyaɓo, "Knyiyi nu zhni hoi daɓo ń azai n aɓəsisi nu a?"

11 Wa dnaɓəgbe, "Ntuge ɓəyekpe aɓo aɓwuɓwui əshebemi nya, a kwu ɓa ga fye, ama toge əɓa m. 12 Zahozahoyi ń wo ncei lo a ɓə ɓe wo, nabai wa kwu ɓwa ɓwoye. Zahozahoyi ń wo to ncei lo m, kwo ədo ń wo ncei lo nyi, a ɓə la kwo gwo wo. 13 Cenuzhni mii daɓo n ɓai n aɓəsisii:

"Kwo shikwonyi ɓa shiawye lo, ɓa ta gyewye lo m;

kwo shikwonyi ɓa knatnubwa lo, ɓa ta wo lo m, jesnu ɓa ta ɓwa əkwo awyega lo m.

14 Sheɓəgwogna Ishaya nya kwo kwu nu kpe ń ɓa:

" ‘Fye ɓa gwodu fyei wo, ama fye taa kpəgənyi m kpeekpe;

fye ɓa gwodu fyei shiawye, ama fye taa kpe ɓəho gənyi m kpeekpe!

15 Ntuge aza ye ədu kwo la shni;

kwo dnaɓo lo ɓa wo n əɓa atnubwai,

jesnu ɓa kwu əɓa awye kpe.

Ntolonu m ɓa ɓá gye n əɓa awyei,

ɓa wo n əɓa atnubwai,

ɓa kpəgənyi fyi n əɓa adu ɓa pmyiɓe,

jesnu ma ka ɓa gna.’

16 Ama əfye awye ń zhni anabəlika nya nu, ntuge ɓa gye əɓo əwye lo, jesnu n əfye atnubwai ntuge ɓa wo əɓo lo. 17 Nlonu ɓəhnihni mi gna fye, sheaɓəgwognayi ń aɓəfyeceyi mwa bəgyé lo ń ɓa ɓə ncei pma ɓa gye anya ń fye gyewye nyi, ama to ɓa gye əkwo m, jesnu ɓa wo aɓo ń fye wo nyi ama to ɓa wo əkwo m.

18 "Knatnubwa nsayi fya kpe nyabye ɓəsisi awyega: 19 She əza wo nabagyi ntu əshebemi ɓo, to wa ɓwa əkwo gənyikpe m, əzanukwoyi wa ɓe wa fna ənya n a kwu bye fyi n əwo ədu. Nyabye nyi n kwo kaya zhi n zokwo. 20 Nyabye n kwo ɓə kaya kpe n apmatala nyi, kwo wu ngye əza pya nu n wo wo ɓədagbma jesnu wa gwo kwo n əsagbmanyii n bwugbadai. 21 Ama shikwonyi wo to n agbegyei lo m, kwo ta mwasa m. She azhnìgye kwo awyesnugbegye ɓo ɓe ntu ɓədagbma ɓo, waa pye n myiyai. 22 Nyabye ń kwo ɓə kaya fyi ń aknawui nyi, əkwo nu zhni əza ń wo wo ɓədagbma, ama aɓəsa anyìgyi nya n akwocedna nyaɓwa nyai ɓa gyi ɓədagbma yi ce, kwa zhni kwo to kwa ga gyigyi m. 23 Ama nyabye n kwo kaya fyi n əknyi manai nyi, əkwo nu wu əza n wo wo ɓədagbma jesnu wa ɓwa kwo awyega. Əza nyi n wo ga gyigyi, adəho aɓwa tagyi, kwo shiitnanyi, kwo aɓwa shiita she a ɓə bye."

24 Yeisu wa je ɓa ɓəsisi ədo gna: "Əshebemi wulo ngye əza nu n wo ɓə bye nyabye manai n əwo ofwa. 25 Ama n sukwoi, zahozahoyi dna woi wnagye, əwo nuwnuyi wa ɓe wa bye agbegbe fyi n alikama ofwa yi wa lo wo nya. 26 She alikama ɓə pa ɓa ya atukwofyi nlonu agbegbe ce ɓa kpmiyawu.

27 "Ofwada atnutnuyi ɓa ɓe da wo ɓa gna, ‘Zadnagbmai, ho to ɓə bye nyabye manai nu n əho ofwa m? Agbegbe ɓa kwnu nsayi n nanu a?’

28 "Wa dnaɓəgbe, ‘Nuwnuyi ho nu na zhni ɓəye.’

"Atnutnuyi ɓa nya wo, ‘Ho ɓa ye nge yi lo yii shi ɓa ya?’

29 "Wa gna, ‘Aawo, ntuge əsa n fye ɓa shi agbegbe ya nyi, kpəsnu fya gye fyei shi alikama ya ɓədo. 30 Fye fa ɓa kwnú mwa n aba gbmanyi nya afwanyakwu sa. N əsayii nu, n mi ɓə gna afwanyakwuyi: Fye la agbegbe gbezhi fya pa ɓa na akwui, a gyi ɓa əná; fya ye alikama zhi fya kwu ɓa fyi n əmi dobwi.’ "

31 Wa da ɓa ɓəsisi dəho: "Əshebemi wulo ngye musta byegye nu, ədo n əza ɓə la wa bye dna n əwo ofwa. 32 Kwo shikwonyi əkwo nu gnagbagbai n anyabye vnyanya, dudulonu shi kwo mwa, kwaa zè shnuwna duduyi n alú ɓe ɓa kpe ama n əkwo aɓwala."

33 Wa je ɓa ɓəsisi dəho gna: "Əshebemi wu ngye yisti nu n nyikwoza n wo zhni biledi ɓə la wa gbmiaje n biledi wyilukwui, əkwo shnawo ɓə lo ngye kyilo shiitnanyi, nya əsa n yisti yi ɓə la nyagbmi vnyanya."

34 Yeisu wa gna deeji aɓo ye vnyanya n aɓəsisii; wo to ɓə da ɓəhoɓəhoi n ɓai ntna apmazhni n ɓəsisii m. 35 Ntulonu ɓəda n sheɓəgwognayi ɓə ncei da zhi kwa kwu nu:

"Mi ɓa gwú əmi əgbe ya dna n aɓəsisi,

mi ɓa da aɓo aɓwuɓwui n ɓa ɓəə nyi tunyi n anyì zhni əsai."

36 Nlonu wa laka n deeji aba wa lodna n pwuwa. Əwo amwutuyi ɓa ɓe da wo ɓa gna, "Wu yi awyega agbegbe ɓəsisi nya fyi n ofwa."

37 Wa dnaɓəgbe, "Əza n wo ɓə bye nyabye manai nyi, əwo nu zhni Əza Nugwnu. 38 Ofwa nu zhni anyì, jesnu nyabye manai nu zhni aza əshebemi nya. Agbegbe nu zhni əzanukwoyi aza, 39 jesnu nuwnuyi n wo ɓə bye agbegbe nyi, əwo nu zhni shetam. Afwanyakwu sa nu zhni anyìzo sa, jesnu amaləka nu zhni afwanyakwuyi.

40 "Ngye shi a shi agbegbe ya a kpe ɓa əná nyi, nlonu n a ɓəi zhni n anyìzo əsai. 41 Əza Nugwnu ɓə tnú n əwo amaləkai, ɓai fa agbegbe ya n əwo əbemi, nyahonyahoi n kwo ɓə ɓe n leifyii n azai vnyanya n ɓa zhni ɓənukwoi nyi. 42 A ɓə sheɓaya fyi ń əná-gwogwoi, aba n a ɓə ciɓwi ai gyi anyikna. 43 Nlonu, aɓəfyeceyi ɓə shenaya ngye nyipyei n əɓa Dada əbemi. Əza n wo n atnubwai lo, akpəge wo wo.

44 "Əshebemi wulo ngye nyaɓwayezhi nu n kwo sodna n ofwa. She əza ɓə gye kwo əwye, wa kwu kwo je anya pwi, nlonu dna n əwo bwugbada wa lo wa kwnú anya vnyanya n wo ɓə ncei wa si ofwa yi.

45 "Njesnu, əshebemi wulo ngye ɓwazeyi yaakwo nu, n wo zna kwuta nakwoi manai shni. 46 She wo ɓə gye gbmanyi gyiba yaakwo nya, wa lo wa kwu nyahonyahoi kwnu n wo ɓə ncei wa si kwo.

47 "Njesnu, əshebemi wu ngye əssá nu, n a ɓə she kwo ya fyi n nuwna-znudna kwa wna abmya dəhodəhoi pya. 48 She kwo ɓə la nu, abmyawnayi ɓa gnyì kwo ɓe ncei kpe n əkpma. Nlonu ɓa sase zhi ɓa tnu amanai fyi n cekwnu, ama ɓa kwu anukwoi sheya. 49 Nlonu n kwo ɓə ze ń anyìzo əsa. Amaləka ɓə ɓe ɓa tnu akpizhniyi ya ń aɓəfyeceyi 50 jesnu ɓai sheɓaya fyi ń əná-gwogwoi, aba n a ɓə ciɓwi ai gyi anyikna."

51 Yeisu wa nyaɓo, "Fye kwu aɓo ye kpəgənyi vnyanya a?"

Ɓa dnaɓəgbe, "Əə."

52 Wa gna ɓa, "Ntucenu owa nyawuyi dəhodəhoi n wo la zè mwutuyi n əshebemi, wo wu ngye pwuwada nu, n wo kwnu anya yazhi n nyaɓwayezhii nyakwnu; awoiwoyi n akwokwoyii."

53 She Yeisu ɓə kwu aɓəsisi ye zo da, wa laka ń ɓo. 54 Shi wo ɓə ɓe əwo əzhi, wa ya aza nyawu fyi n əɓa Ayahudiyibwokwnu, jesnu ca wo ɓa. Ɓa nyaɓo, "Əza ye wa ɓwa wyemwa n kalá aɓəwowoi nya yei ń nanu a? 55 Əza ye nu to zhni kafyinta nugwnu m? A ta yi əwo əya nu ge Mariyamwu m, jesnu əwo azaje nu to n Jemyisii, Yusufu, Sima n Yahudai m? 56 Əwo amapwi vnyanya to kwnusnu lo əyi m? Nsaiye, n nanu n əza ye wo ɓwa aɓo ye vnyanya a?" 57 Əwo əɓo kwa sna ɓa. Ama Yeisu wa gna ɓa, "Sheɓəgwognayi to lo ntna mwamwa m akpəge n əwo əzhi jesnu dna n əwo pwuwa."

58 Ntucenu to wa zhni atuzè bəgyé ń ɓo m, ntu n əɓa tnagaiciyaganunui ɓo.