1 Yeisu Kirisiti, Shekwoyi Nugwnu anabagyi manai ayayaba, 2 ngye shi kwo kafyilo dna n sheɓəgwognayi Ishaya:

"Mi ɓə tnú n əmi tnutnudayii woi la gyilo ń əho abye,

əwo nu ɓə zhni əho zokwo aba."

3 "Əza bəgye dnawyi lo dna ń zhabwikawu,

‘Zhni zokwo ga Dagayi,

la awogye tacé ceewo ntu n əwo ɓo.’ "

4 Ntulonu Yohana Batizimazhniyi wa kpeyaɓe dna n zhabwikawu, woi zhni waazi batizima abwuye nya ntu n aleifyi zo ɓo. 5 Azhigba vnyanya ń Yahudiya ɓədo n azai vnyanya fyi ń Urishelima ɓa kwnuya lo da wo. Ɓai da əɓa aleifyi, wa zhni ɓa batizima dna n Urudu əlà. 6 Aje n Yohana ɓə ncei kpe nyi, a ɓə zhni ɓa n lakwnumi əyii nu, wo ɓə n gigyii znu ń əwo əshni n əshnipa nyai nu, jesnu àɓo nu ɓə zhni əwo nyagyi n əsugbmài. 7 Əwo waazi nu ɓə nyi: "N əmi avnu əzado ɓe lo n wo du mi lo n kalá, mi to kwnuce lo ma ceakwokwo shi ma lo əwo abwada abma ya m. 8 Mi zhni fye batizima n nuwnai nu, ama wo ɓə zhni fye batizima n Zafnu Gyigyiyii."

9 Dna n əsa yi, Yeisu wa gbmiɓe n Nazereti, dna n Gəlili əknyi, jesnu Yohana wa zhni wo batizima dna n Urudu əlà. 10 Əsa n Yeisu ɓə gbmiɓe n nuwna, wa gye əshemi n gwuya gnyi, jesnu Zafnui shnizhi tu n wo ngye lukpe. 11 Wa wo bəgye kwoi gbmiɓe n əshemi kwoi gna, "Əho nu zhni əmi Nugwnu n mi ye nyi; agbmada mi n hoi n mwa."

12 N əsagbmanyii Zafnu wa gbmi wo ya dnalo ncei n zhabwikawu. 13 Wo ɓə la dna n zhabwikawu anyipyei shiinyi, Shetam woi mwu wo. Wo ɓə dna n kwnusnu n anyafwanyai nu jesnu amaləka ɓa bma wo zhni.

14 Shi a ɓə la Yohana gwudna n zhalu, Yeisu wa lodna n Gəlili, woi dna Shekwoyi nabagyi manai əwyi. 15 Wa gna, "Əsa kwo la si, Shekwoyi əbemi kwo la ɓe vyivyiwyi. Fye yeabwi jesnu fya ga nabagyi manai gaiciya!"

16 Shi Yeisu ɓə lo woi znazna ma lo n Gəlili əlàgbe, wa gye Sima n əwodoi Anduru ɓai she əsa fyi n nuwna-znudna, ntuge ɓa ɓə zhni abmyawnayi nu. 17 Yeisu wa gna, "Fye ɓe, fya vyi mi, jesnu mi ɓə tnu n fyei, fya wna aza ngye abmya." 18 N əsagbmanyii, ɓa ya əɓa asa zhi, jesnu ɓa vyi wo.

19 Shi wo ɓə ceta lo n abyei fyewyi, wa gye Jemyis Zebədi nugwnu n kwnusnu n əwodoi Yohana, n fyi n əya nuwnanya ɓai zhni əɓa asa aba. 20 Ntna əsa wnuyai, wa yì ɓa, jesnu ɓa fa əɓa dada Zebədi dna n əya nuwnanya n kwnusnu n agwodogwo zhniyii, ɓa vyi wo.

21 Ɓa lo Kapanam, she Sibyiwyi ɓə si, Yeisu wa lodna n Ayahudiyibwokwnu wa ya nyawu. 22 Əwo nyawu kwaa wo aza, ntuge wo ɓə wunya ngye əza nu n wo n ikwoi, toge ngye owa anyawuyi m. 23 Nsayii, əzaho ɓə dna n Ayahudiyibwokwnu ń wo ɓə n zafnu ajegbmiyi, wa sáwyi, 24 "Ho ye knyiyi nu n əyi a, Yeisu Nazeretiyii? Ha ɓe ha zhni yi agbma nu? Mi kpe əza əye lo n wo gnyi n hoi; Gyigyiyida, Shekwoyi nya!"

25 Yeisu wa gnaknyi zafnu n əwyei bmyibmyiyi ge, "La cepyi! Gbmiya ɓe n wo!" 26 Zafnu ajegbmiyi kwa je wo ashna n kalái, jesnu kwa gbmiya n wo kwoi fyiakwu.

27 Ca wo aza vnyanya n mwa, kwa zhni ɓa ɓà nya aje əɓo, "Knyiɓei nu nyi a? Nyawu woiwoyi ń ikwoi ɓədo! Kwo azafnu ajegbmiyi, wo ga ɓa ɓəgbe jesnu ɓai vyi wo ɓəgbetu." 28 Əwo anabagyi kwa gnamyi fyi n Gəlili əknyi vnyanya n pyeepyé.

29 She ɓa ɓə ze n kwnukwnui ń Ayahudiyibwokwnu, ɓa lo Sima n Andurui pwuwa, n kwnusnu n Jemyis n Yohanai. 30 Sima yezhi nyikwozada ɓə tu ń gədo n nayi-nagwnu yi, nsayisayii, ɓa gna Yeisu əwo əɓo. 31 Ntulonu wa lo wo aba, wa shi wo n əɓwa, wa laka tu ń ase. Nayi-nagwnu kwa fa wo, wa laka gnyi wa ya ɓa ɓəvyi.

32 N wyeshe yii, she nyipyei ɓəə la shni, aza ɓa ɓe Yeisu n anyasnayii ɓədo ń ase-anyasnayii vnyanya. 33 Əzhi vnyanya kwaa yezhi n abwokwnumigbe, 34 jesnu Yeisu ɓə la aza bəgyé kágna n ɓa ɓə n anyasnai gbowogbowo. Waa ase bəgyé kwnuya, to wa ye ase nge ɓa daɓo m, ntuge ɓa ɓə kpé əza pya ye n wo ɓə zhni.

35 N labmilabmii, to ənyai zo knaya m, Yeisu wa laka, wa gbmiya n apyi wa lo aba pyipyipyii, aba n wo ɓə zhniaduwa. 36 Sima n əwo azajei ɓa lo əwo znashni. 37 Əsa n ɓa ɓə gye wo əwye, ɓa gna: "Zahozahoyi zna ho shni lo!"

38 Yeisu wa dnaɓəgbe, "Fye ɓe ya lo ɓwado n kasnu, nabai n mi ɓəə zhni waazi ce n abaayi. Cenu ɓə zhni mà ɓe." 39 Ntulonu wa zna laɓa n Gəlili əknyi vnyanya woi zhni waazi n əɓa Ayahudiyibwokwnu woi kwnu ɓa ase ya.

40 Əzaho n nayiwnu nyasnai wa ɓe da wo wa ceakwokwo shi, wa ɓa wo, "Ngye əho əɓəye nu, ho ɓa myi ha ka mi gna."

41 Yeisu ń nunui gnyi n snusnugyei, wa ta əwo əɓwa ya wa to wo əɓwa wa gna, "Əmi ɓəye nu, gwo kágna." 42 Nsayisayii nayiwnu nyasna kwa fa wo jesnu wa ɓwa kágna.

43 Yeisu wa gna wo ami, wa kwnù wo n əwyei bmyibmyii: 44 "To gna zahozahoyi ɓəye m. Ama lo, ho wu əhohni tukwo n pirisiti aba jesnu ha ga anyaga n Mwusa ɓə tugbe ntu n əfye pmyapmya ɓo nyi, kwaa zè ɓəgbmi ga ɓa." 45 Ama n əkwoɓwi, shi wo ɓə laka n ɓo wa ya ɓəda palala, woi gná nabagyi myi laɓa. Ntucenu, to Yeisu wa shna myi woi ló əzhi lo ai gye wo m, ama waa kpegnyi n aba ń aza to lo m. Dudulonu aza ɓa du ɓa ɓe da wo ɓai kwnu n ɓwahoɓwahoi.