1 Nsayii nyagyi gyi Gnanaznu nya ɓədo n Awyefna Biledi Tnayisti nyai, ɓə ɓwace anyipyei ngwnu-aba nu jesnu apirisiti tukwoda n owa anyawuyii ɓə zhi ɓai zna zokwo shni ɓa wna Yeisu fyaa nabai ɓa wu wo 2 Ɓa gna, "Ama toge dna n awyefna əsa m, ntolonu m, aza ɓa la əgwulapwi kala."

3 Woi ye dna n Byetani, n Sima Nayiwnuyi pwuwa n sasetu n tebwul woi snú, nyikwoza ho wa ɓe n lúulúu əmi snidaii shi n a ɓə zhni kwo n nardi tnadodnai. Wa ɓá lúulúu yi ya jesnu wa zè əmii ya kpe n Yeisu tukwo.

4 Azaho n ɓa ɓə fyi n ɓo, ɓa gyi minagyii ɓa gna aje, "A zhni əmisnidaí ye agbma n knyiɓei nu a? 5 A ɓə ɓa kwnu kwo n du əye ɓwugyi tnutnu gyiwye ya, jesnu a ce gyiwye a ga asnayi." Ɓa gnaknyi nyikwoza yi n kalái dnadnai.

6 Yeisu wa gna ɓa, "Fye la wo fa, knyiyi nu zhni fyei gna wo gnagna a? Wo kwu əɓo manai zhni ga mi. 7 Awyekwoyi n kwnusnu lo n fyei ciici, jesnu fye ɓa myi fya bma ɓa zhni əsa n fye ncei pma. Ama fye taa ɓwa əmii da nsahosahoi m. 8 Wo kwu əɓo zhni n wo ɓa myi wa zhni. Wa zè nyasnidai ya kpe n əmi nayi n pitalai ntu əmi byibyi ɓo nu. 9 Ɓəhnihni mi gna fye, abahobahoi n a ɓə zhni waazi nabagyi manai ye nya vnyanya n anyì, əɓo n wo kwu zhni nyi, a ɓə da kwo ɓo ai pa əwo ɓo."

10 Nlonu Yahuda Iskariyoti, zaknayi n awoceaba yi, wa lo da apirisiti atukwoda wo kwnu Yeisu n əɓa aba. 11 A da ɓa n mwa shi ɓa ɓə wo ɓəye, jesnu ɓa shi wo ɓəgbe nge ɓa ɓá ga wo gyiwye. Ntulonu waa gnyi woi dna əsa wye n kwo ɓa bmya wa ta wo ya ga ɓa.

12 N nyipyei kpmisnui Awyefna Biledi Tnayisti nya, she kwo ɓə zhni kwnunu ɓo nu, a ga nyaga Gnanaznu kwugyasnáyi nakpei nya, Yeisu amwutuyi ɓa nya wo əɓo, "Ho ncei pma ya lo yii zhni Gnanaznu nyagyi gyi aba ga ho ń nanu a?"

13 Ntulonu wa tnu əwo amwutuyii ngwnu-aba, wa gna ɓa, "Fye lo əzhiyaakwo, fye ɓəə gye əza n nuwna nyikwnui tu wo ɓə shegwnu fye. Fye vyi wo. 14 Pwuwa n wo ɓəə lodna n kwo nyi, fye gna pwuwada yi, ‘Nyawuyi nyaɓo lo: Əmi zhiɓeyi nyakwnu gnyi ń nanu, aba n mi ɓa gyi Gnanaznu nyagyi n kwnusnu ń əmi amwutuyii nyi a?’ 15 Wo ɓəə wu fye nyakwnusniyi dnagbmai ntu n əshe, n ashnikpegyei pma abazhni zhi. Fye zhniaba aba ga yi n ɓo."

16 Amwutuyi ɓa kwnuya lo, ɓa lofyi n əzhiyaakwo yi ɓa gye aɓo n ɓwasnu shi Yeisu ɓə gna ɓa nyi. Ntulonu ɓa zhni Gnanaznu nyagyi ɓo.

17 She wyeshe ɓə she, Yeisu wa si abaayi n kwnusnu n ngwnu-awoceabai. 18 Əsa n ɓa ɓə myima n tebwul ɓai gyi nyagyi, wa gna, "Ɓəhnihni mi gna fye, zaknayi n əfye wo ɓə ɓwu mi; əza n wo kwnu nyagyigyi lo n mii nyi."

19 Bwugba kwa wnu ɓa, jesnu əɓa gbmanyigbmanyi ɓa nya wo əɓo, "Ɓəhnihni ho da əmi nu ɓo?"

20 Wa dnaɓəgbe, "Zaknayi nu n əfye awoceaba ye, n wo kwnu əwo biledi dadna lo n mii n əbwe nyi. 21 Əza Nugwnu ɓa lo n ɓwasnu shi a ncei kafyilo ntu əwo ɓo nu. Ama owii n əza yii ń wo nu ɓwu Əza Nugwnu nyi! Kwo ɓəə ɓa wo du ngye to a ye ma wo m."

22 Ɓai ye kpe ɓai gyi nyagyi, Yeisu wa la biledi, she wo ɓə kwu Shekwoyi saami, wa sa kwo ya jesnu wa ga əwo amwutuyi kwo, woi gna, "Fye gwo kwo; dəye nu zhni əmi nayi."

23 Nsayi wa la bwoɓyi wa sa Shekwoyi ami wa ga ɓa kwo, jesnu əɓa vnyanya ɓa sni n kwo.

24 Wa gna ɓa, "Əmi ami nu nyi ɓəgbeshi nya, n a la zeya ntu bəgyé ɓo. 25 Ɓəhnihni mi gna fye, mi to ɓə ye je anam wnunuyi gyigyii ye sni m, akpəge n əwyi yii ń mi ɓə sni kwo n woiwoyii n Shekwoyi əbemi."

26 She ɓa ɓə kwu anyí kwo, ɓa kwnuya ɓa lo Zaitu Əpe.

27 Yeisu wa gna ɓa, "Əfye vnyanya fye ɓə la myiya, ntuge kwo kafyilo:

" ‘Mi ɓa znu knyiknayi ənya,

jesnu aknyi ɓa ɓə gnamyi.’

28 Ama shi mi ɓə la laka, mi ɓə la gyi n əfye abye lo Gəlili."

29 Byitusu wa da, "Ngye kwo aza vnyanya ɓə la myiya, mi to ɓə myiya m."

30 Yeisu wa dnaɓəgbe, "Ɓəhnihni mi gna ho, n naiye; əə, dna n sukwo ye; pisenugba ɓə snu n kwo cekwu aɓwa ngwnu-aba hoi la əmi yekpé aɓo na aɓwa ngwnu-ata."

31 Ama Byitusu waa gyitu n əwyei bmyi, "Kwo ngye mi ɓa kwnu fyí nu n hoi, mi taa na ho aɓo m nanyinanyi." Jesnu azaje vnyanya ɓa ɓwa da nlonu nu.

32 Ɓa lo abaho ai yi nge Gesemani, Yeisu wa gna əwo amwutuyi ge, "Fye kwu sase zhi n ya, ma zhnignyi mii zhniaduwa." 33 Wa kwu Byitusu, Jemyis n Yohanai n kwnusnu n woi, wa ya bwugbawnu n mwa ɓədo n azhnìgyei 34 Wa gna ɓa, "Əmi wyewyeyi n nunui lo n bwugbawnui kwoi to n əfyii, fye kwu zhi n ya fya gwu."

35 Wa cetala lo n abye ɓwai fyewyi, wa ya shi n əknyi wa zhniaduwa; ngye kwo ɓa yezhni əsa ye kwaa du wo ya. 36 Wa gna, "Abba, Dada, aɓo vnyanya yezhni n hoi. La bwoɓyi ye pmyi mi ya. Dudulonu, toge əɓo n mi ye m, ama əɓo n ho ye."

37 Nlonu wa jezeɓe da əwo amwutuyi wa gye ɓa zhi ɓai wnagye. Wa daɓo n Byitusui, "Sima, fye kwu wnagye nu? Fye to myi fya kwu zhigwu n kwnusnu ń mii snukna gbmanyi m? 38 Fye kwu zhigwu jesnu fya zhniaduwa, nabai n fye taa kaya fyi n mwumwu m. Zafnu ncei ye lo, ama nayi n gbakalá gbàgbài lo."

39 Njesnu wa je laka lo wa zhniaduwa woi daɓo gbmanyigbmanyi. 40 She wo ɓə jezeɓe, wa je ɓa gye n zhi ɓai wnagye, ntuge awye ɓə kwu ɓa woshna. To ɓa kpe əɓo ye n ɓa ɓá gna wo m.

41 Wa jezeɓe əɓwa taayi, wa gna ɓa, "Fye ye zhi lo fyei wnagye nu jesnu fyei snu? Kwo la kwnu lonu! Əsa n la si. Fye shiawye, a la Əza Nugwnu taya dna n aleifyizhniyi akwnu. 42 Fye kwukala! Yii lo! Əmi ɓwuyi nu ɓə nu!"

43 Woi ɓwagnyi woi ye daɓo, Yahuda, zaknayi n Awoceaba, wa kpeya ɓe. Deeji kwa vyi wo n ɓahnii yeyei n abeyaakwoi n abwusii, ń apirisiti atukwodai, owa anyawuyii, ń abyedai ɓə tnu n ɓai nyi.

44 Nsayii əzaɓwuyi ɓəə la əznù wu ɓa: "Əza n fya gye ma shewna wo, əwo nu; fye wna wo, fye ɓə la wo lo ncei dna ń abagwuyi atasni." 45 Yahuda wa lo da Yeisu n əsagbmanyii wa gna, "Rabyi!" jesnu wa shewna wo. 46 Aza ɓa taɓwashi Yeisu, ɓa wna wo. 47 Nlonu zaknayi n aza yi n ɓa ɓə zhi vyivyiwyi nyi, wà wa əwo əbeyaakwo wa znu pirisiti dnagbmai fyenu, kwaa əwo tnubwa kaya.

48 Yeisu wa gna, "Mi zhni kalákpei tukwoda nu, n fye gnyi fyei ɓe da mi n abeyaakwoi n abwusii fya wna mi i? 49 Nyipyei dəhodəhoi mi ɓə kwnusnu n fyei, mii wunya dna n Dagayipwuwa ashilagyí, ama to fya wna mi m. Ama ɓəshishinu Shekwoyi anyakagyigyiyi kwa nu." 50 Nlonu əwo amwutuyi vnyanya ɓa fa wo ɓa bwusi.

51 Əɓyikasa n wo to ɓə n əje yaakwoi kpe m, akpəge jekpe luweluwei, wo ɓə ɓe woi vyi Yeisu. Shi ɓa ɓə wna wo, 52 wa bwusi n ɓwotoloyii, wa kwu əwo əje luweluwei ya n avnu.

53 Ɓa la Yeisu lo ncei n pirisiti dnagbmai aba, n apirisiti atukwodai vnyanya, abyeda n owa anyawuyii ɓa gwnudo zhi n aba gbmanyi. 54 Byitusu wa lo woi vyi wo ń tagnyi, n kpaai, waa si pirisiti dnagbmai bwokwnu ashilagyí. N abaayi waa kwnu sase shi n abagwuyii woi wyena.

55 Apirisiti tukwoda n Sahindiri abwokwnudai vnyanya ɓai zna ɓəgyi katá znashni tu ń Yeisu nabai ɓa wu wo, ama to ɓa ɓwa dəho m. 56 Bəgyé ɓa ɓe ɓa kwnu aɓo akatá nya tu n əwo tukwo, ama əɓa ɓəda to kwa lodo m.

57 Nlonu azaho ɓa kwukazhi ɓa gbmi əɓo katá nya ye tu n əwo tukwo: 58 "Yi ɓə kwu wo woi gna, ‘Mi ɓə la Dagayipwuwa zanyikwoci nya ye laya jesnu dna n anyipyei ngwnu-ata mi ɓə mi ədo, ń a to mi kwo n aɓwai nu m.’ " 59 Dudulonu kwo əɓa ɓəgbmi to ɓə lodo m.

60 Nlonu pirisiti dnagbmai wa laka gnyi n əɓa awye wa nya Yeisu əɓo, "Ho taa dnaɓəgbe m? Knyi ɓəgbmi nu nyi n aza ye gbmi ń tu əho tukwo nyi a?" 61 Ama Yeisu wa gnyi pyi to wa dnaɓəgbe m.

Jesnu pirisiti dnagbmai wa nya wo əɓo, "Əho nu zhni Kirisiti, Anabəlikada Nugwnu?"

62 Yeisu wa gna, "Əmi nu, fye ɓə gye Əza Nugwnu ń sasetu ń Dagayi ikwo Duduyi ɓwaizhe jesnu woi ɓe n tu ń ənyì əshebmana nya."

63 Pirisiti dnagbmai wa sa əwo əje ya, wa nyaɓo, "Yi ye zhi yii zna aɓəkwnuyi aje aknyidei nu shni a? 64 Fye kwu wo woi da atukwopmi ɓəda. Fye zhninubwo nge nanu a?"

Əɓa vnyanya ɓa znu wo əknyi nge wo kwnuce lo n əfyii. 65 Nlonu azaho ɓa ya ɓai knyiaknyi kpe wo; ɓa kwu aje wna wo n əwo awyeba, ɓa fyi wo akwnu, ɓa gna, "Da sheɓəgwogna, nyika nu lu ho a?" Jesnu azagwuyi ɓa la wo ɓa lu wo.

66 Shi Byitusu ɓə dna n ashilagyí snuta, zaknayi n pirisiti dnagbmai aɓyinyikwoi atnutnuzhniyi wa ɓaya ɓe. 67 Shi wo ɓə gye Byitusu woi wyena, wa shi wo awye byiwuu.

Wa gna, "Əho ce ho ɓə kwnusnu ń Yeisu Nazeretiyi yii."

68 Ama waa kwo aɓo na. Wa gna, "Mi ta kpe əɓo ye lo n ho da, kwo nge ma ɓwa əkwo awyega m," wa gbmiya lo aduba. Əsa fyewyi pisenugba kwa chekwu.

69 She ɓyinyikwoyi tnutnuyi ɓə gye wo gnyi n ɓo, wa je aza yi gna n ɓa ɓə gnyagnyi zhi n ɓo nyi, "Əza ye dnalo n ɓa." 70 Jesnu wa na kwo aɓo.

Əsa fyewyi, aza n ɓa ɓə gnyiagnyi zhi vyivyiwyi n ɓo nyi, ɓa gna Byitusu, "Ɓəhnihni ho zhni gbmanyi dna n əɓa nu, ntuge ho zhni Gəliliyi nu."

71 Wa ya aknyi kpe, woi si nyasi ga ɓa, "Mi ta kpe əza ye əye lo m n fye zhi fyei da əwo əɓo nyi m."

72 N əsayisayii pisenugba kwa cekwu əɓwa baayi. Nsayi Byitusu wa pa ɓəda n Yeisu ɓə kwu da wo nyi: "Pisenugba ɓə snu n kwo cekwu aɓwa aba, hoi la əmi yekpé aɓo na aɓwa ngwnu-ata." Bwugba kwa pmyi wo, wa ya ɓwuci.