1 Afarisiyi n owa anyawuyi hoi, n ɓa ɓəə kwnuɓe n Urishelima nyi, ɓa yezhi n shegwnu Yeisu 2 ɓa gye əwo amwutuyi ho ɓai gyi nyagyi n aɓwa cegyeii, n əkwo nu ge, ɓa to ɓə n aɓwai nanayi m. 3 (Afarisiyi ɓədo n Ayahudiyi vnyanya ɓa ta gyi nyagyi m, akpəge ɓa la aɓwana əɓa kwnunu nya, n azakwoi kwnunui shiɓwa wyiwuú. 4 Əsa n ɓa zhi n adubayaakwo, ɓa ta gyi nyagyi m akpəge ɓa la əɓa nayi zhnaya. Njesnu ɓai shi akwnunu aje bəgyé əɓwa, ngye abwoɓyiyi zhnaya, ashnapa ɓyiyi ɓədo n awyewnubwei.)

5 Ntulonu Afarisiyi n owa anyawuyii ɓa nya Yeisu, "Knyiyi nu zhni əho amwutuyi to ɓai gyianyì n vyi abyeda kwnunui ma, ama n əkwoɓwi ɓai gyi nyagyi n aɓwa acegyeii a?"

6 Wa dnaɓəgbe, "Ishaya ɓə dna n gaiciya əsa ń wo ɓə da sheɓəgwogna tu ń əfye ɓo akwocednayi; ngye shi kwo kafyilo:

" ‘Aza ye ga mi mwamwa n əɓa agbei nu ɓwasnu,

ama əɓa adu mwakpa lo n mii.

7 Ɓa ga mi mwamwa gbəloi nu;

əɓa nyawu ɓwa azanyikwoci aɓəgbekpe nu zhni.’

8 Fye kwu Shekwoyi aɓəgbetu ya, ama fye zhi n azanyikwoci akwnunui nu shiɓwa wyiwuú."

9 Nlonu wa gwodu, "Fye n əgbái lo ń fye pmyi Shekwoyi ɓəgbetu shi n gnagna nabai fya kwu əfyehni akwnunu shiɓwa! 10 Ntuge Mwusa ɓə kwu gna, ‘Ga əho dada mwamwa ɓədo n əho əyai,’ jesnu, ‘Zahozahoyi n wa knyi əwo dada akpmi kwo əwo əya, ɓəshishinu a ɓa wu wo.’ 11 Ama fye gna lo nge n əza wa gna nge, ənya n əza ɓə ɓa zhni apma wa bma əwo dada zhni ncei kwo əwo əya kwo zhni Kwoban nu (əkwo nu nge, a la kwo ga dna n Shekwoyi akwnu), 12 nlonu to fya shna ye nge wo zhni ɓəhoɓəhoi ga əwo dada kwo əwo əya m. 13 N zokwo ye nu n fye la Shekwoyi ɓəda zè gbəloi n əfye akwnunui n fye kwu wu aɓyi nyi. Jesnu fyei zhni aɓo aje n mwa bəgyé nlonu."

14 Njesnu Yeisu wa yì deeji ga əwohni jesnu wa gna, "Zahozahoyi n fye, wo kna mi tnubwa, jesnu fye ɓwa ɓəye awyega. 15 Nyaho to lo n əbmyi n kwaa lodna n əza əmi n kwo ɓa tu wo cegye m. N kwo əɓwi, ənya nu n kwo gbmiɓe n əza əmi n kwo tu əza cegye. [16 Ndəi əza n wo atnubwai lo, akpəge wo wo."]

17 She wo ɓə la laka n deeji aba wa lodna n apyimi, əwo amwutuyi ɓa nya wo əɓo ntu ɓəsisi ye ɓo. 18 Wa nya ɓa əɓo, "Fye ye fyilo ntna gənyikpe nu? Fye ta gyewye lo nge nyaho to lo n kwo gbmi n əbmyi kwa lodna n əza əmi n kwo ɓa tu əza cegye m? 19 Ntuge kwo ta lodna n əwo ədu nu m, ama n əwo nubwo nu, nlonu kwa gbmiya n nayi." (N ɓəda yei, Yeisu ɓə gna nu nge, anyagyi vnyanya n gyigyii lo.)

20 Wa gwodu: "Ənya n kwo gbmiɓe n əza əmi nyi, əkwo nu tu əza cegye. 21 Ntuge fyi n əmi nù, dna n zanyikwoci ədu, n aɓonubwozhni anukwoi kwnuɓe: asisiɓozhni, əvyì, əzawu, 22 anagbái, əwye, ɓəshinmì, kwocedna, aɓənyashna, shewo, əyewnuya, tukwognanakwo ɓədo n amamaɓəzhni. 23 Aɓənukwoi ye vnyanya ɓa kwnuɓe n əmì nu, əɓa nu tu əza cegye."

24 Yeisu wa fa abaayi wa lo aba n wo vyivyiwyi n Tayai. Wa lodna n pwuwa ama wo to ɓə ncei pma a kpe ce ye m; dudulonu wo to ɓə ye myi wa so əwohni n bəgyé aba m. 25 Ɓəhnihni, nyikwoza ho n əwo nyigwnu nawyii ɓəə shi n zafnu ajegbmiyii dna nyi, shi wo ɓə wo əwo əɓo, wa ɓe, wa she əwohni ya shi n əwo apita aba. 26 Nyikwoza yi ɓə zhni Girikiyi nu, n a ɓə ma wo n Fonishiya Siriya nya. Wa ɓà Yeisu nge wo gbmi əse ya n əwo nyigwnu.

27 Wa gna wo, "Kpmisnuyi, fa aɓyi ɓa kwu nyagyi gyi shi ɓa ncei pma, ntuge kwo to bmyalo a la aɓyi biledi a sheyashi amwi m."

28 Nyikwoza yi wa dnaɓəgbe, "Dagayi, kwo amwi n ɓa zhi n tebwul snuta nyi, ɓa gyi aɓyi nyagyi awyiwoi."

29 Nlonu wa gna nyikwoza yi, "Ntu ɓəgbedna ye pya ɓo, ho ɓa myi ha lo, əse kwo la gbmiya n əho nyigwnu."

30 Nyikwoza yi wa lo əwo pwuwa wa gye əwo əɓyi n yatu n gədo, əse kwoi la gbmi n wo.

31 Nlonu Yeisu wa fa Taya əknyi wa duya n Sidon, woi shnilo Gəlili shikwo jesnu wa lodna n Dekapolis əknyi. 32 N abaayi azaho ɓa ɓe wo n əzai n wo ɓə zhni tnubwagwunayi jesnu ɓəda dai dna wo əɓo, ɓa ɓà Yeisu nge wo tu əza yi əwo əɓwa.

33 Shi wo ɓə la wo pmyiyagnyi n gnagna, n taya gnyi n deejii, Yeisu wa fyi əwo aɓwanyi n əza yi atnubwa. Nlonu wa knyiaknyi jesnu wa to əza yi nyitala əɓwa ncei. 34 Wa kpewyewu lo əshemi wa ya əsnu n mwa, wa gna wo, "Effata!" (N əkwo nu nge, "La gwuya!") 35 N dəyei əza yi atnubwa ɓa gwuya, əwo nyitala kwaa loya jesnu wa ya ɓəda da ai wo kwo n kwnukwnuiya.

36 Yeisu wa ga ɓa ɓəgbetu nge ɓa to gna zahozahoyi m. Ama shi wo yi əwohni woi da lonu, aza ɓa gna əɓahni yiyi nu ɓai daɓo tu n kwo tukwo. 37 Aza ɓaa əgbe làya zhi vnyanya n ɓəwowoi. Ɓa gna, "Wo kwu ɓəhoɓəhoi zhni n bmya, woi zhni tnubwagwunayi woi wo ɓəda jesnu takpeɓəda woi daɓo."