1 Nlonu wa gna ɓa, "Ɓəhnihni əmi nu gna fye, azaho gnyiagnyi zhilo ń ya n ɓa taa to əfyi wo m akpəge ɓa kwu gye Shekwoyi əbemi kwoi kashi ɓe dna n əkwo kalá."

2 N anyipyei tnanyi avnu, Yeisu wa kwu Byitusu ɓədo n Jemyis n Yohanai n kwnusnu n woi, wa gwnukpe lo n ɓai ń əpe asnada ɓahniɓahni. Tu n abaayi waa znubma dna ń zafnu n əɓa awyeba. 3 Əwo aje ɓa kwu zè n fnai palilii, n du nyahonyahoi ń fnafna ń a ɓa shni kwo zhnazhna dna n anyì. 4 Njesnu Iliya n Mwusai ɓa kpmiyazhi n əɓa awyeba, ɓai daɓo n Yeisui.

5 Byitusu wa gna Yeisu, "Rabyi, kwo bmyalo she yi kpəzhilo ń ya. Fa ya kpe alubwi ngwnu-ata; gbmanyi əho nya, gbmanyi Mwusa nya jesnu gbmanyi Iliya nya." 6 (Wo to ɓə kpe əɓo əye n wo ɓa da m ntuge ɓa ɓə fyi zhi n ədna yaakwo nu).

7 Nlonu ənyì kwa gbmitu kwa kwu pwu ɓa, jesnu ɓa wo bəgye kwoi daɓo n ənyì, "Əmi Nugwnu nu nyi, əwo nu n mi ye. Fye kna wo tnubwa!"

8 N əsagbmanyii, she ɓa ɓə shiawye laɓa, to ɓa shna zahozahoyi wyegye n kwnugnyi n ɓai m, akpəge Yeisu.

9 Shi ɓa ɓə ɓe ɓai kazhi shnizhi ń əpe, Yeisu wa ga ɓa ɓəgbetu nge ɓa to gna zahozahoyi əɓo n ɓa kwu gyewye nyi m, sai əsa n a ɓə la Əza Nugwnu laka ń əfyi. 10 Ɓa kwu aɓo ye shi fyi əɓahni, ɓai nya aje əɓo n Yeisu da, "ɓə laka n əfyi."

11 Nlonu ɓa nya wo əɓo, "Knyiyi nu zhni owa anyawuyi ɓai gna nge ɓəshishinu Iliya wa ɓe kpmisnu a?"

12 Yeisu wa dnaɓəgbe, "Ɓəhnihnii, Iliya ɓə la ɓe n kpmisnu, waa aɓo zhnizhi vnyanya. Knyiyi nu zhni kwo ncei kafyilo nge ɓəshishinu Əza Nugwnu woi gyeazhnì n mwa jesnu ai la əwo aɓo na a? 13 Ama əmi nu gna fye, Iliya ɓə la ɓe, jesnu ɓa kwu ɓəhoɓəhoi zhni kpe wo n ɓa ɓə ncei pma, n ɓwasnu shi kwo kafyilo ntu əwo ɓo."

14 She ɓa ɓə ɓe da amwutuyi aje, ɓa gye deeji yaakwo n zhi n shegwnu ɓa, jesnu owa anyawuyii zhi ɓai naɓo kpeaje n ɓai. 15 She aza vnyanya ɓə ze n Yeisu əwyegyegyei, ɓa kwu nu zhi n ɓəwowoi jesnu ɓa bwusi lo ɓai ɓyi wo əgna.

16 Wa nya ɓa əɓo, "Fye naɓo kpeaje n ɓai ntu knyiɓei nu a?"

17 Əza ɓə dna n deeji wa gna, "Nyawuyi, ma ɓe ho n əmi nugwnui nu ń wo n zafnu nukwoi dna kwoi kpma wo ɓəda. 18 Əsahosahoi n kwa la wo kala ncei, kwa shewoya shi n əknyi. Wa pwuafugya n əgbe, wa gyi əwo anyikna jesnu waa wo gagaga. Ma gna əho amwutuyi nge ɓa gbmi zafnui ya, ama to ɓa nyi myi m."

19 Yeisu wa dnaɓəgbe, "Əfye cala tnagaiciyagai nya, mi ɓa kwnusnu n fyei əsa ngwnu aknyiyi nu a? Mi ɓa ɓwa bwugba n fyei əsa ngwnu aknyiyi nu a? Ɓe mi n əɓyinugbai yii."

20 Ntulonu ɓa ɓe wo n woi, she zafnu nukwoi ɓə gye Yeisu əwye, n əsagbmanyii, kwa la əɓyinugbai kpəkpə nyasna kala. Wa myiya shi n əknyi wa pmyiya laɓa woi pwuafugya n əgbe.

21 Yeisu wa nya əɓyinugbai dada əɓo, "Ɓəye ɓə ya wo zhni n knyisai nu a?"

Wa dnaɓəgbe, "Woi ye zhni əɓyi nawyii. 22 Kwo zhni kwoi shewoya dna n əná kwo nuwna ciici nabai kwa wu wo. Ama ngye ho ɓa myi ha zhni ɓəho, gye yi snusnu jesnu ha bma yi zhni."

23 Yeisu wa gna, " ‘Ngye ho ɓa myi nu u’? Ɓəhoɓəhoi yezhni n əza aba n wo ga gaiciya."

24 N əsagbmanyii əɓyinugbai yi dada wa gna, "Mi la gaiciyaga; bma mi zhni ma myi n əmi tnagaiciyaga əɓo!"

25 She Yeisu ɓə gye deeji kwoi bwusi ɓe abaayi, wa gnaknyi ase yi. Wa gna, "Əho ase tnubwagwuyi n takpeɓəda nyai, mi tu ho ɓəgbe, gbmiya n wo jesnu to ha je lodna n wo m, kpeekpe."

26 Ase yi kwa fyiakwu, kwa la wo kpəkpə yaakwo kala jesnu kwa gbmiya. Əɓyinugbai yi ɓə shi ngye zafyi nu, aza bəgyé ɓa gna, "Wo la fyí." 27 Ama Yeisu wa shi wo n əɓwa wa la wo kala gnyiagnyi, jesnu waa gnyiagnyi.

28 Əsa ń Yeisu ɓə la lodna n nyakwnumi, əwo amwutuyi ɓa nya wo əɓo fyaa, "Knyiyi nu naa zhni to ya myi n kwo gbmiya ma a?"

29 Wa dnaɓəgbe, "Dəye pya ɓa ɓwa gbmiya n aduwazhnii nu."

30 Ɓa kwuka n abaayi jesnu ɓa duya n Gəlili. Yeisu to ɓə ncei pma zahozahoyi wa kpe aba əye n ɓa ɓə zhi m, 31 ntuge wo ɓə gnyi woi wu əwo amwutuyi ənya nu. Wa gna ɓa, "A ɓə la Əza Nugwnu ai la ga dna n aza akwnu. Ɓa ɓə la wo wu, jesnu n anyipyei ngwnu-ata avnu, wo ɓə laka." 32 Ama to ɓa ɓwa awyega əɓo nya n wo ɓə zhninubwo ncei m, jesnu ədna kwoi wo ɓa n ɓa ɓá nya wo əɓo ntuce nyi.

33 Ɓa ɓe Kapanam. She wo ɓə loɓe pwuwa ncei, wa nya ɓa əɓo, "Fye ɓəə ɓe fyei naɓokpeaje n zokwo ntu knyiɓei nu a?" 34 Ama ɓa kwu cepyi ntuge ɓa ɓə ɓe n zokwo ɓai naɓokpeaje ntu əza ɓo n wo nu zhni duduyi.

35 She wo ɓə sasetu, wa yì Awoceaba zhi wa gna, "Əza n wo ncei pmalo waa zhni kpmisnui, ɓəshishinu əwo nu ɓaa zhni kpmaknai jesnu tnutnuzhniyi aza vnyanya nya."

36 Wa la əɓyi nawyi wa wo dna n əɓa atasni. She wo ɓə la wo láshi, wa gna ɓa, 37 "Əzadəhodəhoyi n wa gwo əɓyi gbmanyi n aɓyi anawyii ye dna n əmi əye, wo la mi gwo; jesnu əzadəhodəhoyi n wa gwo əmi, wo to ɓwa əmi nu gwo m, ama wo la əmi Dada gwo n wo ɓə tnu n mii nyi!"

38 Yohana wa gna, "Nyawuyi, yi ɓə kwu gye əzaho woi kwnu ase ya dna n əho əye, jesnu ya gna wo nge wo la fa ntuge wo to dnalo n əyi okwu m."

39 Yeisu wa gna, "Fye to kpma wo m. Ntuge zahozahoyi to lo n wo zhni ɓəwowoi dna n əmi əye, n wo ɓa pmyiavnu əsa fyewyi wa da ɓənukwoi tu n əmi tukwo m, 40 ntuge zahozahoyi n wo ta gnyiapaapa lo n əyii m, wo zhni əyi nya nu. 41 Ɓəhnihni əmi nu gna fye, zahozahoyi n wo ga fye nuwna dna n əmi əye ntuge fye zhni Kirisiti anya nu, to n kpmakpmai m, wo to ɓə ɓwu əwo gyiba nuwna m.

42 "Ndei zahozahoyi wa zhni zaknayi ń aɓyi anawyi ye n ɓa n gaiciyai ga n mi nyi, wa cebwonyi, kwo ɓəi ɓa wo du aa wyigwokwuta dnagbmai gyidna wo ń bəgye jesnu aa wo sheya dna n shikwo. 43 Ngye əho əɓwa ɓa zhni ho ha cebwonyi, la kwo znuya. Kwo n hoi dulo hoi lodna ń wyewyeyi n əɓwai gbmanyi, a fa ədo n ho ɓə lodna ń anápyi n aɓwai ngwnu-aba nyi, aba n əná ta wnu m. [44 ‘Aba ń əɓa vnyinukwnu ta fyí m, jesnu əná ta wnu m.’] 45 Jesnu ngye əho pita ɓa zhni ho ha cebwonyi, la kwo znuya. Kwo n hoi dulo hoi lodna ń wyewyeyi n pitai gbmanyi, a fa ədo n a ɓə she ho ya dna ń anápyi n apitai ngwnu-aba. [46 ‘Aba ń əɓa vnyinukwnu ta fyi m, jesnu əná ta wnu m.’] 47 Jesnu ngye əho əwyekwnunu ɓa zhni ho ha cebwonyi, la kwo gbmiya. Kwo n hoi dulo hoi lodna ń Shekwoyi əbemi n əwyei gbmanyi, a fa ədo ń a ɓə she ho ya dna ń anápyi n awyekwnunui fyi ngwnu-aba nyi, 48 ‘Aba ń əɓa avnyinukwnu ta fyi m, jesnu əná ta wnu m.’

49 A ɓə mwu zahozahoyi n ənái nu.

50 "Snakpegye n bmya, ama ń əkwo apmanya nla kwnuya, a ɓa zhni kwo n wunanu kwa je əkwo apmanya ɓwa a? Fye kwu snakpegye ɓwa fyi n əfyehni jesnu fya kwu zhi n bwugbafui n ajei."