1 Fyi n anyipyei yi, deeji yaakwo ədo kwaa yezhi. Shikwonyi ɓa to ɓəə n nyagyii shi n ɓa ɓá gyi m, Yeisu wa yì əwo amwutuyi zhi wa gna ɓa, 2 "Aza ye snusnu wna mi lo; ɓa kwu kwnusnu n mii anyipyei ngwnu-ata, ntna nyagyi. 3 N ma gna ɓa ami lo apyi n myikwnui, ɓa ɓá lo ɓai myiya lo ń zokwoi ntuge azaho ɓə kwnu n aba n kpaai nu."

4 Əwo amwutuyi ɓa dnaɓəgbe, "Ama knyi abai nu lo n zhabwi ye n əzaho ɓa ɓwa biledi kwa kwnu ɓa gyi a?"

5 Yeisu wa nyaɓo, "Fye n biledi aknanai shilo ngwnu aknyiyi nu a?"

Ɓa dnaɓəgbe, "Ngwnu-tnaaba."

6 Wa gna deeji nge ɓa kwu sase zhi n əknyi. She wo ɓəə la aknana ngwnu-tnaaba yi gwo, jesnu woi kwu Shekwoyi saami, wa sa kwo ya, wa ga əwo amwutuyi nge ɓa gnaya ga aza; jesnu ɓa kwo gnaya ga ɓa. 7 Ɓa ɓə n abmya aɓyii shi fyewyi ɓədo; wa kwu Shekwoyi saami ntu abmya ɓo ce, jesnu wa ga əwo amwutuyi ɓa gnaya ga aza. 8 Aza ɓa gyi jesnu nubwo kwa kwu ɓa fwu. N dəye avnu amwutuyi ɓa kwu awyiwoi n ɓa ɓə ce nyi, acekwnu n nunui, ngwnu-tnaaba. 9 Aza ɓə nyi ngye adugwu-anyi nu n ɓa ɓə zhi ń ɓo. Shi wo ɓə kwu ɓa gnami, 10 wa lodna ń əya nuwnanya n əwo amwutuyii ɓa lo Dalmanuta əknyi.

11 Afarisiyi ɓa ɓe, ɓa ya ɓai nya Yeisu aɓo. Ntuge ɓa tu wo mwi, ɓa nya wo əznù ɓo n kwo gbmi n əshemi. 12 Wa ya əsnu fnaa wa gna, "Knyiyi nu zhni cala ye kwoi nya əznù ɓo a? Ɓəhnihni əmi nu gna fye, a taa ga kwo əznù dəhodəhoi m." 13 Nlonu wa fa ɓa, wa jezelo wa lodna n əya nuwnanya wa piyatu n əkpma dəyi.

14 Amwutuyi ɓəə kwu zamwi to ɓa ɓe n biledii shi m, akpəge knana gbmanyi n ɓa ɓə ncei shi dna n əya nuwnanya. 15 Yeisu wa kwnù ɓa, "Fye zhni pəceye, fye la əwye ka n Afarisiyi yisti n Hiridusu nyai."

16 Ɓa da ɓəda n ajei əɓahniɓahni ɓa gna, "Ntuge yi to n biledii shi lo nu m."

17 Woi kpe əɓo ye n ɓa da, wa nya ɓa əɓo, "Knyiyi nu zhni fyei daɓo nge fye to biledii shilo nu ma a? Fye too du fye gye əɓo əwye kwo fya ɓwa awyega m? Əfye abwugba n kwu kpakalá nu u? 18 Fye n awyei fyilo ama to fyei gyewyeba m, jesnu n atnubwai gyi ama to fyei wo ɓəda m? Fye ta pa lo m? 19 She mi ɓə sa aknana ngwnu-atnu ya ga aza adugwu-atnu, fye ɓə kwu awyiwoi acekwnu anunui ngwnu aknyiyi nu a?"

Ɓa dnaɓəgbe, "Ngwnu-awoceaba."

20 "Jesnu she mi ɓə sa aknana ngwnu-tnaaba ya ga aza adugwu-anyi, fye ɓə kwu awyiwoi acekwnu anunui ngwnu aknyiyi nu a?"

Ɓa dnaɓəgbe, "Ngwnu-tnaaba."

21 Wa gna ɓa, "Fye too du fye ɓwa awyega m?"

22 Ɓa ɓe Betsaida, jesnu azaho ɓa ɓe Yeisu n wyebwayii ɓa ɓà wo nge wo to wo əɓwa. 23 Wa shi wyebwayi n əɓwa wa gbmiya gnyi n woi n əzhi gnagna. She wo ɓəə la aknyi knyikpe n əza yi awye jesnu wa kwu əwo aɓwa kpe n wo, Yeisu wa nya wo əɓo, "Ho gye nyaho lo?"

24 Wa kpe əwye wu wa gna, "Mi gye aza əwye lo; ɓa wulo ngye ashnuwna nu ɓai znazna laɓa."

25 Njesnu Yeisu wa kpe əwo aɓwa n əza yi awye. Nsayi əwo awye ɓa kpeya, wa je wyebagye, wa gye nyahonyahoi n knaknaiya. 26 Yeisu wa tnu n woi n apyi, woi gna, "Kwo əzhi, to lo ho lodna m."

27 Yeisu n əwo amwutuyii ɓa lo azhi n ɓa shegwnu Kaisariya Fyilibyi. Ɓai lo n zokwo wa nya ɓa əɓo, "Aza gna nge mi zhni nyika nu a?"

28 Ɓa dnaɓəgbe, "Azaho gna Yohana Batizimazhniyi nu; azaje gna nge Iliya; dudulonu azaje nge, sheɓəgwognayi ho nu."

29 Wa nyaɓo, "Ama əfye ma a? Fye gna ge mi zhni nyika nu a?"

Byitusu wa dnaɓəgbe, "Əho nu zhni Kirisiti."

30 Yeisu wa kwnù ɓa nge ɓa to gna zahozahoyi ɓəye ntu əwo ɓo m.

31 Nlonu wa ya ɓa nyawu nge ɓəshishinu Əza Nugwnu wa gyeazhnì aɓo bəgyé nya, jesnu abyeda, apirisiti atukwoda ɓədo n owa anyawuyii, ɓa ɓə la əwo aɓo na, jesnu ɓəshishinu a ɓə la wo wu, ama n anyipyei ngwnu-ata avnu woi laka n əfyi. 32 Wo ɓə da ɓəye pəipəi nu, jesnu Byitusu wa pmyi wo gnyi n gnagna wa ya gnaknyi wo.

33 Ama she Yeisu ɓə pmyi wa shi əwo amwutuyi awye, wa gnaknyi Byitusu. Wa gna, "Pmyiyagnyi n əmi avnu Shetam! Ho to n ɓənubwozhni Shekwoyi nyai dnalo n bwugba m, ama zanyikwoci azanga nya nu n ɓwasnu."

34 Nlonu wa yì deeji zhi n abagbmanyi n kwnusnu n əwo amwutuyii wa gna: "Zahozahoyi ń wo ncei pmalo waa zhni əmi mwutuyi, ɓəshishinu waa əwohni aɓəna, wa la əwo znudu jesnu wa vyi mi. 35 Ntuge əza n wo ncei pmalo wa gnyi əwohni wyewyeyi, wo ɓə ɓwu kwo nuwna, ama əza n wa ɓwu əwo wyewyeyi nuwna ntu əmi ɓo ɓədo n nabagyi manayii, wo ɓə gnyi kwo. 36 Kwo n apmai lo n wunanu, n əza ɓa ɓwa anyì vnyanya ama waa ɓwu əwo wyewyeyi nuwna a? 37 Kwo knyiyi nu n əza ɓa ga dna n doshna ntu əwo wyewyeyi ɓo a? 38 Ngye əza lo n əmi vnyinkwo wo wo lo, ɓədo n əmi aɓədagbmai dna n cala anagbáizhni nya ye n aleifyizhniyi, Əza Nugwnu ɓə wo wo vnyinkwo ce, shi wo ɓə ɓe dna n əwo Dada latu n kwnusnu n amaləka agyigyiyii."