1 Nlonu Yeisu wa fa abaayi wa lo Yahudiya əknyi n Urudu əkpma dəyi. Njesnu deeji ɓa ɓe da wo, jesnu shi əwo kwnunu ɓə nyi, wa wu ɓa ənya.

2 Afarisiyi ho ɓa ɓe, ɓa mwu wo, ɓa nya wo əɓo, "Owa ncei ye lo nge əza wo wu mwula n əwo nyikwoi?"

3 Wa dnaɓəgbe, "Mwusa ɓə tu fye əgbe nge nanu a?"

4 Ɓa gna, "Mwusa ɓə la ye nge zanugbayi wo ka nyakaɓəgbmi mwulawu nya ga əwo nyikwo jesnu wa wo nya ya."

5 Yeisu wa dnaɓəgbe, "Ntu əfye adu akalákpe ɓo nu, cenu ɓə zhni Mwusa wa ka owa ye ga fye. 6 Ama n aɓoyayaba, Shekwoyi, ‘ɓə zhni ɓa zanugbai n nyikwozai nu.’ 7 Ntu dəye ɓo, zanugbayi ɓa fa əwo dada n əwo əyai jesnu wa nyima əwo nyikwo, 8 jesnu əɓa ngwnu-aba ɓa ɓə kwu zè nayi gbmanyi, ntulonu ɓa to ye zhni ngwnu-aba nu m, ama nayi gbmanyi. 9 Ntucenu ənya ń Shekwoyi n la cigyido, zahozahoyi to gna kwo ajeya m."

10 She ɓa ɓə kwu lofyi n apyi njesnu, amwutuyi ɓa nya Yeisu əɓo ntu ɓəye ɓo. 11 Wa dnaɓəgbe, "Zahozahoyi ń wa kwu mwulawu n əwo nyikwoi waa la nyikwo ədo, wo zhni anagbái nu n woi. 12 Njesnu nyikwoza n wa kwu mwulawu n əwo əɓai waa so ənu ədo, wo zhni anagbái nu n woi."

13 Aza ɓə zhi ɓai ɓe Yeisu n aɓyii nabai wa kpe ɓa əwo aɓwa, ama amwutuyi ɓa gnaknyi ɓa. 14 She Yeisu ɓə gye dəye, to ca da wo m. Wa gna ɓa, "Fye fa aɓyi anawyi ɓa ɓe da mi, fye to nya ɓa ya m, ntuge Shekwoyi əbemi zhni əɓa pya nya nu. 15 Ɓəhnihni mi nu gna fye, zahozahoyi n wo taa gwo Shekwoyi əbemi ngye əɓyi nawyii m, wo to ɓə lodna ń kwo m, nanyinanyi." 16 Nlonu waa aɓyi anawyii kwu shi, wa kpe ɓa əwo aɓwa jesnu wa tu ɓa anabəlika.

17 Shi Yeisu ɓə laka lo n əznai, əzaho wa bwusi lo da wo jesnu wa ceakwokwo shi n əwo abye. Wa nyaɓo, "Nyawuyi manai, knyi ɓəshishii nu n mi ɓa zhni nabai mii ɓwa wyewyeyi nyalonyalo nya a?"

18 Yeisu wa dnaɓəgbe, "Knyiyi nu zhni hoi yi mi nge əza manai a? Əza manai to lo m; akpəge Shekwoyi gbmanyi. 19 Ho kpe aɓəgbetu əye lo: ‘Ho taa wu əza m, ho taa zhni anagbái m, ho taa wyivyi m, ho taa gbmi əɓo katá nya m, ho taa gyi əza fyi m, ga əho dada mwamwa n əho əyai.’ "

20 Wa gna, "Nyawuyi, əɓa vnyanya mi ɓə ya ɓa ɓwashi mii ye zhni əɓyi nawyii nu."

21 Yeisu wa shi wo awye jesnu wa wu wo yeye. Wa gna wo, "Ənya gbmanyi n kwo n hoi ce, lo ho kwnu nyahonyahoi n ho ncei lo, jesnu ha kwu ga awyekwoyi, ho ɓə ɓwa nyaɓwayezhi n əshemi. Nlonu, hoi ɓe ha vyi mi."

22 She nyaɓwayi ɓə wo dəye, əwo awyeba ɓaa wnudna. Wa laka lo n bwugbawnui, ntuge wo ɓəi n nyaɓwai n mwa kwokwo.

23 Yeisu wa shiawye ɓa n shegwnu, wa gna əwo amwutuyi, "Kwo dnaɓo lo gyiwyeda woi lodna n Shekwoyi əbemi!"

24 Əwo amwutuyi ɓa kwu zhi n ɓəwowoi ntu əwo aɓəda aɓo. Ama Yeisu wa je gna, "Aɓyi, gye kwo dnaɓo lo əza n wo ye gyiwye, woi lodna n Shekwoyi əbemi! 25 Kwo gna wo lo faafa lakwnumi kwa du n acibwa, a fa əza n wo n nyaɓwai lo woi lodna n Shekwoyi əbemi."

26 Ca gna amwutuyi wowo, jesnu ɓa gna aje, "To, nyika nu ɓə pwo a?"

27 Yeisu wa shi ɓa awye wa gna, "N zanyikwoci aba dəye taa yezhni m, ama toge n Shekwoyii m; ntuge aɓo vnyanya yezhni n Shekwoyii."

28 Nlonu Byitusu wa daɓo, "Yi kwu nyahonyahoi fa nabai ya vyi ho!"

29 Yeisu wa dnaɓəgbe, "Ɓəhnihni, əmi nu gna fye, əzaho to lo n wo la əwo pwuwa fa, kwo əwo azaje kwo amapwii, kwo əya, kwo əda kwo aɓyi kwo afwa ntu əmi ɓo n nabagyi manaii, 30 n wo to ɓə gwo gyiba aɓwa tagyi dna n anyì ye: (apwuwa, azaje, amapwii, àya, aɓyi ɓədo n afwai; jesnu n kwnusnu n wyenashei) dna n anyì dəyi n ɓa ɓə ɓe nyi, wyewyeyi nyalonyalo nya m. 31 Ama bəgyé n ɓa nu zhni akpmisnuyi ɓa ɓə kwu zè akpmaknayi, jesnu akpmaknayi ɓa ɓə kwu zè akpmisnuyi."

32 Ɓa ɓə zhi ɓai gwnulo Urishelima nu, Yeisu woi gyiabye lo n zokwo, jesnu ca wo əwo amwutuyi, ama aza yi n ɓa ɓə vyi wo nyi, ədna kwa wo ɓa. Njesnu wa pmyi Awoceaba zhi n gnagna, wa gna ɓa əɓo n kwo ɓə ɓwa wo. 33 Wa gna, "Yi gwnulo Urishelima nu, jesnu a ɓə la Əza Nugwnu taya ga apirisiti tukwoda n owa anyawuyii. Ɓa ɓə la əfyi owa znutu wo jesnu ɓai la wo taya dna n Abyedo akwnu, 34 aza n ɓa ɓə kpe wo agyè jesnu ɓai knyiaknyi kpe wo, ɓai la wo ɓyeya ń knalufnyii jesnu ɓai la wo wu. N anyipyei ata avnu, wo ɓə laka."

35 Nlonu Jemyis n Yohanai, Zebədi anugwnu, ɓa ɓe da wo, ɓa gna, "Nyawuyi, yi ncei pma ha zhni ɓəhoɓəhoi n ya nya ho."

36 Wa nyaɓo, "Fye ncei pma ma zhni knyiɓei nu ga fye a?"

37 Ɓa dnaɓəgbe, "Fa zaknayi n yi woi sasetu ntu ɓwaizhe jesnu əzabaayi n əho ɓwapmi dna n əho latu."

38 Yeisu wa gna, "Fye ta kpe ənya əye lo ń fye nya əkwo əɓo nyi m. Fye ɓa myi fya sni bwoɓyi ń mi ye ma sni nyi, kwo a zhni fye batizima n a kwu zhni mi nyi?"

39 Ɓa dnaɓəgbe, "Yi ɓa myi."

Yeisu wa gna ɓa, "Fye ɓa myi fya sni bwoɓyi n mi ye ma sni nyi jesnu a ɓa zhni fye batizima n batizimai n a gnyi ai zhni mi nyi, 40 ama fyei sase kpe ń əmi ɓwaizhe kwo ń əmi ɓwaipmi, əmi nya nu to ma ga fye m. Aba ye zhni aza yi nya nu ń a ɓə zhni ɓa ntu əɓa ɓo nu nyi."

41 She ngwnu-awo ɓə wo dəye, ɓa kwu gyi minagyi n Jemyis ɓədo n Yohanai. 42 Yeisu wa yì ɓa zhi n abagbmanyi wa gna, "Fye kpəlo nge aza yi n a yi ɓa nge abegyiyi Abyedo nya nyi, ɓa wna ɓa əsnu, jesnu əɓa atukwoda ayaakwo zhni ɓa wu ɓa ikwo. 43 Kwo taa zè nlonu n əfye aba m. N əkwo apita, əzahozahoyi n wo ye waa zè əza yaakwo n əfye atasni, ɓəshishi nu waa zè əfye tnutnuyi, 44 jesnu əza n wo ncei pmalo waa zè kpmisnuyi, ɓəshishi nu waa zè fyenu əfye vnyanya nya. 45 Ntuge kwo Əza Nugwnu to ɓə ɓe nabai a zhni wo tnutnu nu nyi m, ama wa zhni aza tnutnu, jesnu wa ga əwo wyewyeyi kwaa zè tagbanya ntu bəgyé ɓo."

46 Nlonu ɓa ɓe Jerikwo. Əsa n Yeisu n əwo amwutuyii, n kwnusnu n deeji yaakwoi, ɓəə zhi ɓai fá əzhiyaakwo, wyebwayi, Batimawus (n kwo nu gyi, "Timawus nugwnu nyi"), ɓə sasetu n zokwogbe woi ɓanya. 47 She wo ɓə wo nge Yeisu Nazeretiyi nu lo, wa ya wyiɓe, "Yeisu, Dawuda Nugwnu, gye mi snusnu!"

48 Bəgyé kwa gnaknyi wo jesnu ɓa gna wo nge wo la cepyi, ama wa gna əwyi ɓeɓe, "Dawuda Nugwnu, gye mi snusnu!"

49 Yeisu wa kpegnyi wa gna, "Fye yì wo ɓə ncei."

Ntulonu ɓa yi wyebwayi, "Nya agbmada! Laka gnyiagnyi! Wo yi ho lo." 50 Wa she əwo gbodo ya zhi n gnagna, wa laka gnyiagnyi n pyepyei, wa ɓe da Yeisu.

51 Yeisu wa nya wo, "Ho ye ma zhni knyiɓei nu ga ho a?"

Wyebwayi wa gna, "Nyawuyi, mi ye ma gyewyeba."

52 Yeisu wa gna, "Lo, əho gaiciyaganunui n la ho kágna." Nsayisayii wa gwo əwo wyebagye jesnu wa vyi Yeisu lo n zokwoi.