1 N anyipyei fyewyi avnu, Yeisu wa je lodna n Kapanam, aza ɓa kwu wo nge wo la zhi apyi. 2 Aza bəgyé kwokwo ɓa yezhi to ai ɓwa aba ń a ɓa zhi apita m, kwo zhi ń abwokwnumi akpemi m, jesnu wa zhni ɓa waazi. 3 Aza ngwnu-anyi ɓa ɓe wo n nayi-fyifyiyidai. 4 Shikwonyi ɓa to ɓə ɓwa zokwo ń ɓa ɓá si n woi ń Yeisu aba m, ntu deeji ɓo, ɓa bma nyakwnusni tukwo, aba n Yeisu ɓə gnyi nyi, ɓa bma kwo əɓwo shni ncei jesnu ɓa shni n pəcei ń nyasnai ɓə tu nyi. 5 She Yeisu ɓə gye əɓa gaiciyaganunui, wa gna nayi-fyifyiyida yi, "Nugwnu, a kwu əho aleifyi zo ho."

6 Nsayi owa anyawuyi ho ɓə sase kpe n abaayi, ɓa zhni ɓənubwo fyi n əɓa mi, 7 "Knyiyi nu zhni əza ye woi daɓo nlai a? Wo gnyi woi da atukwopmi əɓo nu! Nyika nu ɓa myi wa zo aleifyi ń Shekwoyi nu to ɓwasnu ma a?"

8 Nsayisayii, Yeisu wa kwu kpe dna n əwo zafnu nge əɓo nu nyi n ɓa zhi ɓai zhni kwo nubwo fyi ń əɓa adu, jesnu wa gna ɓa, "Knyiyi nu zhni fyei zhni aɓo ye pya nubwo a? 9 Knyidei nu gna wo lo faafa: a gna nayi-fyifyiyida ye, ‘A kwu əho aleifyi zo ho,’ kwo a gna, ‘Laka, kwu əho pəce ha znazna a’? 10 Ama mi ncei pmalo fya kwu kpe nge Əza Nugwnu n ikwoi lo dna ń anyì wa zo aleifyi." Ntulonu wa gna əza ń nayi ɓə n woi fyifyiyi nyi ge, 11 "Mi gna ho, laka, kwu əho pəce ha lo əho pwuwa." 12 Wa laka gnyiagnyi wa kwu əwo pəce wa znazna lo ɓai gye wo əwye vnyanya. Dəye kwa ga zahozahoyi ɓəwowo, ɓa ci Shekwoyi, ɓai gna, "Yi too shni ɓəye pya gye nlai m!"

13 Njesnu Yeisu wa gbmiya lo nuwna-znudna əgbe. Deeji yaakwo kwa ɓe da wo, wa ya ɓa nyawu. 14 Shi wo ɓə lo woi znazna, wa gye Levyi Alfyis nugwnu n sasetu ń agədu gwoyi lubwi. Yeisu wa gna wo, "Vyi mi." Levyi wa laka gnyi, wa vyi wo.

15 Əsa ń Yeisu ɓə tu woi gyi wyeshenyagyi dna n Levyi pwuwa, agədu gwoyi bəgyé n aleifyidai ɓa kwnu nyagyi gyi n woi ɓədo n əwo amwutuyii, ntuge ɓa ɓə mwa bəgyé ń ɓa ɓə vyi wo nyi. 16 She owa anyawuyi n ɓa ɓə zhni Afarisiyi nyi, ɓə gye woi kwnu nyagyi gyi n aleifyidai ɓədo n agədu gwoyii, ɓa nya əwo amwutuyi əɓo: "Knyiyi nu zhni woi kwnu nyagyi gyi n agədu gwoyii ɓədo n aleifyidai a?"

17 Shi Yeisu ɓə wo ɓəye wa gna ɓa, "Lafyiyada ta zna shigbeda shni m, ama nyasnayi. Mi to ɓe ma yi aɓəfyeceyi nu m, ama aleifyida."

18 Nsayi Yohana amwutuyi n Afarisiyi anyai, ɓa ɓə zhni ɓai wnagbe. Azaho ɓa ɓe ɓa nya Yeisu əɓo, "Kwo ze n wunanu Yohana ɓədo n Afarisiyi amwutuyii ɓai wnagbe, ama to əho amwutuyi ɓai wnagbe m ma?"

19 Yeisu wa dnaɓəgbe, "Kwo ɓa yezhni n wunanu mwulaɓa azhiɓeyi ɓa wnagbe woi ye kwnusnu n ɓai a? Ɓa taa wnagbe, əsa ń ɓa ye ɓwa kwnusnu lo n woi m. 20 Ama əsa ɓə lo, she a ɓə la mwulaɓa la ń əɓa aba, dna n nyipyeii nu ń ɓa ɓə wnagbe.

21 "Əzaho to lo n wo gwu əje-kwokwoi əta ǹ əje-woiwoyi m. N wa zhni lonu, əje-woiwoyi ɓa kpeya n kwokwoi, kwoi zhni sasaya kwoi la gna wu. 22 Jesnu əzaho to lo ń wo ze anamnuwna woiwoi fyi n anamnuwna apa-pwakwnu kwokwoi m. N wa zhni lonu anamnuwna woiwoi ɓə la apa-pwakwnu kwokwoi knyiapo ya, jesnu anamnuwna n anamnuwna apa-pwakwnui ɓa ɓə kwu zhniagbma. Aawo a ze anamnuwna woiwoi fyi n anamnuwna apa-pwakwnu woiwoi nu."

23 N Sibyiwyi hoi, Yeisu woi duya dnalo n alikamazhni, jesnu əwo amwutuyi ɓai kwnu znazna n woi, ɓa ya alikama atukwo bma. 24 Afarisiyi ɓa gna wo, "Shiawye, knyiyi nu zhni ɓai zhni əɓo n kwo zhni owa gnanaznu n Sibyiwyi a?"

25 Wa dnaɓəgbe, "Fye too shni ba kpeekpe, ənya n Dawuda ɓə zhni əsa ń myikwnu ɓə gwnu wo n əwo anugwnudoi, jesnu ɓai fyi ń əsnagyi m? 26 Fyi n Abyiyata pirisiti tukwoda anyipyei, wa lodna ń Shekwoyi pwuwa, wa gyi biledi pmyapmyai, n kwo ɓə ɓwa apirisiti nya nu zhni ɓa gyi ngye shi owa ncei da nyi. Jesnu waa ce ga əwo anugwnudo."

27 Nlonu wa gna ɓa, "A ɓə zhni Sibyiwyi ntu zanyikwoci ɓo nu, toge zanyikwoci ntu Sibyiwyi ɓo m. 28 Ntulonu Əza Nugwnu nu zhni Dagayi, du ɓədo tu n Sibyiwyi."