1 Dna n əsado, Yeisu wa lodna ń Ayahudiyibwokwnu, əza ɓə dna ń ɓo n əɓwai sháshái. 2 Azaho n ɓa, ɓə zna əɓo nu shni n ɓa ɓá ɓwa nabai ɓa tu Yeisu, ntulonu ɓa dna wo əwye byiwuu, nabai ɓa gye kwo wo ɓa ka wo gna n Sibyiwyii. 3 Yeisu wa gna əɓwa shasháida, "La laka gnyi n zahozahoyi abye."

4 Nlonu Yeisu wa nya ɓa əɓo, "Knyiɓei nu ń owa ncei ye a zhni n Sibyiwyi a; a zhni ɓəmanai nu kwo ɓənukwoi, a gnyi wyewyeyi nu, kwo a wu kwo a?" Ama ɓa kwu cepyi.

5 Wa shi ɓa awye n minagyii waa shegwnu, cei sna wo ntu əɓa adu akalákpe ɓo, wa gna əza yi, "Ta əho əɓwa ya." Wa ta kwo ya, əwo əɓwa kwaa tace n nunui. 6 Nlonu, Afarisiyi ɓa kwnuya lo ɓa ya kwúlupa n Ahirudiyii, she ɓa ɓá myi ɓa wu Yeisu.

7 Yeisu wa zhaya lo nuwna-znudna n kwnusnu əwo amwutuyii, jesnu deeji yaakwo ɓa kwnu n Gəlili əknyi Yahudiya nya, ɓa vyi wo. 8 Shi ɓa ɓə wo aɓo vnyanya n wo ɓə gnyi woi zhni nyi, aza bəgyé ɓa kwnuɓe da wo ɓai kwnu n Yahudiya, Urishelima, Idumyinya, jesnu n asəpai ń ɓa kpe n Urudu əkpma dəyi n shé Taya gwnu ɓədo n Sidoni nyi. 9 Wa gna əwo amwutuyi nge ɓa zna əya ɓyiyi shni ga wo, ntu n deeji ɓo, nabai to aza ɓa nyi wo əpma m. 10 Ntuge wo ɓə la bəgyé kágna, ntulonu aza yi n ɓa ɓə zhi n anyasnai nyi, ɓa knyi aje aɓwaya lo n abyei nabai ɓa to wo əɓwa. 11 Əsahosahoi n azafnu ajegbmiyi gye wo əwye ncei, ɓa yazhi n əwo abye ɓa fyiakwu, "Əho nu zhni Shekwoyi Nugwnu." 12 Ama waa əgbe tu ɓa n əwyei bmyibmyii nge ɓa to gna azaje əwo əɓo m.

13 Yeisu wa gwnulo əpe səpa, wa yì aza yi zhi n wo ɓə n əɓa ɓəi pma, jesnu ɓa ɓe da wo. 14 Wa tnu awoceaba, wa yì ɓa nge atnutnuloyi, nabai ɓa kwu kwnusnu n woi, n wo ɓə myi wa tnu ɓa waazizhni 15 jesnu ai ga ɓa ikwo ɓa kwnu ase ya.

16 Aza awoceaba aye nu nyi ń wo ɓə tnu:

Sima (əza ń wo ɓə tu wo əye ge Byitusu),

17 Jemyis, Zebədi nugwnu ɓədo n əwodoi Yohana (wa kpe ɓa aye nge, Bwonajis, n əkwo nu gyi nge "əgbmawyisa anugwnu"),

18 Anduru,

Fyilibwus,

Batolomyi,

Matiyu, Toma,

Jemyis Alfyis nugwnu,

Tadiyos,

Sima Ziloti

19 ɓədo n Yahuda Iskariyotii, əza n wo ɓə ɓwu Yeisu nyi.

20 Nlonu Yeisu wa lodna n pwuwa, njesnu deeji kwa yezhi, kwa zhni wo n əwo amwutuyii to ɓa myi ɓa shna nyagyi gyi m. 21 Shi əwo apwuwada ɓə wo əɓəye, ɓa lo ntuge ɓəə la wo lo ncei n əɓa pwuwa, ntuge ɓa ɓə gna, "Tukwo n la wo pmyi."

22 Jesnu owa anyawuyi n ɓa ɓə kwnu n Urishelima nyi ɓa gna, "Byelzebwulu zafnu nu dna n wo! N ase tukwoda əbeɓyii nu n wo kwnu ase ya ncei."

23 Ntulonu Yeisu wa yì ɓa wa daɓo n ɓai n aɓəsisii: "Shetam ɓa gbmi Shetam ya n wunanu a? 24 N əbemi kwo la əkwohni gnajeya, əbemi yi taa myignyi m. 25 N pwuwa kwo la əkwohni gnajeya, pwuwa yi taa myignyi m. 26 Jesnu ngye Shetam gnyiapaapa lo n əwohnii, wo la gnajeya nu, wo taa myignyi m, əwo nya kwo kwu zoo nu. 27 Ɓəhnihni, əzaho to lo n wo ɓa lodna n kaláda pwuwa, wa kwu əwo akaya, akpəge kpmisnui wo la əza kaláda pashi nu kpa. Nlonu n wo ɓa myi wa kwu akaya n əwo pwuwa. 28 Ɓəhnihni mi gna fye, a ɓa zo aza əɓa aleifyi vnyanya ɓədo n əyewnuya dəhodəhoi, 29 ama zahozahoyi n wa da atukwopmi ɓəda tu n Zafnu Gyigyiyi tukwo, a taa zo wo aleifyi m kpeekpe; ɓa n leifyi ɓəgyii lo nyalonyalo nya."

30 Wo ɓə da dəye ntuge ɓa ɓə zhi ɓai gna, "Wo n zafnu ajegbmii dnalo nu."

31 Nlonu Yeisu əya n əwo azajei ɓa si abaayi. Ɓa kwu zhi n əbmyi, ɓa tnu əzaho nge wo lo əmi wo yi wo ɓe ncei. 32 Deeji ɓə sase zhi n shegwnu wo, ɓa gna wo, "Əho əya n əho azajei, ɓa zhi lo n əbmyi, ɓa ye lo ɓa gye ho əwye."

33 Wa nya, "Anyikado nu zhni əmi əya n əmi azaje a?"

34 Nlonu wa shi aza awye n ɓa ɓə sase zhi n shegwnu wo nyi, wa gna, "Əmi əya n əmi azajei nu zhi nyi! 35 Əzahozahoyi n wo zhni Shekwoyi ɓəye, əwo nu zhni əmizado, əmi mapwii n əyai."