1 Shi ɓa ɓə wo vyivyiwyi n Urishelimai, ɓa ɓe Betifyeji ń Byetanii kpe ń Zaitu Əpe, Yeisu wa tnu əwo amwutuyi ngwnu-aba tnutnu, 2 woi gna ɓa, "Fye lo əzhi n kwo zhi ń əfye abye nyi, shi fye ɓwa lofyi n kwo, fye ɓə gye zhagawyi snáyi ədo ń əzaho too shni kwo gwnu m, n gyignyi n ɓo. Fye lo kwo fya ɓe n kwoi ń ya. 3 Ń əzaho wa nya fye əɓo, ‘Knyiyi nu zhni fyei zhni ɓəye a?’ Fye gna, ‘Dagayi n əkwo apmai lo jesnu əsa fyewyi, wo ɓa je tnu n kwoi n ya.’ "

4 Ɓa lo ɓa gye zhagawyi snáyi n tu n dnadna n gyignyi n abwokwnumi əgbe. She ɓa ɓə zhi ɓai lo kwo, 5 azaho n ɓa ɓə zhi n abaayi, ɓa nyaɓo, "Fye zhni knyiyi nu fyei lo zhagawyi snáyi ye a?" 6 Ɓa dnaɓəgbe she Yeisu ɓə gna ɓa nyi, jesnu aza ɓa fa ɓá ɓa lo kwo. 7 She ɓa ɓə ɓe Yeisu n zhagawyii, ɓa kwu əɓa aje takpe n kwo, wa sasetu n kwo. 8 Aza bəgyé ɓa ta əɓa aje zhi lo n zokwoi, azaje cè ɓai bma abalá ɓə ncei n bmana ɓai ya zhi n zokwo. 9 Aza n ɓa ɓə gyiabye nyi, ɓədo n azai n ɓa ɓə vyi ɓá nyi, ɓa ɓəwyi ɓai gna,

"Hosana!"

"Anabəlikada nu n əzai n wo ɓe dna n Dagayi əye!"

10 "Əyi dada Dawuda əbemi n kwo ɓe nyi kwo zhni anabəlika nya nu!"

"Hosana duduyi dna n əshemi!"

11 Yeisu wa lodna n Urishelima wa lo Dagayipwuwa ashilagyí. Wa shi aɓo awye laɓa n shegwnu, kwo shikwonyi wyeshe ɓə la lu she, wa gbmiya lo Byetani n kwnusnu n Awoceabai.

12 Əfye kwa gyi, shi ɓa ɓə zhi ɓai fa Byetani, myikwnu ɓə la Yeisu gwnu. 13 Shi wo ɓə gye gbaayi shnuwna ń tagnyi n afnyitoloi cikpe, wa lo wo kpe ngye kwo n gyigyii hoi tu lo. Əsa n wo ɓə si əkwo aba, to wa gye nyaho gyitu m, akpəge afnyitolo, ntuge gbaayi gyigyi əsa nu to ɓə gnyi m. 14 Nsayi wa gna shnuwna yi, "Kwo la zè ge zahozahoyi taa je əho gyigyiyi gyi m kpeekpe." Əwo amwutuyi ɓa kwu wo woi da ce.

15 Shi Yeisu ɓə si Urishelima, wa lodna n Dagayipwuwa ashilagyí jesnu wa ya aza yi nyaya ń ɓa ɓə fyi ɓai si jesnu ɓai kwnú anya n ɓo nyi. Wa knyi agyiwye shnayí atebwul kwnú ɓədo n asasekpeba alukpe kwnuyi nyai, 16 jesnu to wa ye zahozahoyi nge wo gnyi gnyikwo dna n Dagayipwuwa ashilagyí m. 17 Shi wo ɓə gnyi woi wunya, wa gna, "A to ncei kafyilo, ‘A ɓa yi əmi pwuwa ge aduwazhni pwuwa nu abye vnyanya nya m’? Ama fye la kwo zè ‘avyì nyakwnu.’ "

18 Shi Apirisiti tukwoda ɓədo n owa anyawuyi ɓə wo ɓəye, ɓa ya zokwo znashni she ɓa ɓá wu wo, ntuge ɓa ɓə wo əwo ədna, jesnu bəgyé vnyanya ɓə zhi n ɓəwowoi nu əwo nyawu nya.

19 She wyeshe ɓə she, Yeisu n əwo amwutuyii ɓa kwnuya n əzhiyaakwo.

20 N laabmii, she ɓa ɓə kwnuya lo, ɓa gye gbaayi shnuwna yi n ɓwáɓwai dù n əkwo agbegyei. 21 Byitusu wa pá wa gna Yeisu, "Rabyi, shiawye! Gbaayi n ho tui kwo əknyi nyi, kwo kwu ɓwaa!"

22 Yeisu wa dnaɓəgbe, "Fye kwu gaiciyaganunui ga n Shekwoyi. 23 Ɓəhnihni mi gna fye, ndei zahozahoyi wa gna əpe ye, ‘Lo, ho she əhohni ya dna n shikwo’ jesnu to wa fyi abwugba ngwnu-aba n əwo ədu m, ama waa gaiciyaga ge əɓo n wo da nyi, kwo ɓa kwu zhni, a ɓa kwu kwo zhni ga wo. 24 Ntucenu mi gna fye, nyahonyahoi n fya nya kwo ɓo dna n aduwazhni, fye kwu gaiciyaga ge fye la kwo ɓwa jesnu kwo ɓaa zè əfye nya. 25 Njesnu əsa n fye zhniaduwa, ngye fye n ɓəhoi dnalo n əmì n zahozahoyii, fye zo ɓa abwi, nabai əfye Dada n wo dna n əshemi nyi, n wo ɓa zo əfyehni aleifyi."

[26 Ama n fye to zo abwi m, əfye Dada n wo dna n əshemi nyi wo taa zo əfyehni aleifyi m.]

27 Ɓa je lofyi n Urishelima, jesnu shi Yeisu ɓəə lo woi znazna dna n Dagayipwuwa ashilagyí, apirisiti atukwoda, owa anyawuyi ɓədo n abyedai ɓa ɓe da wo. 28 Ɓa nyaɓo, "N knyi ikwoi nu n ho zhni aɓo ye a? Jesnu nyika nu na ga ho ikwo nge ho zhni əɓo ye a?"

29 Yeisu wa dnaɓəgbe, "Mi ɓa nya fye əɓo gbmanyi. N fya dna mi ɓəgbe, mi ɓa wu fye ikwo ń mi zhni apma ncei mii zhni aɓo ye. 30 Yohana batizimazhnizhni: kwo ɓə gbmi n əshemi nu kwo əkwo ɓo ɓə pá n zanyikwoci nu a? Fye gna mi!"

31 Ɓa da kwo fyiaje ɓahniɓahni ɓa gna, "N ya gna, ‘N əshemi nu,’ wo ɓa nyaɓo, ‘To knyiyi nu zhni to fyehni ga wo gaiciya ma a?’ 32 Ama ń ya gna, ‘N zanyikwoci nu, aza taa fa yi m.’ " (Ɓa ɓə wó aza ədna, ntuge zahozahoyi ɓə n gaiciyai ga nge Yohana ɓə zhni sheɓəgwognayi nu.)

33 Ntulonu ɓa dna Yeisu ɓəgbe, "Yi ta kpəlo m."

Yeisu wa gna, "Əmihni ce mi taa gna fye n knyi ikwoi nu n mi zhni aɓo ye ncei m."