1 She Sibyiwyi ɓə la duya, Mariyamwu Magadalayi, Mariyamwu Jemyis əya, ɓədo n Salomyii, ɓa si anyasnidaí nabai n ɓa ɓə lo ɓai pmya Yeisu nayi. 2 N labmilabmii, n nyipyei kpmisnui laadi yi nya, nyipyei ye ɓwa kpekpetu, ɓa wna əzna lo vnyigwo yi 3 nlonu ɓa nya aje əɓo, "Nyika nu ɓə pmyi kwuta ya n kwo gwu n vnyigwo əgbe nyi a?"

4 Ama she ɓa ɓə kpmiawye wu, ɓa gye nge kwuta yaakwo yi, a la kwo pmyiya. 5 Shi ɓa ɓə lofyi n vnyigwo, ɓa gye əɓyikasa n aje abwuibwui kpe n sasetu n ɓwaizhe ɓwa, ədna kwa wo ɓa.

6 Wa gna, "Ədna to wo fye m, fye zna Yeisu Nazeretiyi nu shni n a ɓə znu wo du nyi. Wo la laka! Wo to dnalo n ya m. Fye gye aba n ɓa ɓə n woi yashi nyi. 7 Ntucenu fye lo fye gna əwo amwutuyi ɓədo n Byitusui, ‘Wo gyilo ń əfye abye woi lo Gəlili. N abaayi nu ń fye ɓəə gye wo əwye, n ɓwasnu shi wo ɓə gna fye nyi.’ "

8 N zhi ɓai vnyi jesnu n nunui zhi n ɓəwowoi, anyikwoza ye ɓa kwnuya n Yeisu vnyigwo ɓa bwusi. Ɓa to ɓə da ɓəhoɓəhoi n zahozahoyi m, ntuge ədna ɓə wo ɓa.

[9 Əsa n Yeisu ɓə laka n labmii n nyipyei kpmisnui laadi yi nya, wo ɓə kpmi kpeya da Mariyamwu Magadalayi nu, əza n wo ɓə kwnu wo ase ya ngwnu-tnaaba nyi. 10 Wa lo wa gna aza yi n ɓa ɓə kwnusnu n Yeisui nyi, n ɓa ɓə zhi ɓai zhni bwugbazhii ɓai ciɓwi. 11 She ɓa ɓə wo nge Yeisu wo n wyewyeyi lo jesnu nge Mariyamwu Magadalayi wo kwu wo gyewye, to ɓa ga ce gaiciya m.

12 N dəye avnu Yeisu wa kpeya da əɓa ngwnu-aba n shnado shnashnai, əsa n ɓa ɓə lo ɓai znazna ń zhigba. 13 Aza ye ɓa jezezhi jesnu ɓa wu anabagyi; ama to ɓa ga ɓa gaiciya ce m.

14 N dəye avnu Yeisu wa kpeya da ngwnu awocei-gbmanyi əsa n ɓa ɓə fyi ɓai gyi nyagyi. Wa gnaknyi ɓa ntu əɓa tnagaiciyaganunui ɓo jesnu n əɓa bwugba akalákpei, n ɓa to ɓə ga aza yi gaiciya, n ɓa ɓə kwu wo gyewye ń əwo əfyikalala avnu nyi m.

15 Wa gna ɓa, "Fye lofyi n anyì vnyanya, fyee zhni waazi nabagyi manai nya ga aza vnyanya. 16 Zahozahoyi n wa ga gaiciya, aa kwu batizima zhni wo, wo ɓə la pwo, ama zahozahoyi n wo to ga gaiciya m, a ɓə la wo znuknyi. 17 Nlonu n aznù ye ɓə vyi aza yi n ɓa kwu gaiciyaga nyi: Dna n əmi əye ɓa ɓə kwnu ase ya; ɓa ɓə daɓo n anyitala woiwoyii; 18 ɓa ɓə kwu awa shi n əɓa aɓwai; əsa n ɓa sni əmwi nukwoi, kwo to ɓə wu ɓa əɓwa m nanyinanyi; ɓa ɓə kpe anyasnayi əɓa aɓwa jesnu ɓa ɓə ɓwa kágna."

19 N dəye avnu she Dagayi Yeisu ɓə kwu ɓəda da n ɓai, a la wo gwnulo ncei n əshemi, waa sasetu n Shekwoyi ɓwaizhe ɓwa. 20 Nlonu amwutuyi ɓa kwnuya jesnu ɓa zhni waazi n ɓwahoɓwahoi, nlonu Dagayi wa zhni tnutnu n kwnusnu n ɓai jesnu wa wu ikwo əwo ɓədagbma nya n aznùi n ɓa ɓə vyi kwo nyi.]